LUK 10

Yisuüh Aochinyatkü Nime Nouso Hongpengji

1Nungphiai Apaou nou amao sahoi aochinyatkü nime shingsan, naiuso apa tilüsongai noila, nung nok naiuso noksong pungkü nai ngüso nimeme apa khako hong. 2Apaüh ngüso tü ngiom, “Atsüoting eiu nou anyamsim nyankü noin, lüko mephaiu thsaothsaokülu. Nungtiphe apa eiu ai mephaiu ahong ta asamüh eiupao tü misao lüsao. 3Lükhu! ngo asam chiu ongko Onnemok thsosoli hongji. 4Tangka tsop, nekong, tsüdekünai hokkhut, titso lakan; naiuso yamai sau hao salam lakiu. 5Sauhai tsamai asam nappe, ‘Aya nai nung tsamko aalu lünoi!’ ta lüngio. 6Nungai aalu tso tsak noinai, asam aalu apa da noi-e, lüko tsünoi nai, asam dongai nung müjam laokü shi-e. 7Ngüsoüh tilüsong kiu-e asamüh nung heshiukü tsamai lünoi, tititenai achhitsünso to meshen amai epkü hao noin. 8Ti noksong ai asam nappe naiuso ngüsoüh asam lou-e asam khako taiutkiutsünli asamüh lüheshiu. 9Nungko noinso akiahoi lülomeikiu, naiuso ngüso tü, ‘Goa nokshing asam dongko shimkü shikü noin’ ta lüngio. 10Lüko ti noksong ai asam napkü ngüsoüh asam tsülou-e, nung ainou sonkengai khukü, 11‘samüh sam hokai suntsün pu asam nok ainou pattanji, nungti lüko nung lüngelu, Goa nokshing shimkü shikü noin” ta lüngio. 12Ngo asam tü ngio-e, mikhem ajekhaiu nai nung noksong nousoko hao Sodom hai chenthso-e!

Tsümonglamkün Noksong Nouso

(Mat 11:20-24)

13“Korasin, athaiutha titengkü asapat noi-e! Betsaida, athaiutha lüko titengkü asapat noi-e! Tiautenai sübao athanga chhi asam ongko chhin, nung Tair naiuso Sidon nai chhitünto, ngüsoüh nethe tenkü pu tsomlutkü peta mong phokle-ankü noi-ela! 14Niko naito Goa nou mikhem ajekhaiu nai Tair naiuso Sidon hao atsüojin asong han-e. 15Naiuso Capernaum! ni aün sungyapkü loksane süne? Ni akheiai napane!” 16Yisuüh apa sahoi tü ngiom, “Sauhaiüh asam tü angji, nung ngo tü angji, sauhaiüh asam tsülou nung ngo tsülou, naiuso sauhaiüh ngo tsülou nung sauüh ngo hong Apa tsülou.”

Aochinyatkü Nime Nouso Laokü Shiji

17Sahoi aochinyatkü nime nouso monglingkü shishikü ngiom, “Apaou, angei onthso nousoüh anianko sam tü angji!”

18Apaüh ngüso tü ngiom, “Aün ainou ahlapli Biya saliantsün ngü ep. 19Anglu! pao naiuso mekhakhanio khako, naiuso eh oukong apem khako ngamkeiao ngü asam hao oukong kiuji, naiuso ti in nou lüko asam tsütawai-e. 20Nungti lüko angei onthsohoi nou asam tü angtsün nai lamongling, lüko asam nian aün nai satkü noitsün thaiutha bao lümongling.”

Yisu Monglingji

(Mat 11:25-27; 13:16-17)

21Nung taoko apaüh Asio Onthso nai monglingatkü ngiom, “Oh Jüpo, aün naiuso goum Apaou! Nung ni mongsai amei suntsün naiuso ange khaiunia nouso ainou tsangan naiuso ehen methsohoi ongko achiai sungi nou shioko ngü anian lomji: ah, Jüpo, tititenai nungti ni mongchiotsün noila.

22“Jüpoüh ngo hao apem kiuwaniu, naiuso nung Po nou chiai, Thso sauüh tsünge; naiuso sauhai tü Thso nou achiai sungiao mongchioji, ngüso tü simkü Po nou, sauüh tsünge.”

23Nungai apaüh laokü shikü sahoi tü akao-ai ngiom, “Asamüh ti epji nung eptsünso thaiumei! 24Tititenai ngo asam tü ngio-iu, asamüh eptsün E-pohoi naiuso nokpaohoi nou epao aiuküla, lüko tsüep, naiuso asamüh lutsün luao aiu lüko tsüluha.”

Amei Samariahai nou Thaiutha Athatlu Ngio

25Ngiokhem tsandetsün tsak shikü apa lilukü sang, “Atsandetsün, asaita aa tengkam kamao ngü ti chhi-e?”

26Yisuüh apa tü ngiom, “Ngiokhem nai ti satkü taim? Ni titi veluji?”

27Apaüh thalakü ngiom, “‘Amongpem apem nou, a-onthso apem nou, naiuso oukong apem nou Apaou Goa lütsüojin, küta ni aphao hai tü nili lütsüojin.’”

28Yisuüh apa tü ngiom, “Ni atsüo thala-iu, nung lüchhi naiuso ni aa noi-e.”

29Lüko apaüh apa chija penkü hao aiukü Yisu tü ngiom, “Naito jü phao nung sau?”

30Yisuüh thalakü ngiom, “Khaiunia tsak Yirusalem ainou Yeriko ai saokü noiküla, naiuso apako kaohoi nouso phetekü ngüsoüh apa lemluwan. Ngüsoüh apa woiatan, naiuso jengtsaiu yanlowan, küta apa eao lümeikü wantaiukü khuwan. 31Nungai nungti thawao, mesonhai tsak nung yamai saokü noiküla, naiuso tilai apaüh nung khaiunia ep, apa amao ai ekü khuwan. 32Nung thanko Levihai tsak nung yamai shin, apaüh lüko nung epkü amao ai ekü khuwan. 33Lüko Samariahai tsak süme iu nungai shin, naiuso tilai apaüh nung khaiunia ep, apa mongkiakü yangkü, 34nung khaiunia dongai shikü apa mou nai khaiutsom naiuso theng lolutkü kekiu. Küta apa mokthso chiai noi-ikü apa sansaothang ai niakü shikü paotsang. 35Lühomli nai apaüh tangka nime lousankü tsampao hao kiukü ngiom, ‘Apa tü lüpaotsang’ naiuso ni tilüsong aphup wanshi-e, nung ngo ni hao thamshi-e.” 36“Nung khaiunia süme nouso ongko kaohoiko phetetsün khaiunia tü sübaoüh phaohaili chhin ta ni yangji?”

37Ngiokhem tsandetsün nou thalan, “Apa tü atsüojinyang hantsün nou chhin,” nai Yisuüh apa tü ngiom, “Lükhu, naiuso nungti ni lüchhi.”

Yisuüh Martha naiuso Mary Sailuji

38Nungai ngüso yamai khunai, apa nok tsakai nap, nungko Martha ta niankü nyiuhai tsaküh Yisu nialou. 39Apa nio menyiuthso tsak Mary ta niankü noiküla, apaüh Apaou shimkü moknoikü apa chitetsün tü ang. 40Lüko Martha ayamtheng chhi thaiutha yangelat, küta Yisu dongai shikü ngiom, “Apaou, jü nioüh chhi chhi-au jü pemsa wanji, nung ni tsüyangluso? Nungtiphe ngo lühachu ta apa tü lüngio!”

41Lüko Yisuüh thalakü apa tü ngiom, “Martha, Martha! chhi thaiutha ni mongyang piakü yangelatji; 42lüko apoutsün tsaklu noin. Nung Maryüh apa ainou sauüh kanlükhunao tsüshiokün ameiting haoson nou shinglouwaniu.”

Currently Selected:

LUK 10: KHIABSI

Highlight

Copy