Zakari 5
5
Sizyenm Vizyon: Liv Malediksyon
1Mon ti war ankor en vizyon: En roulo ki ti pe anvole.
2Lanz ti demann mwan, “Ki ou war?”
Mon ti reponn, “Mon war en roulo ki pe anvole. I nef met longer e kat met senkant larzer.”
3Alor, i ti dir mwan, “Sa i malediksyon ki pe fann partou dan pei. Lo en kote in ekri ki tou voler pour ganny sase; lo lot kote, ki tou dimoun ki fer fo serman pou ganny eliminen.”
4La sa ki SENYER liniver i deklare:
Mon'n lans sa malediksyon;
i pou antre dan lakaz sa voler
e dan lakaz sa enn ki'n fer
fo serman lo mon non.
I pou reste dan sa lakaz e detri tou;
menm son bann poto ek son bann ros.
Setyenm Vizyon: En Fanm dan Pannyen
5Apre sa, lanz ki ti'n koz avek mwan ti vin dir mwan, “Lev ou lizye! Get sa ki pe vini!”
6Mon ti demande, “Kisisa?”
I ti reponn mwan, “Sa i en pannyen ki pe avanse. I kontenir zot pese dan pei antye.”
7Alor, en kouvertir diplon ti ganny leve; en fanm ti pe asiz dan pannyen.
8Lanz ti dir, “Sa i en mesanste.” Alor, i ti pous sa fanm dan fon pannyen e zet sa kouvertir diplon lo sa pannyen.
9Mon ti ganny en lot vizyon. Mon ti war de fanm pe avanse. Divan ti pe soufle dan zot lezel ki ti parey lezel en pelikan. Zot ti soulev sa pannyen ant later ek lesyel.
10Alor, mon ti demann avek sa lanz ki ti'n koz avek mwan, “Kote zot pe anmenn sa pannyen?”
11I ti reponn, “Dan pei Babilonn, kot en sanktyer ava ganny konstri pour li. Kan sa sanktyer ava'n pare, zot ava plas sa pannyen lo son pyedestal.”
Currently Selected:
Zakari 5: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
