LUK 1
1
1Atsüojin Theophila:
Khaiunia piakü nou, sam ongko ti thawao nung thaiutha, ngüsoüh shio nou lektso ngiopengao kowe. 2Aya ainou sauhaiüh nung ngio chim naiuso chhi nouso ep, sam hau ti chiten nung ngüsoüh sat. 3Nungtiphe chhi amei nou shioko, ngü ayanai yakü meikü tsüokü velu-iu, nung lingkü satnai athaiutha mei-e ta ngo yang. 4Nungtiphe asam tü tilüsong chim, nung asamüh ngiotsüo saiukü ngeluao thaiutha ngo nung sat.
Alimkiutsün Yohan Chetao Ngiotsün
5Yihudahai Nokpao Herod taoko meson tsak nian nou Zekaria, Abija sahoi ong ainou noiküla. Apa tsammongnyiu nian nou Elizabet lüko meson tsamkhaiu ainou noiküla. 6Apaou nou ngiotaiutsün naiuso ngiokhem chikü nai aphio tsünoikü ngüne Goa khako asio noiküla. 7Ngüne thso tsüha, tititenai Elizabet lon noiküla, naiuso ngüne nemthso akihlaiu laiukü yanankü noiküla.
8Ajekhaiu tsak ko, apaüh amkham tsamai meson chhi haoson loukü noiküla. 9Apaou asiothang nai sungkü thangkoinek jah-ao phongdei nou apa da latha. 10Thangkoinek jah-ao taoko khaiuniahoi kamai misao saokü noiküla.
11Nungai thangkoinek jahtsün chaithiotsün uai Apaou aünhong tsak apa dongai sungkü tsa. 12Tilai apaüh nung ep, apa lekkü hatat. 13Lüko hong nou apa tü ngiom, “Lahatsai, Zekaria! tititenai ni kojatsün lula-iu, naiuso atsammongnyiu Elizabetüh ni hao melothso tsak chetkiu-e, naiuso ni apa nian Yohan ta niane. 14Ni amongling eppe, naiuso ni mongtsame, naiuso apa chet nou shioko piakü monglinge! 15Tititenai Apaou khako apa asong iula-e, naiuso apaüh theng tsüdekünai phop khiam tsüshiu-e; tiautenai apa nyiu thaimong ainou yakü apa Asio Onthso nou miankü noi-e. 16Apaüh Israel thsoso piakü ngüso Apaou Goa dongai phokle-i-e. 17Po nouso mong thsoso dongai phokle-i-e, naiuso angem tsülukünso asiohoi mongyang nai tsakei-i-e, naiuso Apaou thaiutha khemkü noinso khemluao, apa khako Elija onthso naiuso oukong nai apa khu-e.” 18Nungai Zekariaüh hong nou tü ngiom, “Ngo nung titi nge-e? Tititenai ngo petche, naiuso jü tsammongnyiu aakih laiukü khuwaniu.”
19Hong nou thalakü apa tü ngiom, “Ngo Gabriel” “Ngo Goa khako tsatsün noin, naiuso ni tü chiteao naiuso adongai nung ngem amei kanao ngo hong. 20Athaplu, nung shinaptsün ajekhaiu mosaokün lektso ni ngio chiteao tsüshiokü noi-e, tititenai jü ngio sübao atao atsüoting nai shinape nung ta ni atsüo ta tsüyang.”
21Khaiuniahoi nou Zekaria taiukü noiküla, naiuso apa amkham tsamai laiukü noiphe ngüso ngawan. 22Tilai apa khengai shin, apaüh ngüso ko ngio chiteao tsüshio nungtiphe amkham tsamai apaüh miamian tsak ep ta ngüsoüh ngelan, ngüso tü pha nou ii nou han.
23Tilai apa amkham tsamai yathsüotsün atao thonkü shin, apa tsamai khun. 24Nung ajekhaiu yanküta apa tsammongnyiu Elizabet pem tsükengkü iulan. 25“Lo aphiteng nai Apaou nou ngü ta hachu-iu,” “khaiunia ongko ngo amiam noitsün apaüh kankü khu-iu” ta apaüh ngiom.
Yisu Chetau Thaiutha Nge-itsün
26Lo alei luok nouko Goa ainou aünhong Gabriel Galil ai nok tsak nian nou Nazaret ai hong. 27David kau nai khaiunia tsak nian nou Yosepüh emkü noitsün asangting meso tsak nian nou Mari dongai Gabriel hong. 28Apaüh Mari dongai khukü ngiom, “Ni ko aalu lünoi! Apaou niko noin, naiuso ni thatü oukkiu-iu!”
29Lüko nung ngiotsün thaiutha apa monghenkü shi-an, naiuso mongai nung ti-in salam ngio ta ngawan. 30Hong nou apa tü ngiom, “Lahat, Mari! Tititenai Goa ainou ni atsüojin epiu. 31Naiuso athaplu, ni meshen methso noithang tsükengkü iula-e, naiuso melothso tsak chete, naiuso ni apa nian Yisu ta nian-e. 32Apa asong noi-e, naiuso apa tü asongting ün Thso ta jone. Apaou Goa nou apa po David nokpao noikham apa hao kiu-e. 33Yakob kau khako apa asaita nokpao-e, naiuso apa nokshing athontsüyange!”
34Mariüh aünhong nou tü ngiom, “Ngo asangting tsak. Nung titi shio-e?”
35Hong nou thalakü apa tü ngiom, “Asio Onthso akhako shi-e, naiuso Asongting oukong nou ni lajei-e. Nungtiphe achettao noitsün methso tü Goa Thso ta jone. 36Atsammong Elizabet lüyangsan. Apa sonthe noilüko, pemtsükengkü iula-iu; naiuso sau tü lon ta jon, apa lo nou pemtsükengkü alei luok noin. 37Tititenai Goa ainou ngio shitsün titso tsüshinapkü tsünoi-e.”
38Mariüh ngiom, “Ngo Apaou yathsüotsün noin,” “nung ni ngiotsünli ngü da lünoi-i.” Nungai hong nou apa ainou punge.
Mariüh Elizabet Sailutsün
39Mariüh nung taoko tsaloukü king goumchi Yihuda nok tsakai khaolaokü khu; 40naiuso Zekaria tsamai napkü Elizabet tü salam ngio ngiom. 41Tilai Elizabetüh Mari salam ngio lula, apa thaimongai methso nou hamkei. Elizabet Asio Onthso nou mian. 42Apaüh sang asong nou vekü ngiom, “Nyiuhai ongko ni thaiumei, naiuso athaimongai noitsün nio thaiumei! 43Apaou nyiu ngo tü shisailutsün nung chhi asong, ngo da tiau shinape? 44Tititenai athaplu, ni ngiotsün salam ngio jü noukhan ai napnai jü thaimongai methso nou amongling nou hamkei. 45Sauüh atsüo ta monglam, apa thaiumei, tititenai Apaou nou apa tü ti thalou nung shinape.”
Mariüh Nianlomtsün Jih
46Mariüh ngiom, “Jmongpemüh Apaou nian lomji;
47Jü onthso ngo Aasantsün Goa tü thatü mongtsamiu.
48Tititenai apaüh meshen yathsüotsün mongmei nou tü lu-iu!
Tititenai athaplu lo taoko yakü vetao apem nou ngü thaiumei ta jone.
49Tititenai ashiotsün nou jü thaiutha chhi asong chhi-iu;
naiuso apa nian asio noin.
50Apa atsüojin apa lon hattsünso khako vetao pungkü noi-e.
51Apaüh meshen pha nou meshen oukong han.
Amekoi ayang nouso apaüh tsüthawao-i-e.
52Apaüh nokpao thsoso ngüso nokpao noikham ainou teni-iu.
Naiuso amongmei khaiunia nouso tensaniu.
53Anaiutsünso apaüh jengtsaiu amei nou tsamkiu-iu,
naiuso memei nouso apaüh phakeng honganiu.
54Apaüh sam paosiposo tü thaloutsün tsülean naiuso apa tsamki Israel tü hachuao shin
55Apaüh Abraham naiuso apa thsaosithso apem tü asaita atsüojin hanao yangsaniu!”
56Naiuso Mari apako alei süme thatso noiküta apa tsamai laokü khu.
Alimkiutsün Yohan Chettsün
57Lo Elizabet methso chetao atao saokü shin, naiuso apaüh melothso tsak chet. 58Apa phaohai si tsammonghaiüh apa tü Apaou nou atsüojin asong hantsün lula, naiuso ngüsoüh apa ko monglingat.
59Tilai methso nou anoujet tsak ngoi, ngüsoüh methso nou tipanao shin, naiuso ngüsoüh apa meshen po nianli, Zekaria ta nianao aiu. 60Lüko apa nyiuüh thalakü ngiom, “Tsüde! apa nian Yohan ta niane.”
61Ngüsoüh apa tü ngiom, “Atsammong ongko nung nian niankü sau tsünoi!” 62Apaüh apa sau tü nianao aiuji ta ngüsoüh apa po tü ii nou han.
63Asattao lungkhio nou saokü apaüh sat, “Apa nian Yohan.” Nungai ngüso apem nou ngawan! 64Nungailu apa son sop kiukü apa lei sokhtham naiuso apaüh Goa nian lomkü ngio chiten. 65Ngüso lemkü noinso chikü hatkü iulan, naiuso Yihuda kingnok chikü ai nung ngio chitetsün chikü nok miankü penglükhun. 66Nung lutsün apem nou meshen mongai yangkü ngiom, “Naito nung methso nou ti the-e?” Tititenai Apaou oukong pha nou apa da noiküla.
Zekaria Khapiam Ngio
67Yohan po Zekaria Asio Onthso nou miankü chitekü ngiom,
68“Israel Goa Apaou lomkü lünoi!
Tititenai apaüh meshenhoi sailuao shin,
naiuso ngüso thaiutha aasan nou shan.
69Apaüh meshen tsamki David thsaosithso ainou sam hau akipsantsün tsak kiu-iu.
70Apa asio e-po nouso tsangkü peta thaloukü noin.
71Apaüh sam eh nouso naiuso sam tü
chinyantsünso oukong ainou kipsane ta thalouküla.
72Apaüh sam paosipo hao atsüojin hane,
naiuso apa asio ngiokhem yangsane.
73-74Sam paosipo Abraham tü thaloutaiutsünli
sam eh nouso oukong ainou kipsane,
naiuso apa tü ahat tsünoikü yathsüo-e.
75Nungaito sam akihlaiu thathonkü apa khako asio naiuso ngiotsüo noi-e.
76“Loüh jü thso ni tü Asongting E-po ta jone.”
77Meshenhoi hao ngüso angei wankiutsün tsangkü aasan ngetsün kiu-e,
78Sam Goa atsüojin nou Akheng ainou ajekhaiu ayan sungtsün nou sam sailu-e.
79Anyakhem naiuso e ahsu ai moknoitsün chiai awoniao thaiutha Aalu yam ainou sam hok niaao,
ni Apaou khako apa yam khemluao khu-e.”
80Methso nou onthso nai naiuso nyih nai oukongkü songjikan. Israel tü apa hantsün ajekhaiu mosaokün chikü apa singtso goh nai kih.
Currently Selected:
LUK 1: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
