Popular Bible Verses from Romen 1

Share

Mon pa onte pour anons Bonn Nouvel. Annefe, i en pwisans ki Bondye i servi pour sov tou dimoun ki krwar: Dabor bann Zwif, answit bann non-Zwif.

Annefe, Bonn Nouvel i revele koman Bondye i rann bann imen zis devan li: Sa i selman par lafwa depi konmansman ziska lafen, parey Lekritir i deklare: Sa enn ki zis, pou viv par lafwa.

Annefe, depi ki Bondye in kree lemonn, nou war pwisans eternel ek divinite Bondye; nou disern li atraver son bann mervey. Alor, zonm i san leskiz.

Zot konn Bondye, me zot napa okenn respe pour li; zot pa ni menm remersye li koman i fodre. O kontrer zot in vin konpletman fou, e zot lespri san disernman i dan teneb.

Zot sanz laverite Bondye kont mansonz. Zot ador e servi kreatir olye ador Kreater ki merit ganny loue pour touzour! Amenn!

Depi lesyel, Bondye i montre son lakoler kont tou pese e tou move aksyon ki zonm i fer lo later. Par zot move aksyon, zonm i anpes laverite azir.

Pour sa rezon, Bondye in abandonn zot dan zot bann pasyon ki fer onte. Menm zot fanm i sanz zot relasyon natirel pour bann relasyon kont natir. Pareyman, zonm osi i'n abandonn relasyon natirel avek en fanm; zot anflanmen dan lanvi seksyel ant zot. Zonm i pratik ant zonm bann aksyon ki fer onte. La rezon akoz zot ganny dan zot lekor, pinisyon ki zot merite pour zot forfe. Ensi, akoz zot in refize rekonnet Bondye, Bondye in les zot ale avek zot lespri deregle dan bann pratik onte.

Zot pretann ki zot savan, me zot in vin plito fou. Olye ador Bondye dan son mazeste ki egziste eternelman, zot ador bann stati ki reprezant en zonm ki mortel, zwazo, zannimo kat lapat ek reptil.