MARK 15

Yisu Pailat khako Niajikanji

(Mat 27:1-2,11-14; Luk 23:1-5; Yhn 18:28-38)

1Ahom peta Atengteng mesonhoi, petche hoi, Ngiokhem tsandetsünso naiuso achosanhoi apem ko ngemloküta, Yisu kekü kankü khukü Pailat hao kiu. 2Pailatüh apa tü, “Ni Yihudahai Nokpao süne?” ta sang. Nai Yisuüh “Ni ngio-iu” ta apa tü thala.

3Atengteng mesonhoi nou Yisu hao ayam piakü nai aphio kiu. 4Nai Pailatüh Yisu tü müjam ngiosang nou, “Ni titso tsüthala-e tüta? Ngüsoüh ni hao titithatso aphio kiuji anglu!” ta ngiom.

5Lüko Yisuüh titso tsüthala; nungko Pailat ngawan.

Yisu Ean-iao Ngio Kiuji

(Mat 27:15-26; Luk 23:13-25; Yhn 18:39—19:16)

6Aasantsün Sümai taoko khaiuniahoi nou aiutsün nung akhou tsam ainou tsak sokshiao Pailat sai noiküla. 7Nung taoko angem taonai khaiunia loattsün, angem losantsünsoko hakü thaloutsün Baraba ta niankü tsak akhou tsamai noiküla. 8Hoi kamshiküta Pailatüh ngüso tü kümi kankeitsünli lükankei ta apa tü sangao yachu. 9Pailatüh ngüso tü, “Ngü asam hao Yihudahai nokpao sokiuao asamüh mongchiojimo?” ta sang. 10Athapao tsüaiukün shioko atengteng mesonhoi nou Yisu apa hao lethiowan ta Pailaatüh thatü meikü nge-en, tiautenai niokia noiküla.

11Lüko atengteng meson nousoüh hoi nou tü lojengkiukü Pailat hao ngüso dongai Baraba sok-iao sang. 12Pailatüh hoi asong nouso tü ngiom, “Naito, asamüh Yihudahai nokpao ta jontsün tü ngü ti chhi-iao mongchioji?”

13Ngüsoüh loüh, “Apa paiphu nai lülalut!” ta we.

14Pailatüh ngüso tü, “Apaüh eaolümeikü ti tsümeikü chhin?” ta sang. Ngüsoüh, “Apa paiphu nai lülalut!” ta thatü thsüokü we-en.

15Pailatüh hoi mongtsamiao yangkü, ngüso dongai Baraba sokkiu. Küta apaüh Yisu tü shiuhküta paiphu nai lalutao thumkü kiuwan.

Süpaihoi nou Yisu tü Lonyaiji

(Mat 27:27-31; Yhn 19:2-3)

16Süpaihoi nou Yisu nokshingpaou tsamsu nai nialokü nap; naiuso ngüsoüh süpaihoi apem jonkam. 17Ngüsoüh Yisu hao ethang neh tsak tenkiu, naiuso tsaopung nou kandio tsak thsa-ekü shanküta apa khaiu-ai keihi. 18Nai ngüsoüh apa hao salam kiukü ngiom, “Yihudahai Nokpao aakihlaiukü lünoi!” 19Ngüsoüh apa khaiu ai pailai nou shiuh, apa da lei thuplut, ngüsoüh kaukü napkü apa tü amkham. 20Tilai ngüsoüh apa lotsaotsün khem, apa ainou ethang neh nou lousan, küta apa hao tenkiu. Nai ngüsoüh apa paiphu nai lalutao nialokü khu.

Yisu Paiphu nai Lalutiu

(Mat 27:32-44; Luk 23:26-43; Yhn 19:17-27)

21Yamko Alexander si Rufo ne po, Cyrene hai nou Simon sau noknio ainou shikü ashi noiküla, süpaihoi nou Yisu Paiphu piao thaiutha apa, kojakü khuha-i. 22Ngüsoüh Yisu Golgotha, “Khaiuou gohthang” ta jontsün nai nialoukü khu. 23Nungai ngüsoüh Yisu hao theng nouko akho laolutkü kiu, lüko Yisuüh nung tsüshiu. 24Nai ngüsoüh apa paiphu nai lalut, naiuso khaiunia pungkü nou ti in haoson eppe ta, phong dekü apa neshe ngüso ongko sunlo. 25Nung lükao baji nai ngüsoüh Yisu paiphu nai lalut. 26Apa hao aphio kiutsün ngioyak, “YIHUDA HAI NOKPAO.” Ta apa khütha ai paiphu nou tü satlut. 27Ngüsoüh Yisu ko aikü phoklelaple khaiunia nime uai tsak, naiuso tsatai tsak ta lalut. 28Apaüh tsümeikü chhitsünso ongko haoson theha-e ta asiongio nai ngiotsün, nung atsüoting shithawao.

29Shimkü yankeitsünhoi nou ngüso khaiu munkü Yisu lotsaokü ngiom, “Aha! Amkham tsam lotheküta samnyi nouko shanao nou ni! 30Lo achija kipsanloküta paiphu ainou asao!”

31Nungti atengting mesonhoi nousoüh lüko, Ngiokhem tsandetsünso hakü ngüso ongko Yisu lotsaokü ngiom, “Apaüh amaohai to kipsan, lüko müshenpem to kipsanao tsüshio! 32Samüh monglamao Israelhai nokpao, Khrista lo paiphu ainou asao-i.” Naiuso apa ko hakü paiphu nai laluttsün khaiunia nime nou lüko apa lotsao.

Yisu Eantsün

(Mat 27:45-56; Luk 23:44-49; Yhn 19:28-30)

33Anyiwem chekü nime baji ainou süme baji saokü goumchi athum anyakhem nou loipok. 34Süme baji nai Yisuüh sang songkü wekü ngiom, “Eloi, Eloi, lama sabakthani?” “Jü Goa, jü Goa, ni ngo tiau leanji?”

35Nungko shimkü tsanoinsoüh nung lulanai, “Anglu, apaüh Elija jonji!” ta chitekü ngiom. 36Ngüso ongko tsaküh kopkü khukü, lüpoilam nai ehejek khiam chamlutküta, nung kai tsak tü kelutküta, Yisu sonkou ai chinlut kiukü ngiom, “Taiukü anoi! Elija apa paiphu ainou soksanao shi-e süne tsüshi-e samüh thapluko!”

37Yisuüh sang songkü we küta apa ean.

38Amkham tsam asio pou phiai ne khongtaiutsün asongthon ainou asaothon saosaokü nime hao thekü pai-an. 39Süpai ahei tsak sau paiphu dongko tsakü noiküla, apaüh Yisu titi ean nung epkü ngiom, “Nung khaiunia nou atsüoting Goa Thso noiküla!”

40Nungko nyiuhai ajantsoüh kumaikü thapkü noiküla. Ngüso ongko Mari Magdalene, naiuso Yakob si Yosep ne nyiu Mari, naiuso Salome hakü noiküla. 41Ngüsoüh Yisu Galil ai noikünaita, apa phiai hoilut, naiuso apa hachu. Naiuso nyiuhai amao nouso piakü apako hakü Yirusalem ainou shitsünso noiküla.

Yisu Khantsün

(Mat 27:57-61; Luk 23:50-56; Yhn 19:38-42)

42Ahsham shinai nung Yihuda Anounyi akhemlutsün ajekhaiu thaiuko noiküla. 43Nungko ayanglu noitsün asonghai tsak Arimathea hai nou Yosep, sau Goa nokshing tü taiukü noiküla, apa mongsongkü Pailat dongai khuküta Yisu pem loau sang. 44Pailatüh Yisu eaniu ta lunai ngawan. Nai apaüh süpai ahei nou jonkü Yisu eküta atao laiukü khu-iu süne ta sang. 45Pailatüh nung asong khaiunia ainou ngiongem luküta Yisu mia nung Yosep hao kiu. 46Yosepüh ashethop ne tuhkü, Yisu mia paiphu ainou lok-ikü tsanlo küta nung lung langsatkü taiutsün etam nai wan. Nai apaüh etam koukhan nai lung asong tsak nou nyanjeikü taiukiu. 47Mari Magdalene naiuso Yosep nyiu Marisoüh thapnai, ngüsoüh Yisu miapem tiai wankü noiküla nung ep.

Currently Selected:

MARK 15: KHIABSI

Highlight

Copy