Filipyen 4
4
Rekomandasyon
1Mon bann frer e ser! Mon telman anvi revwar zot! Zot menm ki mon lazwa, mon kouronn laviktwar. Alor, mon bann zanmi! Reste ini, fidelman avek Senyer.
2Mon sipliy Evodi ek Sentis, pour zot dakor avek kanmarad, ini dan Senyer. 3E ou osi, mon fidel koleg travay, mon demann ou, ed sa bann fanm. Ansanm avek Kleman ek lezot koleg travay ki zot non in ekri dan liv lavi, zot in konbat avek mwan pour anons Bonn Nouvel.
4Reste touzour dan lazwa, ini avek Senyer. Mon repete: Reste dan lazwa.
5Montre zot bon anver tou dimoun. Senyer i pre pour retournen. 6Pa bezwen enkyet pour nanryen, me dan tou sirkonstans, dan lapriyer ek siplikasyon, avek en leker rekonesan, demann Bondye tou sa ki zot bezwen. 7Alor, lape Bondye ki depas tou disernman imen, ava gard zot leker ek zot lespri ini avek Zezi-Kri.
8Finalman, mon bann frer ek ser! Mon konsey zot, atas zot avek tou sa ki bon e ki merit ganny loue: Tou sa ki vre, respektab, zis, pir, agreab e onorab.
9Met an pratik sa ki zot in aprann e resevwar avek mwan, swa sa ki zot in antann mwan dir, oubyen sa ki zot in war mwan fer. Bondye, ki donn lape, ava avek zot.
Pol I Remersye bann Filipyen pour Zot Kado
10Mon'n ganny en gran lazwa ini avek Senyer, akoz zot in anfen kapab montre ankor enn fwa, zot lentere pour mwan. Mon pa oule dir ki zot pa ti pran ka avek mwan; me zot ti napa lokazyon pour montre. 11Mon pa pe dir sa akoz mon dan bezwen. Annefe, mon'n aprann kontant mwan avek sa ki mon annan. 12Mon konn viv dan lapovrete, osi byen ki dan labondans. Mon'n aprann kontant mwan partou dan tou sirkonstans, kan mon annan ase manze, oubyen kan mon lafen, dan labondans, koman dan lapovrete. 13Mon kapab fer fas avek tou difikilte gras a Kris ki donn mwan lafors. 14Sepandan, zot in byen fer pour pran par dan mon bann difikilte.
15Annefe, zot bann Filipyen, zot konn tre byen: Kan mon ti kit Masedwann, lepok ki nou ti'n fek konmans anons Bonn Nouvel, okenn lot Legliz pa ti ed mwan. Zot sel Legliz ki an solidarite, ti partaz tou avek mwan. 16Plizyer fwa, kan mon ti Tesalonik, alor ki mon ti dan bezwen, zot ti anvoy led pour mwan#4.16 War Akt 17.1; 2 Ko 11.9.. 17Sa pa vedir ki mon pe rod kado. Sa ki mon pe rode, se ki zot fer en benefis.
18Mon sertifye donk, ki mon ti ganny tou sa ki zot ti anvoy mwan; e sa ti plis ki sifizan. Aprezan ki Epafrodit in anmenn mwan zot bann kado, mon annan tou sa ki neseser. Sa bann kado i koman en sakrifis ki Bondye i aksepte e ki fer li plezir. 19Dan son larises, mon Bondye ava donn zot tou sa ki zot bezwen, par Zezi-Kri. 20Annou loue Bondye nou Papa pour touzour. Amenn.
Konpliman Final
21Fer konpliman tou bann manm zot kominote lo non Zezi-Kri. Bann frer ki avek mwan, i osi fer zot salanm. 22Tou bann krwayan ki isi, i anvoy konpliman, spesyalman bann ki dan servis lanperer.
23Mon demande ki lagras Senyer Zezi-Kri ava avek zot tou.
Currently Selected:
Filipyen 4: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
