Psonm 90
90
Frazilite Imen
Lapriyer Moiz.
1SENYER!
Depi touzour, ou nou labri.
2Avan ki ou ti kree bann montanny,
avan ki ou ti form later ek lemonn,
depi touzour e pour touzour, ou Bondye!
3Ou fer bann imen retourn dan lapousyer;
ou dir zot: Retourn kot ou sorti.
4Pour ou, mil an i pas konmsi yer,
oubyen parey en kourt letan dan lannwit.
5Ou balye zot parey en sonmey ki pase,
parey zerb ki pouse bomaten.
6Bomaten i fleri, i fini;
aswar, i fannen e i sek.
7Ou lakoler i detri nou.
Ou lakoler vyolan i fer nou tranble.
8Ou'n met nou bann fot devan ou.
Nou bann pese sekre
i ganny devwale devan ou lalimyer.
9Nou lavi i ganny rakoursi anba ou lakoler.
Nou lavi i fini parey en souf.
10Nou lavi i dir zis pour 70 an,
parfwa 80 an pour bann ki pli for;
me nou konn zis traka ek lapenn;
zot pas vit e nou anvole.
11Lekel ki kapab konn lafors ou lakoler?
Nou lafreyer i osi gran ki ou lakoler.
12Alor, fer nou konpran ki nou lavi i kourt,
pour ki nou leker i ranpli avek lasazes.
13Retournen SENYER! Ziska kan?
Pran pitye pour ou bann serviter.
14Ranpli nou avek ou fidelite depi bomaten,
pour ki nou ava zwaye e sante tou nou lavi.
15Pandan en kantite lannen ou'n pini nou.
Fer nou rezoui pour otan lannen e otan zour
ki nou'n pas dan maler.
16Fer ou bann serviter
war bann mervey ki ou'n akonpli
e nou bann zanfan ava dekouver ou laglwar.
17SENYER nou Bondye!
Devers ou benediksyon lo nou.
Fer prospere tou travay ki nou fer.
Wi! Fer prospere tou travay ki nou fer.
Currently Selected:
Psonm 90: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
