LUK 9
9
Yisuüh Sahoi Chekü Nime Hongji
(Mat 10:5-15; Mrk 6:7-13)
1Yisuüh sahoi chekü nime jonküta ngüso hao akia lomeikiuao naiuso angei onthso apem khako oukong kiu, 2küta ngüso Goa nokshing thaiutha chimao naiuso akia nouso lomeikiuao hong. 3Apaüh ngüso tü ngiom, “Yam thaiutha pailai, nekong, themtsai, tangka tsüdekünai nekhut apoisan ti lakan. 4Asam sau tsamai nappe, nung ainou mopungekün lektso nungko lünoi. 5Tiai asam tsülou-e, asam tilai nung nok ainou soianji, ngüso thako atsangsheiao thaiutha asam hok ainou pu lüpattan.”
6Ngüso nok apemai khukü akia lomeikiu naiuso ngem amei chim.
Herod Lekkattsün
(Mat 14:1-12; Mrk 6:14-29)
7Nokpao Herodüh nung chhi apem thaiutha lulanai apa thatü lekkat, tititenai Yohan e ainou ahshikü noin ta ajantsoüh chitekü noiküla. 8Ajantsoüh Elija ahshikü noin ta ngiom loüh amaohai ajantsoüh pe ainou Goa E-po tsak müjam ahshikü noin ta ngiom. 9Herodüh ngiom, “Yohan to ngo khaiu tapsankü loatkü wan, lüko nung ngio sau thaiutha ngo luji, apa sau?” Naiuso apaüh Yisu luao yam.
Yisuüh Khaiunia Heng Pungo Tsadji
(Mat 14:13-21; Mrk 6:30-44; Yhn 6:1-14)
10Sahoi nou laokü shinnai, ngüsoüh apa hau ngüso chhi thaiutha chiten. Naiuso apaüh ngüso niakü Betsaida nokai khu. 11Nai hoi nou nung epkü apa phiai hoilut. Naiuso apaüh ngüso tü Goa nokshing thaiutha chite, küta alomeiao noitsünso lomeikiu.
12Tilai ahsham shin, sahoi chekü nime nouso shikü apa tü ngiom, “Hoi nou nok ashimai nai khukü saiao naiuso tso eheshiu epao lümeikü ngüso lühongan, tiautenai sam nungai aodangkünai noin.” 13Lüko apaüh ngüso tü ngiom, “Asamüh ngüso hao eheshiu lükiu.”
Ngüsoüh thalan, “Sam khukü nungso chikü thaiutha eheshiu tuh ao ni mongchioji süne? Tititenai samko themtsai pungo naiuso ngou nime chiai ti tsütaiu.” 14(Nungko ngüso pohailu nai heng pungo thatso noiküla.)
Yisuüh apa sahoi tü ngiom, “ngüso aopungongo hoi yangkü anoi-i.”
15Ngüsoüh angiotsünli ngüso chikü noi-in. 16Apaüh themtsai püngo naiuso ngou nime nou semkü, aün ai thapkü oukkiu, küta lopekkü hoi hao kiu-au sahoi hao kiu. 17Ngüso apemüh heküta tsamlu, naiuso apoi anelang nou kim chekü nime kamsanshin.
Peterüh Yisu Thaiutha Tsangsheikiutsün
(Mat 16:13-19; Mrk 8:27-29)
18Nyitso Yisu pemsa khukü misaokü noinai apa sahoi shin. Nai Apaüh ngüso tü, “Hoi nou ngo sau ta ngioji?” ta sang. 19Ngüsoüh ajantsoüh, “Yohan Alimkiutsün ta,” “loüh ajantsoüh Elija ta, naiuso ajantsoüh pe nai kihkü shitsün E-po tsak ahshikü noin ta ngioji?” ta thala. 20Nai Apaüh ngüso tü, “naito asamüh ngo sau ta ngioji?” ta sang.
Peterüh, “Ni Goa ün Khrista” ta thala.
Yisuüh Apa Eao naiuso Angja ao Thaiutha Chiteji
(Mat 16:20-28; Mrk 8:30—9:1)
21Küta apaüh ngüso tü nung sau hao lachite ta ngiokhem mongkü kiukü ngiom, 22“Khaiunia Thso thatü angjakü hao noin, naiuso petchehoi, atengteng mesonhoi naiuso ngiokhem tsandetsünsoüh apa lukhappe naiuso luat-e, lüko samnyi nouko ahshikü shi-e.”
23Naiuso apaüh chikü tü ngiom, “Ajantsoüh jü phiai shiao aiunai, apaüh meshen pem tsüyangkü ajekhaiu tsütukü paiphu pikü jü phiai ohoilut. 24Tititenai sauüh meshen aa kipsanao aiuji nung mowane, naiuso sauüh jü thaiutha meshen aa mowane, nung epshi-e. 25Tititenai khaiunia nou goumchi apem lesan lüko meshen onthso mowan nai tsüdekünai shiohean-inai apaüh ti lesanshi-e? 26Tititenai sau ngo naiuso jü ngio thaiutha miamsimo-e Khaiunia Thso nou tilai meshen ajinka naiuso asio aünhonghoi ajinka nai shi-e apa thaiutha miamsimo-e. 27Lüko atsüoting ngo asam tü ngio-e, nungko tsakü noinso ongko ajantsoto Goa nokshing moepkün lektso tsü-e-e.”
Shisileng Li-etsün
(Mat 17:1-8; Mrk 9:2-8)
28Apaüh nung ngio chiteküta anoujet tsak thatso phiai, Peter, Yohan naiuso Yakob apako niakü kingai misao saoao sung. 29Apaüh misaonai apa kha shisileng li-e-an naiuso apa nesi-e ajin oukü thaiukü iulan. 30Alekta khaiunia nime, Mosa naiuso Elija ne apako chiten. 31Yirusalem yamai khukü eao thaiutha ajinka nai sungkü Yisuko ngüso chite. 32Peter naiuso apako noinso thatü ngaongaokü noiküla, lüko tilai ngüso thsümonkü iulan, ngüsoüh Yisu ajinka naiuso apako tsakü noitsün khaiunia nime nou epshi. 33Ngüsoüh apa wankü khunai, Peterüh Yisu tü ngiom, “Atsandetsün, sam nungko noiao titi amei. Samüh kamnoi süme; athaiutha tsak, Mosa thaiutha tsak, naiuso Elija thaiutha tsak ta lahko.(Lüko apaüh ti ngiom nung tsünge.)
34Apaüh nung ngio chitenai thengmia tsak shikü ngüso sojei, naiuso thengmia nou ngüso sojei nai ngüso hatatkü noiküla. 35Nungai thengmia ainou sang tsak sungkü ngiom, “Nung Ngü chosantsün Jü Thso Asamüh apa tü lü-ang!”
36Nung ngio thonnai ngüsoüh Yisulu ep. Naiuso nung ajekhaiu nai ngüsoüh tilüsong ep nung sau hau tsüchite.
Yisuüh Angei Onthso Suntsün Methso Tsak Lomeiji
(Mat 17:14-18; Mrk 9:14-27)
37Nenyi nouko ngüso king ainou saonai, hoi piakü apako pheten. 38Hoi ongko khaiunia tsaküh vekü ngiom, “Atsandetsün, jü thso da thapao ngo ni tü thatü kojaji, tititenai jü thso apalu noin! 39Angei onthso tsaküh apa thalounai apaüh lekkü veji. Naiuso apa she lungkü mo-iulakün lektso apa ainou tsükhuji. 40Ngo asahoi tü nung komanao koja, lüko ngüsoüh tsüshio.”
41Yisuüh thalakü ngiom, “Oh amonglam tsünoikün naiuso tsüthakünso! Ngo asamko tilektso noi-e? naiuso asam ko tilektso jeilo-e?” “Athso nungai nialoukü ashi.” Ta khaiunia nou tü ngiom.
42Apa shinai, angei onthso nou apa khia-ikü juolakü iula-in. Lüko Yisuüh angei onthso tü thutkü koman küta methso nou lomeikiu. 43Ngüso apemüh Goa oukong asongting epkü ngawan.
Yisuüh Apa Eao Thaiutha Müjam Chiteji
(Mat 17:22-23; Mrk 9:30-32)
Apaüh sahoi nouso tü, 44“Ngü asam hau ti chiteao noin nung labean! Khaiunia Thso khaiuniahoi oukong nai thumkü lethiowanao noin,” ta ngiotsün ko khaiuniahoi ngawankü noküla. 45Lüko sahoi nou nung ngio tsüngela. Nung ngüsoüh tsüngelakü hao ngüso ainou tsangankü noiküla, naiuso nung ngiotsün thaiutha ngüsoüh apa tü sangao hat.
Sau Asongting Noin
(Mat 18:1-5; Mrk 9:33-37)
46Sahoi nouso ongko sau asongting ta angem tsak sung. 47Lüko tilai ngüso mongyang Yisuüh ngen, apaüh methso tsak nialoukü shikü, apa shimkü taiuküta, 48apaüh ngüso tü ngiom, “Jü nian thaiutha ko sauüh nungtin methso nou lou-e apaüh ngo louji naiuso sauüh ngo louji apaüh ngo hongtsün louji. Tititenai sau asam chikü ongko ehenting noin apa asongting noin.”
Sauhai Asam Thako Tsüde Ngüso Asam Hoi
(Mrk 9:38-40)
49Yohanüh ngiom, “Atsandetsün, khaiunia tsaküh anian ko angei onthso nouso komantsün samüh ep, küta samüh apa lulao, tiautenai apa sam hoi tsüde.”
50Yisuüh ngüso tü ngiom, “Apa lalulao,” “tiautenai sau asam ko tsükhengeji apa asam dongai noin.”
Samaria Nok Tsak ko Yisu Tsülou
51Tilai apa aün nai sunganao ajekhaiu saojikan, apaüh Yirusalemai khuao mongchiokü apa kha nungai phokle. 52Apaüh apa khako ngio kantsünso hong, naiuso ngüso khukü apa thaiutha khemkiuao Samariahai nok tsakai nap. 53Apaüh Yirusalemai khu-eli apa kha phoklephe ngüsoüh apa tsülou. 54Tilai apa sahoi Yakob naiuso Yohan neüh nung ep, ngüsoüh ngiom, “Apaou, ngüso jawanao thaiutha samüh aün ainou in sao-i-ao ni mongchio-emo?”
55Yisuüh lapkü shikü ngüso tü thut. 56Nai Yisu naiuso apa sahoiso amao nokai khu.
Yisu Phiai Hoilutao
(Mat 8:19-22)
57Ngüso nung yamai khunai, khaiunia tsaküh apa tü ngiom, “Ni tai khulünou ngo aphiai hoilute.”
58Yisuüh apa tü ngiom, “Chiuhoi thaiutha lungken noin, naiuso koiyai waio nouso a-ap noin, lüko Khaiunia Thso thaiutha khaiu taiuthang tsünoi.”
59Apaüh amaohai tsak tü ngiom, “Jü phiai ohoilut.” Lüko apaüh ngiom, “Apaou, ngo khukü jüpo chong akhanan-i.”
60Yisuüh thala, “E nouso ngüso eanau nousoüh khananao lütaiukiu: lüko nito khuküta Goa nokshing achiai sungkü lüchim.
61Amaohai tsaküh Yisu tü ngiom, “Apaou ngo aphiai hoilute, lüko aya jü tsammongso tü apunge ngio ngioao akhu-i.”
62Yisuüh apa tü ngiom, “Khaiunia sauüh apa pha eiu ahtsün nai taiukü phiai thapshiji apa Goa nokshing thaiutha tsüpou.”
Currently Selected:
LUK 9: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
