Romen Lentrodiksyon
Lentrodiksyon
Detrwa lannen apre lanmor Zezi-Kri, bann kretyen Zwif, tel ki Akila ek Prisil (Akt 18.2), ti'n konmans pres Levanzil dan Ronm, kapital lanpir Romen. Alor, sa rezyon ti deza annan en kominote krwayan, kan Pol ti pe prese dan Lasiri, dan Lazi Miner (konmela Latirki) e dan Lagres.
Senyer Zezi-Kri ti'n donn Pol responsabilite pour al anons Bonn Nouvel dan lemonn antye. Se pour sa rezon ki Pol pa ti oule al zis Ronm, me osi Lespany. Nou pa konnen si i ti reisi realiz sa dernyen proze, me pour prepar son vwayaz Ronm, i ti ekri sa let: Pour zot tou ki Ronm (1.7), setadir, pour bann krwayan sa lavil; en group ti pe deza rasanble kot Prisil ek Akila (16.3-5).
Pol i profite pour eksplik bann krwayan sa landrwa, ki mannyer i konpran son rol misyonner anver bann non-Zwif.
Pol i prezant son mesaz dan en fason pli konplet. Bonn Nouvel koman en pwisans Bondye pour sov tou dimoun ki krwar, premyerman bann Zwif, me osi bann non-Zwif (1.16).
Problenm relasyon ant Zwif ek non-Zwif. Sirtou lo kestyon latitid ki bann non-Zwif kretyen i devre adopte konsernan lalwa Zwif. I ti zwe en gran rol pour bann premye kretyen e la nou retrouv sa dan serten lezot let Pol, tel ki Let pour bann Galat. Isi, Pol i afirmen direkteman ki Levanzil ki i pe prese, i pour tou zonm lo later, san eksepsyon (1.16). Answit, i eksplike ki mannyer Bondye i sov dimoun ki annan konfyans dan li (1.18–8.39).
Apre, i abord problenm ki serten Zwif i refize aksepte Zezi. I afirmen ki sa pa pou met lobstak dan plan Bondye. Zezi-Kri pou annan dernyen mo (sapit 9–11). Pour lemoman, labonte ki Bondye i montre vizavi bann non-Zwif, i devre ganny enterprete koman lapel pour viv en lavi vreman nouvo pour li (12.1–15.13).
Koman konklizyon, Pol i anons son proze vwayaz pour al Ronm e i termin son let avek bann salitasyon personnel (15.14–16.27).
Tou sa ki pe rod en bon leksplikasyon konsernan delivrans ki Bondye i ofer tou zonm par Zezi-Kri, lektir sa let i ava fer zot osi emerveye par grander plan Bondye (11.33-36). Anmenmtan, zot ava ganny ankouraze pour rann Bondye sa vre ladorasyon ki i merite.
Currently Selected:
Romen Lentrodiksyon: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.