LUK 11

Yisuüh Misao Tsandetji

(Mat 6:9-13; 7:7-11)

1Nyitso Yisu athang tsakko misao saokü noiküla. Tilai apa misao khem, apa sahoi ongko tsaküh apa tü ngiom, “Apaou, Yohanüh apa sahoi hao tsandetsünli, sam hao misao atsande.”

2Apaüh ngüso tü ngiom, “Tilai asamüh misao sao-e, nungti lüngio!

‘Jü po:

Anian asio asuhat lünoi;

anokshing ashi.

3Ajekhaiu pungkü samüh poutsün eheshiu sam hau akiu.

4Sam hau sam angei awankiu;

tititenai samüh lüko sam tü phiotsün pungkü hao aphio wankiuji.

Naiuso athelu achek nai sam lanialükhun.’”

5Nai Yisuüh apa sahoiso tü ngiom, “Athatlu nai asam tsak ah-wem meshen hai tsamai khukü apa tü ‘Haimei, ngü hao themtsai süme alaiukiu, 6tititenai jü mesan tsak shin, lüko ngü akiuao titso tsütaiu!’ ta ngio nai, 7apaüh tsam ainou thalakü ngio-e, ‘Ngo la-angja-i! lo kou nou kiapaniu, naiuso jü thso ngüko saikü noin.’ 8Ah, naito ngo asam tü ngio-e, asamüh tsümiamkü saolutkü noi naito apa asam hao themtsai kiuao achuao tsüaiu lüko, ni apa haiphe, apa chuküta asamüh aiutsün apem kiu-e.

9“Ngü asam tü ngio-e, lüsao, nai nung asam hao kiu-e; lüyam nai asamüh eppe; lühaiu nai nung asam hao sopkiu-e. 10Tititenai asaotsün pungkü nou epji, naiuso sauüh yamji apaüh epji; naiuso sauüh haiuji nung apa hao sopkiu-e. 11Asam ongko po tsaküh apa thsoüh themtsai tsak saonai, apa hao lung tsak kiuao sau noin? Tsüdekünai ngou tsak saonai, apaüh ngou liko pao tsak kiu-e süne? 12Tsüdekünai apaüh waioli tsak saonai, apa hao mekhakhanio tsak kiu-e süne? 13Naito asam tsümei lüko asam thsoso hao paopei amei kiuao ngenaito, asam Po aün ainou apa tü saotsünso hao Asio Onthso tsükiukü titi noi-e!”

Yisu naiuso Belzebub

(Mat 12:22-30; Mrk 3:20-27)

14Apaüh leijep tsak ainou angei onthso komankü noiküla, tilai angei onthso nou khuwan leijep nou ngio singiojikan, nungko hoi nou ngawan. 15Lüko ngüso ongko ajantsoüh ngiom, “Angei onthso nokpao Belzebub nou angei onthso komanji.”

16Amaohaiüh apa lilukü aün ainou ii tsak sao. 17Lüko ngüso mongyang ngekü Yisuüh ngüso tü ngiom, “Nokshing sübao meshen mongko janpekji nung aluthe iulaji, naiuso tsammong tsakko ajanpek sungnai nung loianji. 18Biya nokshing lüko meshen nokshing mongko janpek naito apa nokshing titi tsa-e? Tititenai ngü Belzebub nou angei onthso komanji ta asamüh ngioji. 19Nungti ngü ngüso koman naito, asahoi nousoüh ngüso titi komanji? Asahoi nouso chija nou asam atsüotsüde ta tsangsheikiuji! 20Lüko ngo Goa nou angei onthso nouso koman naito, Goa nokshing asam dongai shikü noin.

21“Tilai oukong khaiunia nou sahsilai thapungkü taiukü apa tsam jimji, apa jengtsaiu apem tsümokü noin. 22Lüko tilai oukong khaiunia tsaküh apa thalouji naiuso shiolouji, apaüh Apaou nou monglamtsün dun apem kanlükhunji naiuso apaüh ti kaoloum nung janpekji.

23“Sau ngüko tsüha apa jü thako noin, naiuso sauüh ngüko aikü tsükamshi apaüh lopengji.

Angei Onthso Laokü Shiji

(Mat 12:43-45)

24“Tilai khaiunia tsak ainou angei onthso sungji, shioalu yamkü gohwai thsatkü khuji, naiuso tilai apa shioaluao titso tsüepji apaüh ngioji, ‘Jü tsam sübao ainou ngo shin, nungai laokü khushiko.’ 25Tilai apa shiji, apaüh nung kaiyankü aleng meikü iulakü epji. 26Nungai apaüh khuküta apa tü phopkü tsaokü amao onthso chinyat nialoukü napkü, nungai noiji, naiuso nung khaiunia aya akuo nouko aphi akuo tekkü tsümeikü iulaji.”

Atsüoting Amongling

27Tilai apaüh nung chite, hoi ainou nyiuhai tsaküh apa tü ngiom, “Noi sübaoüh ni kan, naiuso nyao sübao ni chep nung titengkü thaiumei!”

28Lüko apaüh ngiom, “Ah, lüko sauhaiüh Goa ngio luji küta chhiji ngüso tekkü thaiumei!”

Athanga Tsak Thaiutha Saotsün

(Mat 12:28-42)

29Tilai apa dongai hoi nou kamshin, apaüh chiteao yachu, “Nung vetao tsümeikün vetao! naiuso ii nou yamji, lüko Yona ii tü simkü nung vetao hao ti ii tsükiu-e. 30Titili Ninevi hai thaiutha Yona ii tsak iulan, nungti Khaiunia Thso lüko nung vetao thaiutha ii tsak iula-e. 31Nung ajekhaiu nouko Sheba menyiu nokpao nou nung vetao khaiunia nousoko mikhem nai tsa-e, naiuso ngüso tsütsüokü iula-i-e, tititenai apaüh apa shingkhannio ainou Solomon mongyang angluao shin. Ngo asam tü ngio-e, Solomon tü songkü tsak nungai noin. 32Ninevi haiüh mikhem nai nung vetao nouko tsa-e, naiuso nung vetao tsütsüokü iula-i-e, tititenai Yonaüh chim nai ngüso mong phokle. Ngo asam tü ngio-e, Yona tü songkü tsak nungai noin!

Pem Nou Tü Awon

(Mat 5:15; 6:22-23)

33“Tson sunlutküta khaiunia sauüh tsangkü tsütaiuji tsüdekünai kim nou kappokkü tsütaiuji; lüko tsamai naptsünsoüh awon epao thaiutha tson taiutsün nai taiuji. 34Aniovei apim thaiutha tson noin. Tilai aniovei meikü noi-e, apim chikü awon nou mian-e. 35Nungtiphe asam da noitsün awon nung anyakhem tsüde ta tsangsheikü lüthe. 36Asam pem awon nou miankü noi naito, anyakhem haoson ti tsühakü apemai awon noi-e, tson nou ni hao awonkiutsünli awone.”

Yisuüh Farisi naiuso Ngiokhem Tsandetsünso Aphio Kiuji

(Mat 23:1-36; Mrk 12:38-40)

37Tilai apaüh ngiochite nou khem, Farisihai tsaküh apako heshiuao apa tü jon, naiuso apa napkü heshiuao moknoi. 38Farisihoi nou tilai Yisuüh chihe khako pha tsütsaowan ta ngela, ngüso lekkat. 39Yisuüh apa tü ngiom, “Lo asam Farisihoi nou thengkam si chiu achiai haiuwanji, lüko asam akheiai mewop naiuso tsümeikü nou miankü noin. 40Asam maingahoi! A-chi shantsün Goa noulu akhei lüko tsüshan süne? 41Lüko asam thengkam naiuso chiu mongai ti noin nung tsosiluhai hao lükiu, naito apem asam thaiutha yanthsüokü noi-e.

42“Asam Farisihoi thaiutha inyate! Tititenai asamüh laoshang naiuso anganyamtsün naiuso amao kiansinga pungkü ekve chaithio kiuji, lüko ngiotsüo mikhem naiuso Goa atsüojin nou asamüh wanji. Lüko nungso asamüh chhiao noiküla, küta amao lüko tsüchhikü tsüwanao noila.

43“Asam Farisihoi thaiutha inyate! Tititenai asamüh Yihuda kamthang nai asongting noikham aiuji, naiuso chaikam nai salam aiuji. 44Asam thaiutha inyate! Tititenai asam etamthang ta ii tsünoikü khaiuniahoi nou tsüngekü nung chiai tsakeitsün khekkü.”

45Ngiokhem tsandetsün tsaküh apa tü ngiom, “Atsandetsün, nung chitetsün shioko ni sam lüko lomiamji!”

46Apaüh ngiom, “Asam Ngiokhem tsandetsünso thaiutha inyate! Tititenai asamüh akanao tsüshiokün thsale khaiunia nouso hao kan-iji, lüko asamüh to phakha nou lüko tsüthantanji. 47Asam thaiutha inyate! Tititenai asamüh asam paosiposoüh luattsün Goa E-po nouso etam shanji. 48Asamüh asam chija asam paosiposoüh ti chhin nung tsangsheikiuji, ngüsoüh E-pohoi luat, naiuso asamüh ngüso etam shanji. 49Nung shioko Goa mongthat mongsai nou ngioji, ‘Ngo ngüso dongai E-po naiuso hongthon nouso honge; ngüsoüh ajantso luate, naiuso ajantso jeiat-i-e.’ 50Nungtiphe nung vetao khaiunia nouso apem hao Goa E-po nouso goumchi apung anyim nai yakü luattsün thaiutha angja kiu-e. 51Abel luattsün ainou Zekaria sau AsioThang naiuso chaithio taiutsün jetko luat nung saokü thaiutha kiu-e. Ah, ngo asam tü ngio-e, nungso chikü thaiutha nung vetao nou tü sao-e.”

52“Asam Ngiokhem tsandetsünso thaiutha inyate! Tititenai asamüh mongyang koukhan soptsün taim; lüko asam chijaüh tsünap, naiuso sauhai anapao koweji nungso lüko tsünap-iji!”

53Tilai Yisu nung ainou shin, Ngiokhem tsandetsünso naiuso Farisihoi nou apako thatü mongmatao yachu, naiuso apa hao ngio piakü chite-ikü 54apaüh chitetsün ainou tso aphio thalouao yamkü noiküla.

Currently Selected:

LUK 11: KHIABSI

Highlight

Copy