Zakari 7
7
Senyer I Kondann Zenn ki pa Senser
1Dan katriyenm lannen renny lerwa Dariis, SENYER ti koz avek Zakari. Sa ti dan katriyenm zour, nevyenm mwan ki apel Kislev. 2Bann zabitan Betel ti'n anvoy Sareser avek Regenm-melek ek zot bann zonm pour esey kalme SENYER.
3Avek bann pret ki servi dan tanp SENYER liniver e avek bann profet, zot ti poz sa kestyon: Eski mon bezwen kontinyen plere e fer en zenn dan senkyenm mwan, parey mon'n fer pandan plizyer lannen?
4Alor, SENYER liniver ti koz avek mwan. I ti dir mwan:
5Dir avek lepep pei antye e avek bann pret. Kan zot ti fer en zenn, kan zot ti plere lo senkyenm ek setyenm mwan pandan sa 70 an, eski pour mwan ki zot ti pe fer sa zenn? 6Kan zot ti manze e bwar, pa zot ti pe manze e bwar pour zot prop plezir? 7Pa sanmenm sa mesaz ki SENYER ti fer konnen par lentermedyer son bann ansyen profet. Dan sa letan bann zabitan Zerizalenm ti dan lape e latrankilite avek bann lavil dan zalantour, e Negev ek Sefela ti annan zabitan.
Legzil I Rezilta Dezobeisans
8SENYER ti koz avek Zakari. I ti dir li:
9La sa ki SENYER liniver i deklare: Rann bann vre zizman; pratik labonte ek konpasyon antre zot. 10Pa eksplwat bann vev, bann orfelen, bann etranze oubyen bann pov. Pa mazin fer ditor kanmarad.
11Me zot ti refize ekoute. Zot ti tourn ledo e bous zot zorey pour zot pa tande. 12Zot ti andirsi zot leker parey granit, pour zot pa ekout lalwa e bann parol ki SENYER liniver ti anvoye par son souf, par lentermedyer bann ansyen profet. Sa ti fer SENYER liniver pran en gran lakoler.
13La sa ki SENYER liniver i deklare: Parey zot pa ti ekout mwan kan mon ti apel zot, mwan osi, mon pou refize reponn zot kan zot ava apel mwan.
14Mon'n dispers zot parmi bann nasyon ki zot pa ti konnen. Pei ki zot ti'n kit deryer, ti ganny devaste; personn pa ti pas par la. En pei kot ti gou viv, ti'n vin en dezer.
Currently Selected:
Zakari 7: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
