Zakari 6
6
Wityenm Vizyon: Kat Kales
1Mon ti ganny en lot vizyon. Mon ti war kat kales pe vini sorti ant de montanny; sa de montanny ti an bronz.
2Bann seval kouler rouz ti pe trenn premye kales; dezyenm kales ti pe ganny trennen par bann seval nwanr.
3Trwazyenm kales ti pe ganny trennen par bann seval blan, e katriyenm kales par bann seval avek tas rouz.
4Mon ti demann lanz ki ti'n koz avek mwan, “Kisisa tousala mon senyer?”
5Lanz ti reponn mwan, “Sa i kat divan dan lesyel ki sorti dan prezans SENYER later antye.
6Kales ki bann seval nwanr ti pe trennen, ti pe al dan direksyon Nor pei. Sa enn ki ti'n ganny trennen par bann seval blan ti swiv e al dan direksyon Was pei; sa enn ki pe ganny trennen par bann seval taste, ti pe al dan direksyon Sid.”
7Bann seval rouz ti vini; zot ti prese pour al fer letour later. Alor, Senyer ti dir zot, “Ale! Al fer patrol lo later!” Sanmenm ki zot ti fer.
8Apre sa, lanz ti kriy avek mwan: Gete! Bann seval ki pe al dan Nor pei in met mon lespri anpe dan sa rezyon.
Lord pour Kouronn Zozye
9SENYER ti koz avek mwan. I ti dir mwan: 10Ranmas bann donasyon ki bann deporte Heldai, Tobiya ek Yedaya in fer. Zot fek arive, sorti Babilonn. Ozordi menm, ou ava al kot Zozye, garson Sofoni. 11Pran larzan ek lor e fer en kouronn ki ou ava met lo latet Gran-Pret Zozye, garson Yosadak.
12Ou ava dir li: La sa ki SENYER liniver i deklare: La en zonm ki apel Bourzon#6.12 Portre en plant ki pe pouse. Kot i ete i pou prodwir lavi e i pou konstri tanp SENYER.
13Annefe, li menm ki pou konstri tanp SENYER. I pou resevwar kouronn rwayal. I pou asiz lo son tronn pour gouvern lepep. En pret pou asiz lo tronn akote li. Pou annan lantant ek larmoni.
14Kouronn ava servi koman en memoryal dan tanp SENYER, an souvenir Heldai, Tobiya ek Yedaya. I pou osi rapel labonte garson Sofoni.
15Dimoun ki reste lwen, pou vin ede dan konstriksyon tanp SENYER. Konmsa, ou ava konnen ki SENYER liniver ki'n anvoy mwan kot zot. Tousala pou arive si ou vreman obei SENYER ou Bondye.
Currently Selected:
Zakari 6: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
