Psonm 96
96
Bondye I Lerwa
1Later antye! Sant en nouvo kantik an loner SENYER!
2Sant an loner SENYER!
Loue son non.
Anons son delivrans zour apre zour.
3Proklanm son grander parmi tou bann nasyon;
rakont son bann mervey parmi tou bann pep.
4SENYER i gran; i merite ki nou loue li.
I formidab, plis ki tou lezot bondye.
5Tou bann bondye lezot pep i zis zidol.
Me SENYER in kree lesyel.
6Laglwar ek mazeste i antour li.
Son lafors ek son labote i ranpli son sanktyer.
7Pep ki lo later!
Rekonnet ki SENYER i gran.
Rekonnet laglwar ek lapwisans SENYER.
8Rekonnet laglwar ki non SENYER i merite.
Anmenn zot lofrann e antre dan lakour tanp.
9Prosternen devan SENYER
kan i manifeste son sentete.
Later antye! Tranble devan li.
10Al anons avek bann nasyon:
SENYER i Lerwa!
Lemonn i solid; i pa pou bouze.
SENYER i ziz bann pep avek drwatir.
11Lesyel! Rezoui.
Later! Selebre.
Lanmer avek tou sa ki ladan! Ronfle.
12Lakanpanny avek tou sa ki ladan! Rezoui.
Alor, bann pye dibwa lafore
ava sante avek lazwa
13devan SENYER, akoz i pe vini;
i pe vini pour ziz later.
I pou ziz lemonn dapre lazistis
e bann pep dan laverite.
Currently Selected:
Psonm 96: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
