Kolosyen Lentrodiksyon
Lentrodiksyon
Kolos ti en lavil dan Lazi Miner (ozordi Latirki), anviron 200 kilomet avek Efez. I sanble ki Pol pa ti'n deza vizit sa lavil. Enn bann koleg Pol, Epafras, ti li menm en Kolosyen, ki ti premye dimoun pour anmenn Bonn Nouvel laba (Kol 1.7; 4.12).
Pandan ki Pol ti dan prizon, petet Ronm, Epafras ti vin enform li konsernan en fo lansennyman ki ti pe ganny prese dan lavil Kolos. Bann Kolosyen ti pe ganny ansennyen ki pour konn Bondye e ganny sove, fodre ador en bann pwisans spirityel, soumet zot anba serten rit: Sirkonsizyon, obeisans bann regleman strik konsernan manze, bwar, etc. Osito ki Pol ti'n ganny sa bann lenformasyon lo sa sityasyon enkyetan, i ti ekri pour fer bann Kolosyen rapel ki delivrans Bondye ki ganny akorde par Zezi-Kri i sifi. I probab ki i ti anvoy son let par lentermedyer Tisik ek Onezim (4.7-9).
Apre salitasyon ek lapriyer rekonesans anver Bondye (1.1-14), Pol i fer resorti dan premye parti son let, ki souvrennte Kris i siperyer ki tou pwisans spirityel, e ki Kris i sel sef Legliz (1.15–2.3).
Dan dezyenm parti son let, Pol i met bann Kolosyen an gard kont bann lerer ki serten dimoun ti pe fannen kot zot (2.4-23).
Finalman, Pol i rapel bann laspe pratik dan sa nouvo lavi ini avek Kris, dan kominote kretyen li menm, dan lafanmir e dan lasosyete (3.1–4.6). Konklizyon sa let i anmenn detrwa mesaz personnel ek salitasyon ki'n ganny ekri avek son prop lanmen (4.7-18).
Bann fo doktrin i kapab sanz laform ek konteni dan en lepok a lot. Me i touzour annan an komen, sa tandans pour distrer bann kretyen dan lafwa ki zot annan dan en sel Kris. Pour sa rezon, Let Pol Pour Bann Kolosyen i reste en laktyalite. Annefe, i met lanfaz lo Kris koman sa enn ki liber nou avek tou form lesklavaz spirityel.
Currently Selected:
Kolosyen Lentrodiksyon: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.