Akt de Zapot 27

Vwayaz Pol pour Ronm

1Kan zot ti'n deside ki nou pou al Itali par bato, zot ti remet Pol ek detrwa lezot prizonnyen dan lanmen en zofisye ki ti apel Zilyis, en kaptenn dan reziman Romen ki ti apel Reziman Lanperer. 2Nou ti anbark lo en bato ki sorti Adramit, e ki ti pe al dan bann por provens Lazi. Avek nou ti annan Aristark, en Masedonyen sorti Tesalonik. 3Lannmen, nou ti ariv Sidon. Zilyis ti tret Pol avek respe. I ti permet li al war son bann zanmi pour li kapab ganny tou sa ki i ti bezwen.

4Nou ti kit sa landrwa e fer lakot, maske par zil Sip, akoz nou ti pe navig avek divan kontrer. 5Nou ti travers lanmer pre avek Silisi ek Panfili, e ariv Mira, dan Lisi. 6La, sef gard Romen ti trouv en bato ki sorti Aleksandri ki pe al Itali. I ti fer nou anbark lo la.

7Nou ti navig lantman pandan plizyer zour e, avek bokou difikilte, nou ti ariv devan lavil Snid. Divan ti kontrer e nou pa ti kapab kontiny dan sa direksyon. Alor nou ti pas par kap Salmone dan kote maske zil Kret. 8Nou ti reste pre avek lakot e avek bokou difikilte, nou ti ariv dan sa landrwa ki ti apel Bon-Por, pre avek lavil Lase.

9Nou ti'n perdi bokou letan. I ti'n vin danzere pour kontinyen navige. Lafet Zwif pour pardon pese ti'n deza pase#27.9 War Lev 16.29-34.. Alor, Pol ti donn zot sa konsey, 10“Mon bann zanmi! Mon war ki sa vwayaz pou danzere; bato avek son kargezon pou ganny bokou andomaze. Anplis ki sa, nou menm, nou riske perdi lavi.”

11Me zofisye Romen ti annan plis konfyans dan lopinyon kaptenn ek propriyeter bato ki dan parol Pol. 12Anplis, koman sa por pa ti bon pour pas liver, laplipar bann zonm abor, ti an faver kit sa por pour al Feniks si posib. Feniks ti en por dan zil Kret, ki vir lo kote Sid-Was ek Nor-Was. Zot ti annan lide pas liver laba.

Dan Tanpet

13Koman vandsid pa ti pe soufle for, zot ti mazinen ki zot ti ava kapab realiz zot plan. Zot ti lev lank e navig lantman pre avek lakot Kret. 14Me pa ti tarde pour divan Norde, en divan tanpet, soufle avek lafors depi bann montanny zil Kret 15e trenn bato. Akoz i ti enposib pour gard bato dan divan, nou ti bezwen les nou ganny drive. 16Nou ti pas lo kote Sid en pti zil ki apel Koda, ki ti maske nou en pe. Alor, avek bokou difikilte, nou ti arive kontrol nou kannot sovtaz. 17Bann maren ti is li abor e anmar li avek lakord otour bato. Zot ti fer desann lavwal e les bato drive. Annefe, zot ti per ki zot ti ava ganny trennen e mont lo en ban disab lo lakot Libi. 18Tanpet ti kontinyen sekwe nou telman for, ki lannmen, bann maren ti konmans zet bann kargezon dan lanmer.

19Sirlannmen, avek zot prop lanmen, zot ti zet bann lekipman bato pardesi bor. 20Pandan plizyer zour, zot pa ti war ni soley, ni zetwal. Tanpet ti kontinyen soufle telman for, ki nou ti finalman perdi tou lespwar ganny sove.

21Nou pa ti'n manz nanryen depi plizyer zour. Alor, Pol ti debout devan zot. I ti dir, “Mon bann zanmi! Zot ti'n devre ekout mwan e pa kit zil Kret. Konmsa, nou ti ava'n evit sa kantite domaz ek pert. 22Me aprezan mon konsey zot pran kouraz, akoz personn parmi zot pa pou perdi lavi; zis sa bato ki pou perdi.

23Annefe, pandan lannwit, en lanz mon Bondye ki mon servi ti apros mwan. 24I ti dir mwan: Pol, pa per! Fodre ki ou konparet devan Sezar. Bondye dan son labonte, pou donn ou lavi avek tou sa ki pe navig avek ou.

25Alor, mon bann zanmi! Pran kouraz, akoz mon annan konfyans dan Bondye. Tou pou pas parey i'n dir mwan. 26Me nou pou bezwen eswe lo lakot en zil.”

27Ti'n ariv katorzyenm swar e tanpet ti pe kontinyen trenn nou lo lanmer Mediterane. Ver minwi, bann maren ti ganny lenpresyon ki nou ti pe apros later.

28Alor, zot ti sonde e zot ti ganny 20 bras fonder. En pti pe pli lwen zot ti sonde e zot ti ganny 15 bras fonder. 29Akoz zot ti per ki nou bato i tap en ros, zot ti zet kat lank par deryer bato e esper avek enpasyans pour lizour fer.

30Sepandan bann maren ti pe esey sove e abandonn bato. Alor, zot ti met kannot sovtaz dan delo e fer krwar ki zot ti pe al fikse lank avek devan bato. 31Pol ti dir avek sa zofisye larme ek bann solda, “Si sa bann maren pa reste abor, personn parmi zot pa pou annan en sans sove.”

32Alor bann solda ti koup lakord kannot e les li ale.

33Zis avan lizour, Pol ti sipliy zot tou pour manz keksoz, “Zot in reste 14 zour dan lenkyetid san manze. 34Alor, mon konsey zot manz enpe pour reste vivan. Personn parmi zot pa pou perdi menm en bren seve lo son latet.”

35Apre ki i ti'n dir sa, Pol ti pran dipen e remersye Bondye devan zot tou. I ti kase, e konmans manze. 36Zot tou, zot ti repran kouraz e zot ti manze. 37Ti annan an tou 276 nou abor. 38Apre ki tou dimoun ti'n manz ase, zot ti zet kargezon dible dan lanmer, pour fer bato pli leze.

Bato I Kraz an Morso

39Kan lizour ti fer, bann maren pa ti rekonnet sa landrwa kot zot bato ti'n drive, me zot ti apersevwar en labe ek en lans. Alor, zot ti deside pour fer koste bato si posib. 40Zot ti delarg bann lank e les zot koule dan lanmer. Anmenmtan, zot ti delarg bann lakord ki ti anmar zaviron ki ti servi koman gouvernay. Apre sa, zot ti is fok pour fer divan pous bato e anmenn li ver lans. 41Me ant de kouran, zot ti mont lo en ban disab e bato ti pri lanmenm. Devan bato ti kraz dan disab e pa ti kapab bouze. Laroul ti kraz lo son aryer e briz li an morso.

42Bann solda ti oule touy bann prizonnyen pour anpes zot sov alanaz. 43Me sa zofisye Romen ki ti oule sov Pol, ti anpes zot egzekit zot proze. I ti donn lord bann ki konn naze pour sot premye dan delo e al ater. 44Lezot ti devre swiv swa lo plans, swa lo debri bato. Konmsa ki tou dimoun ti ariv ater sen e sof.

Currently Selected:

Akt de Zapot 27: BSK

Highlight

Copy