Psonm 95
95
Kantik Louanz
1Vini! Annou sant nou lazwa pour SENYER.
Annou kriy nou lazwa
pour nou Ros protekter, nou Sover!
2Annou apros li avek rekonesans!
Annou kriy nou lazwa pour li
avek bann kantik louanz.
3SENYER i en gran Bondye;
i en gran Lerwa par lao tou bann bondye.
4I tenir bann profonder later dan son lanmen;
bann latet montanny i osi pour li.
5Lanmer ki i ti kree i osi pour li;
later ki i ti formen avek son lanmen i osi pour li.
6Vini! Annou ador li e prosternen devan li.
Annou met nou azenou
devan SENYER, nou Kreater.
7Akoz i nou Bondye,
nou, nou son pep ki i pran swen avek,
son bann mouton ki son lanmen i kondwir.
Ozordi, si zot ekout son lavwa,
8pa andirsi zot leker parey zot ti fer Meriba,
parey zot ti fer dan dezer Massa.
9Laba, zot zanset ti teste mwan,
menm si zot ti'n war tou sa ki mon ti'n fer.
10Sa zenerasyon in fer mwan degout zot pandan 40 an.
Mon ti dir: Zot en pep ki lespri in egare avek mwan.
Zot pa konn mon semen.
11Alor, dan mon lakoler, mon ti fer sa serman:
Zot pa pou antre dan mon repo.
Currently Selected:
Psonm 95: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
