Romen 1

Konpliman

1Sa let i sorti kot Pol, serviter Zezi-Kri, ki'n ganny apele pour vin zapot, e ki'n ganny swazir par Bondye pour anons son Bonn Nouvel. 2Lontan davans dan Lekritir, Bondye ti'n promet sa Bonn Nouvel par lentermedyer son bann profet#1.2 War Eza 52.7-8; 61.1.. 3Sa i konsern son Garson Zezi-Kri, nou Senyer. Koman en zonm, i ti desandan lerwa David#1.3 War Mat 1.1.. 4Me dapre Lespri Sen, i'n ganny manifeste koman Garson Bondye#1.4 War Ps 2.7. avek pwisans, kan i ti resisite. 5Par li, nou'n resevwar lagras ek misyon koman zapot pour anmenn bann nasyon krwar dan li e obeir li. 6Zot osi, zot form parti sa bann dimoun ki'n resevwar lapel Zezi-Kri.

7Mon ekri zot zabitan Ronm, zot tou ki Bondye i kontan e ki i'n swazir pour viv pour li: Mon demande ki Bondye nou Papa, e Senyer Zezi-Kri i akord zot son lagras ek son lape.

Lapriyer Remersiman

8Avan tou, mon remersye Bondye, par Zezi-Kri, pour zot tou, akoz lemonn antye i koz lo zot lafwa. 9Bondye ki mon servi avek tou mon leker an anonsan Bonn Nouvel son Garson, i temwen ki tou sa ki mon pe dir i vre: I konnen ki mon touzour mazin zot 10dan mon lapriyer. Mon demann Bondye ki si i son lavolonte, mon ava anfen kapab vin kot zot. 11Annefe, mon annan en gran dezir war zot pour donn zot en don Lespri Sen, ki pour rann zot for. 12Anplis, mon ti ava kontan prezan parmi zot, pour nou ankouraz kanmarad: Mwan par zot lafwa e zot par mon lafwa.

13Mon bann frer ek ser! Mon oule ki zot konnen ki mon'n souvan fer proze pour vin war zot#1.13 War Akt 19.21.. Me ziska prezan, mon'n touzour ganny en lanpesman.

14Mon konsider li mon devwar pour vizit bann zans sivilize koman bann ki pa sivilize, bann dimoun enstri, koman bann inyoran. 15Pour sa menm rezon ki mon annan sa gran dezir vin anons Bonn Nouvel avek zot ki reste Ronm.

Pwisans Levanzil

16Mon pa onte pour anons Bonn Nouvel. Annefe, i en pwisans ki Bondye i servi pour sov tou dimoun ki krwar: Dabor bann Zwif, answit bann non-Zwif. 17Annefe, Bonn Nouvel i revele koman Bondye i rann bann imen zis devan li: Sa i selman par lafwa depi konmansman ziska lafen, parey Lekritir i deklare: Sa enn ki zis, pou viv par lafwa#1.17 War Hab 2.4..

Lemonn I Koupab

18Depi lesyel, Bondye i montre son lakoler kont tou pese e tou move aksyon ki zonm i fer lo later. Par zot move aksyon, zonm i anpes laverite azir. 19Pourtan, sa ki nou kapab konnen lo Bondye i kler pour tou dimoun: Bondye li menm ki'n fer zot konnen klerman. 20Annefe, depi ki Bondye in kree lemonn, nou war pwisans eternel ek divinite Bondye; nou disern li atraver son bann mervey. Alor, zonm i san leskiz. 21Zot konn Bondye, me zot napa okenn respe pour li; zot pa ni menm remersye li koman i fodre. O kontrer zot in vin konpletman fou, e zot lespri san disernman i dan teneb. 22Zot pretann ki zot savan, me zot in vin plito fou. 23Olye ador Bondye dan son mazeste ki egziste eternelman, zot ador bann stati ki reprezant en zonm ki mortel, zwazo, zannimo kat lapat ek reptil.

24Pour sa rezon, Bondye in abandonn zot dan zot bann aksyon enpir, dapre move dezir zot leker. Alor, ant zot, zot sali zot prop lekor. 25Zot sanz laverite Bondye kont mansonz. Zot ador e servi kreatir olye ador Kreater ki merit ganny loue pour touzour! Amenn!

26Pour sa rezon, Bondye in abandonn zot dan zot bann pasyon ki fer onte. Menm zot fanm i sanz zot relasyon natirel pour bann relasyon kont natir.

27Pareyman, zonm osi i'n abandonn relasyon natirel avek en fanm; zot anflanmen dan lanvi seksyel ant zot. Zonm i pratik ant zonm bann aksyon ki fer onte. La rezon akoz zot ganny dan zot lekor, pinisyon ki zot merite pour zot forfe.

28Ensi, akoz zot in refize rekonnet Bondye, Bondye in les zot ale avek zot lespri deregle dan bann pratik onte. 29Zot ranpli avek toudsort mesanste, move dezir, vis, zalouzi, krim, dispit, riz, malis. Zot lans bann fo lakizasyon. 30Zot dir dimal lo kanmarad. Zot bann lennmi Bondye, ensolan, orgeye, vantar. Zot touzour pare pour envant bann nouvo fason pour fer ditor. Zot rebel anver zot paran. 31Zot napa disernman, zot pa tenir zot promes. Zot leker i dir e san pitye anver kanmarad. 32Zot konn byen zizman Bondye: Bann ki viv en tel lavi, zot merit lanmor. Pourtan, zot kontinyen komet sa bann aksyon. Anplis ki sa, zot aprouv bann ki komet sa bann aksyon.

Currently Selected:

Romen 1: BSK

Highlight

Copy