Psonm 91
91
Bondye I nou Protekter
1Sa enn ki reste kot Bondye Treo,
e repoz anba proteksyon Bondye Toupwisan,
2i kapab dir avek SENYER:
Ou menm mon labri e mon fortres;
ou menm mon Bondye
dan ki mon'n met mon konfyans.
3I ava delivre ou kont latrap bann saser;
i ava geri ou kont lepidemi terib.
4I ava kouver ou anba son lezel;
ou ava ganny labri anba son bann plim.
Son fidelite ava en boukliye
e en zarm protekter pour ou.
5Nanryen pa pou fer ou per;
ni bann danze dan lannwit,
ni bann dart ki ganny anvole lizour,
6ni lepidemi ki rode dan fernwanr,
ni bann lepidemi ki tap dan gran zour.
7Mil i kapab tonbe akote ou,
dis mil lo ou kote drwat;
me nanryen pa pou ariv ou.
8Ou ava zis gete
e ou ava war pinisyon bann malfeter.
9Akoz ou'n pran SENYER
koman ou protekter;
ou'n swazir Bondye Treo
pour ou labri,
10napa okenn fles ki pou tous ou;
okenn maler pa pou apros kot ou lakour.
11Annefe, i ava donn lord son bann lanz
pour protez ou partou kot ou ale.
12Zot ava anmenn ou dan zot lanmen
pour ki ou pa konny ou lipye avek en ros.
13Ou pou mars lo lyon ek serpan,
ou pou kraz bann zenn lyon
ek bann viper anba ou lipye.
14Mon pou delivre sa enn ki kontan mwan.
Mon pou protez sa enn ki konn mon non.
15Kan i ava kriy ver mwan,
mon pou reponn li.
Dan son maler, mon pou la avek li;
mon pou sov li e fer li loner.
16Mon pou fer li viv lontan
e montre li,
ki mon son Sover.
Currently Selected:
Psonm 91: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
