Akt de Zapot 28

Pol dan Zil Malt

1Apre ki nou ti'n ganny sove, nou ti aprann ki sa zil ti apel Malt. 2Bann zabitan ti montre zot tre bon anver nou. Akoz lapli ti pe tonbe, e ki ti fer fre, zot ti alim en dife e swet nou byenveni.

3Pol ti'n ranmas en pake brans dibwa mor ki i ti pe met lo dife, kan en serpan ti sorti avek lasaler e kol lo son lanmen. 4Kan bann zabitan ti war sa serpan anpandan avek son lanmen, zot ti dir, “Sirman sa zonm i en kriminel. Menm si i'n sap lanmer, lazistis Bondye pa'n permet li viv.”

5Me Pol ti zis sekwe sa serpan dan dife, san sibir okenn dimal. 6Zot ti espere war li anfle oubyen tonbe mor en sel kou. Me zot ti esper lontan, san war nanryen mal arive avek Pol. Alor, zot ti sanz zot lide e dir ki i ti en bondye.

7Ti annan dan zalantour, en propriyete ki ti pour sef zil ki ti apel Pibliis. I ti byen resevwar nou se li pandan trwa zour. 8Papa Pibliis ti malad avek lafyev ek disantri. Pol ti vizit li, priy pour li, enpoz lanmen lo li e geri li.

9Kan zot ti antann sa ki ti'n arive, dimoun ti anmenn zot bann malad. Zot osi, zot ti geri. 10Zot ti fer nou gran loner e kan nou bato ti kite, zot ti fourni nou avek tou provizyon ki nou ti bezwen.

Pol I Ariv Ronm

11Trwa mwan plitar, nou ti repran lanmer lo en bato sorti Aleksandri ki ti apel Dioskires e ki ti'n pas liver dan sa zil. 12Nou ti ariv Sirakiz, kot nou ti reste trwa zour. 13Nou ti swiv lakot ziska Regio. Lannmen, vandsid ti konmans soufle. Son dezyenm zour, nou ti ariv Pouzol. 14Dan sa lavil, nou ti zwenn bann frer ki ti envit nou pour reste set zour avek zot. Finalman, nou ti ariv Ronm. 15Bann frer dan lavil ti'n ganny nou nouvel e zot ti vin ziska Bazar Apiyis ek Trwa Tavern. Kan Pol ti war zot, i ti remersye Bondye e repran kouraz.

Pol an Ronm

16Kan nou ti ariv Ronm, Pol ti ganny permisyon pour reste apar, dan en lakaz prive avek en solda pour vey li.

17Trwa zour plitar, Pol ti envit bann sef Zwif ki ti reste Ronm. Ler zot ti'n rasanble, Pol ti dir zot, “Mon bann frer! Menm si mon pa'n fer nanryen kont nou pep, ni kont bann koutim nou bann zanset, mon ti ganny arete Zerizalenm e ganny livre dan lanmen bann Romen. 18Apre ki zot ti'n kestyonn mwan, zot ti oule larg mwan, akoz zot pa ti trouv okenn rezon pour kondann mwan anmor. 19Me bann Zwif ti opoze, e mon ti forse fer rapel devan Sezar. Sepandan, mon ti napa okenn lentansyon port plent kont mon nasyon#28.19 War 25.11.. 20Pour sa rezon ki mon'n demann pour war zot e koz avek zot. Se akoz lespwar pep Izrael ki mon dan sa lasenn.”

21Zot ti reponn li, “Nou pa'n ganny okenn let lo ou size sorti Zide. Napa personn parmi bann frer ki sorti laba ki'n vin fer okenn rapor oubyen koz dimal kont ou. 22Me nou ti anvi konn ou lopinyon, akoz partou, bokou dimoun pe koz kont sa group ki ou ladan.”

23Zot ti fikse en randevou avek Pol. Sa zour, zot ti pli nonbre. Depi bomaten ziska aswar, Pol ti eksplike e anons zot Rwayonm Bondye. I ti konvenk zot konsernan Zezi, atraver Lalwa Moiz ek liv bann profet. 24I annan ki ti aksepte sa ki i ti pe dir, me ti annan ki pa ti krwar. 25Zot pa ti tonm dakor. Kan zot ti pe kite pour ale, Pol ti zis dir zot, “Lespri Sen ti annan rezon kan i ti dir avek zot zanset par lentermedyer profet Ezai! 26Annefe, i ti deklare:

Al kot sa pep e dir zot:

Zot pou tande,

me zot pa pou konpran.

Zot pou gete,

me zot pa pou war.

27Leker sa pep in vin ensansib.

Zot in bous zot zorey,

e zot in ferm zot lizye,

pour zot lizye pa war,

pour zot zorey pa tande,

e pour zot leker pa konpran,

pour ki zot pa retourn kot mwan

pour mwan geri zot#28.27 Eza 6.9-10..

28Alor mon oule ki zot konnen ki sa mesaz delivrans Bondye, i'n ganny anvoye kot bann non-Zwif. Zot, zot ava ekoute!”

29Kan Pol ti'n fini dir sa, bann Zwif, ti ale e en gro diskisyon ti leve ant zot#28.29 Sa verse i manke dan plizyer ansyen maniskri..

30Pol ti reste pandan 2 an dan sa lakaz ki i ti'n lwe. I ti resevwar tou bann ki ti vin war li. 31I ti proklanm Rwayonm Bondye e ansennyen avek lasirans e libreman, tou sa ki konsern Senyer Zezi-Kri.

Currently Selected:

Akt de Zapot 28: BSK

Highlight

Copy