MARK 16

Ahkü Shitsün

(Mat 28:1-8; Luk 24:1-12; Yhn 20:1-10)

1Yihuda Anounyi shi-ankütünai Mari Magdalene naiuso Yakob nyiu Mari, naiuso Salome soüh Yisu miapem da tsomkiu-au angannyamtsün laoshang tuhlu. 2Ahkü shitsün ayating nyap ajepek tao, ngüso etam nai khu. 3Akhu yamko ngüso tsak si tsak chitekü ngiom, “Etam koukhan ainou lung sam hao sauüh lekkan kiu-e?” (Nung Lung nou thatü songkü noiküla). 4Ngüsoüh thapnai nung lung nou lekkankü ep. 5Nungtiphe ngüso etam nai napnai, oum tsak ne athaiu thokü Yisu mia-tsan uai moknoikü epkü ngüso lekkatkü ngawan.

6Apaüh ngüso tü ngiom, “Lekkatkü lanoi,” “Asamüh Nazaret hai nou Yisu sau paiphu nai lalut apa yamji ta ngo ngen. Apa nungko tsünoi, apa ahkü shi-iu! Ngüsoüh apa wantsün athang athaplu! 7Lo lükhu, küta apa sahoiso naiuso Peter hao nung ngiongem lüchite: ‘Apa asam khako Galil ai khuji; apaüh asam tü ngiotsünli nungai asamüh apa eppe!’”

8Nungtiphe ngüso yangelatkü naiuso lekkatkü etam ainou khaolaokü khuwan. Ngüsoüh nung thaiutha sau tü titso tsüngio, tiautenai ngüso lekkatkü noiküla.

Yisuüh Mari Magdalene hao Sungkü Han.

(Mat 28:9-10; Yhn 20:11-18)

9Yisu e-e ainou ahshitsün Anounyap beta, apaüh angei onthso chinyat koman kiutsün nyiuhai Mari Magdalene dongai sungkü han. 10Nai apaüh khukü Yisu ko noihatsünso hao chiten. Nungko ngüso mongsaiukü naiuso shapkü noiküla. Naiuso tilai 11Yisu aa noin, naiuso Mari Magdaleneüh apa epiu ta lu, nungai ngüso apa da mongtsülam.

Yisuüh Sahoi Nime hao Sungkü Han

(Luk 24:13-35)

12Nungphiai sahoi nouso ongko ngüso nime nokai khukü noinai, Yisuüh mothikü ngüne dongai sungkü han. 13Ngüne laokü shiküta nung amao nouso hao chiten, lüko ngüsoüh nung da mongtsülam.

Yisuüh Sahoi Chekü Tsak hao Sungkü Han

(Mat 28:16-20; Luk 24:36-49; Yhn 20:19-23; Hong 1:6-8)

14Aphiteng sahoi chekü tsak nou chihheao kamnoi nai, Yisuüh ngüso hao sungkü han. Apaüh ngüso tsümonglamtsün naiuso apa ahshikü ep nouso da mong tsülamkün thaiutha ngüso tü thut. 15Yisuüh ngüso tü ngiom, “Asam goumchi apemai khukü khaiunia apem tü Ngem Amei lüchim. 16Sauüh monglamkü khiamai lime, apa kipsan-e; lüko sauüh tsümonglam-e, apa tsükipsan-e. 17Sauhaiüh monglam-e ngüso thaiutha ii nou nungso noi-e: jü nianko ngüsoüh angei onthso nouso koman-e; ngüsoüh ngio amao nou chite-e; 18ngüsoüh pao thalou lüko, naiuso eao oukong suntsün sheh shiu lüko, nungüh ngüso tü atawaiao oukong tsünoi-e; ngüso phaüh akiahai da thannai ngüsoüh alomei eppe.”

Yisu Aün Nai Kankü Sungji

(Luk 24:50-53; Hong 1:9-11)

19 Apaou Yisu ngüsoko chitekütün phiai apa aün nai niakü sungkü Goa uai moknoi. 20Sahoi nousoüh alumai chimkü khu, naiuso Apaou nou ngüsoko hakü chhi, naiuso ngüsoüh chimtsün nung ngiotsüo ta ii athanga chhitsün tsangkü mitha kiuji.

Currently Selected:

MARK 16: KHIABSI

Highlight

Copy