NEHEMIA 8

Ezraüh Khaiuniahoi Hau Ngiokhem Veteji

1Alei chinyat ta Israel hai chikü ngüso noksong nouso ai kihlo. Nung alei chongting ajekhaiu nouko ngüso apem Yirusalem nai khiam Bekhan mongai noitsün khengtaiu nai kamshin. Ngüsoüh, Apaou nou Israel hai hau Mosa tsangkü kiutsün Ngiokhem thsam nou, ngiokhem ngetsün Ezra tü kankü shiau sangh. 2Nungtiphe Ezraüh melo, menyiu, naiuso angela au shiokü noitsün methsohoi kamkü noitsün nai nung thsam nou kankü shin. 3Nungai bekhan dongko khengtaiu nai apaüh ah-shiothsan nai yanou anyiwem tü thalutkü ngüso hau ngiokhem nou veten, nungko ngüsoüh mongkiukü ang.

4Nung chhi tao thaiutha shantsün puo chiai Ezra tsakü noi. Naiuso apa uai khaiunia nungso- Mattitha, Shema, Anaia, Uria, Hilkia, naiuso Maaseia so tsakü noi, naiuso apa tsatai khaiunia nungso- Pedaia, Mishael, Malkija, Hashum, Hasbad- dana, Zekaria, naiuso Meshullam so tsakü noi.

5Khaiuniahoi khengai puo atsok nai Ezra tsakü noi nai, ngüso chiküüh apa tü langsankü thap. Apaüh nung thsam soptsünko aikü, ngüso tsakü chu. 6Ezraüh ngiom, “Asongting Goa, Apaou nian lülomsan!”

Khaiunia chiküüh pha loksankü, “Amen! Amen!” ta ngiokü kaukü napkü amkham.

7Küta ngüso chukü meshen noithang nai tsakü noi, naiuso Levi hoi nousoüh ngüso hau Ngiokhem thanekü chiten; nungko ngüso; Jeshua, Bani, Sherebia, Jamin, Akkub, Shabbethai, Hodia, Maaseia, Kelita, Azaria, Jozabad, Hanan, naiuso Pelaia noiküla. 8Ngüsoüh Goa Ngiokhem nou ngiolon noulu ngio phoklekü chitenai khaiuniahoi nou ngelakü noiküla.

9Tilai khaiunia nousoüh Ngio- khem nou pohtsün ti noin nung lula, nungai ngüso thatü mongkiakü shapao yachu. Nungtiphe nok- shingpaou Nehemia, meson naiuso Ngiokhem ngetsün Ezra, naiuso Levi hoi sauhaiüh Ngiokhem nou thanekü chimji ngüsoüh ngiom, “Nung ajekhaiu asam Goa Apaou thaiutha asio noin, nungtiphe asam mong- saiuau tsüdekünai ashapao tsünoi. 10Loto asam tsamai lükhu küta sümai tsak lünoi. Saiukü tsütaiu- künso hau asamüh chih naiuso theng lüjankiuha. Lonyi nou Apaou ün asio ajekhaiu noin, nungtiphe asam tsümonglingkü lanoi. Apaou nou kiutsün asam amongling nou asam oukongkü iula-e.” 11Nungtili asio ajekhaiu nouko khaiuniahoi tsümonglingkü tsünoi-ela ta ngiokü Levihaiüh sailukü khu. 12Ngüso hau vedetsün ngelaphe khaiuniahoi chikü tsamai shiküta monglingkü heshiu naiuso ngüsoüh taiutsün nung amaohai hau hachukü noiküla.

Asoloutsün Sümai

13Nungthan ajekhaiu nai mesonhoi naiuso Levihoi hakü kau nai ahei nouso ngiokhem nouso tü yamau Ezra dongai khu. 14Apaou nou Mosa tsangkü kiutsün Ngiokhem nou Asoloutsün Sümai taoko to apolio jenkhio nai kih ao Israel hai hau nung ngiokhem kiutsün ngüsoüh ep- san. 15Nungtiphe ngüsoüh ayamhan ajantso kiuküta ngüso Yirusalem naiuso amao noknio, noksong nouso thapekkü khuau hong: “King nouso ai lükhu küta Ngiokhem nai satkü taiutsün ayamhantsünli Asoloutsün Sümai shanao tsonpai kea, olip kea myrtle paikea, chengsha nouso, naiuso amao paikea nouso lokü ashi.”

16Nungtiphe khaiuniahoi nou Paikea nouso kankü shikü ngüso chikü nou meshen tsamkhaiu ai, king nouso ai, amkham tsam keng nouso ko, naiuso noknio kengpun nouso ai, Khiam Bekhan naiuso Efraim Bekhan dongko Asoloutsün Sümai jenkhio lahsankü noiküla. 17Tha- loukü khuwantsün ainou laokü yashitsün khaiunia chikü nou ngüso soloutsün tsam lahküta kih. Nun thso Yihusua tao ainou lonyi nung saokü nouko nung chongting chhitsün noiküla, naiuso nungko khaiunia chikü thatü mong jüokü monglengat. 18Sümai tsaloutsün ajekhaiu nai yanou sümai athon nyi saokü ngüsoüh Goa ün Ngiokhem ajekhaiu pungkü haoson tsak tsak ve. Ngüsoüh nung Asoloutsün Sümai ajekhaiu chinyatnyi saohe, küta petjeinyi nouko nai Ngiokhem nai ngiokü taiutsünli sümai athonlo akam tsak noiküla.

Currently Selected:

NEHEMIA 8: KHIABSI

Highlight

Copy