Romen 10
10
1Mon Bann frer ek ser! Mon swete avek tou mon leker e mon demann Bondye pour bann Zwif, ki zot ganny sove. 2Mon kapab dir dan zot faver, ki zot devoue pour Bondye, me zot devouman pa ganny eklere par en vre konnesans. 3Dan zot linyorans lazistis Bondye, zot in esey rod fason pour etablir zot prop lazistis. Zot in refize soumet zot anba lazistis Bondye. 4Annefe, Kris i anmenn Lalwa Moiz ver son bit, pour ki tou dimoun ki krwar i ganny zistifye devan Bondye.
Tou I Kapab Ganny Sove
5Moiz in ekri ki en dimoun ki pratik lazistis baze lo Lalwa, pou viv par Lalwa#10.5 Lev 18.5.. 6Me la sa ki'n ganny dir konsernan lazistis par lafwa: Pa dir dan ou leker: Lekel ki pou mont dan lesyel? Setadir, pour fer Kris desann. 7Oubyen: Lekel ki pou desann dan labim? Setadir, pour fer Kris remonte parmi bann mor. 8Ki i dir alor? La sa ki i dir: Parol Bondye i pre avek ou, dan ou labous e dan ou leker.
Sanmenm mesaz lafwa ki nou pe prese#10.8 War Det 9.4; 30.12-14.. 9Si par ou labous, ou deklare devan tou dimoun ki Zezi i Senyer; si ou krwar dan ou leker ki Bondye in resisit li parmi bann mor, ou pou ganny sove. 10Annefe, kan nou krwar avek tou nou leker, nou ganny zistifye, e sa enn ki anons avek son labous i ganny sove.
11Annefe, Lekritir i deklare:
Sa enn ki krwar dan li,
pa pou dezapwente#10.11 Eza 28.16..
12Annefe, napa okenn distenksyon ant Zwif ek non-Zwif. Zot tou, zot annan menm Senyer ki devers son byenfe lo tou dimoun ki envok li.
13Annefe, parey Lekritir i deklare:
Sa bann ki envok Senyer
pou ganny sove#10.13 Zl 3.5..
14Me ki mannyer zot pou envok li, si zot pa krwar dan li? Ki mannyer zot pou krwar dan li, si zot pa'n antann koz lo li? Ki mannyer zot pou antann koz lo li, si personn pa anons li? 15Ki mannyer en dimoun pou anons li, si napa personn ki'n ganny anvoye? Parey Lekritir i deklare:
Pa i gou war arive
bann ki anons Bonn Nouvel#10.15 Eza 52.7.!
16Me pa tou dimoun ki'n aksepte Bonn Nouvel. Annefe, Ezai i dir:
Senyer! Lekel ki'n krwar nouvel
ki zot in antann nou anonse#10.16 Eza 53.1.?
17Ensi, lafwa i vin dapre ki nou ekout nouvel ki ganny proklanmen e sa nouvel, sa lanons parol Kris.
18Alor, mon demande: Eski bann Zwif pa'n antann sa nouvel? Mon dir, wi zot in tande. Lekritir i deklare:
Zot lavwa in rezonnen lo later antye,
e zot parol in fer letour lemonn#10.18 Ps 19.5..
19Mon demann ankor en fwa: Eski pep Izrael pa'n konpran? La sa ki Moiz i reponn an premye:
Mon pou fer ou zalou en pep
ki pa en vre nasyon.
Mon pou eksit ou lakoler
kont en nasyon fou#10.19 Det 32.21..
20Ezai li menm i oze dir:
Sa enn ki pa ti pe rod mwan,
in trouv mwan.
Mon'n revel mwan avek dimoun
ki pa ti demann mwan nanryen.
21Konsernan Izrael, i azoute:
Tou dilon lazournen mon'n ouver mon lanmen
avek en pep dezobeisan e rebel#10.21 Eza 65.1-2..
Currently Selected:
Romen 10: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
