Mark 14

Konplo kont Zezi

(Mat 26.1-5; Lk 22.1-2; Zn 11.45-53)

1De zour avan Pak ek lafet Dipen san lelven, bann gran-pret ek bann profeser Lalwa ti pe rod en fason pour aret Zezi an sekre pour touy li. 2Annefe, zot ti pe dir ant zot: Fodre pa nou fer sa pandan lafet, pangar lepep i revolte.

En Fanm I Vers Lesans lo Zezi

(Mat 26.6-13; Zn 12.1-8)

3Letan Zezi ti Betani, e pe manze kot Simon, ki ti annan en maladi parey lalep, en fanm ti antre avek en flakon plen avek en lesans nar pir, byen ser. I ti kas sa flakon e vers sa lesans lo latet Zezi. 4Detrwa sa bann envite pa ti kontan ditou. Zot ti dir ant zot: Akoz i gaspiy sa parfen konmsa? 5Sa lesans ti ava'n kapab ganny vann pour plis ki 300 pyes larzan pour donn bann pov. Zot ti kritik sa fanm.

6Me Zezi ti dir, “Les li trankil; akoz zot pe trakas li? I'n fer en bon aksyon pour mwan. 7Annefe, zot pou touzour annan bann pov parmi zot. Si zot anvi, zot pou touzour kapab fer dibyen bann pov. Me mwan, mon pa pou toultan avek zot. 8Sa fanm i'n fer sa ki i ti kapab: I'n vers lesans lo mon lekor pour prepar mwan pour mon tonbo. 9Mon dir zot, sa i laverite: Partou kot sa Bonn Nouvel ava ganny anonse, dan lemonn antye, sa ki sa fanm in fer, pou osi ganny rakonte an son memwar.”

Zida I Trai Zezi

(Mat 26.14-16; Lk 22.3-6)

10Zida Iskaryot, enn parmi sa 12 disip, ti al kot bann gran-pret pour li kapab trai Zezi avek zot. 11Kan zot ti antann sa, zot ti kontan e zot ti promet pour donn li larzan. Alor, Zida ti konmans rod en bon lokazyon pour trai Zezi.

Zezi I Selebre Pak avek Son bann Disip

(Mat 26.17-25; Lk 22.7-14, 21-23; Zn 13.21-30)

12Premye zour lafet Dipen san lelven, zour ki bann zenn mouton ti ganny sakrifye pour repa Pak, bann disip Zezi ti demann li, “Kote oule nou al fer preparasyon pour repa Pak?”

13Zezi ti anvoy de son bann disip. I ti dir zot, “Al anvil. Zot ava rankontre en zonm ki pe anmenn en potao. Swiv li, 14e kot i antre, dir avek propriyeter lakaz: Met i demann ou: Kote mon pou manz repa Pak avek mon bann disip? 15I ava montre zot dan letaz, en gran lasal meble e pare; la, zot ava prepar repa pour nou.”

16Bann disip ti ale e zot ti ariv dan lavil kot zot ti war tou, parey Zezi ti'n dir zot. Alor, zot ti fer preparasyon pour repa Pak.

17Apre soley kouse, Zezi ti vin avek son 12 disip. 18Letan zot ti'n pran zot plas pour manze, Zezi ti dir, “Mon dir zot, sa i laverite: Enn parmi zot ki pe manz avek mwan pou trai mwan.”

19Son bann disip ti vin tris, e enn apre lot, zot ti demann li, “Mwan sa?”

20Zezi ti reponn zot, “I enn parmi zot 12; sa enn ki pou met lanmen dan pla avek mwan. 21Parey i'n ganny ekri dan Lekritir: Fis-de-Lonm pou ale#14.21 War Ps 22.2-19; Eza 53.. Me maler pour sa zonm par ki Fis-de-Lonm i ganny trai. I ti ava preferab pour li, si i pa ti'n zanmen ne.”

Dernyen Repa Senyer

(Mat 26.26-30; Lk 22.15-20; 1 Kor 11.23-25)

22Pandan ki zot ti pe manze, Zezi ti pran dipen. I ti remersye Bondye, kas sa dipen e donn son bann disip. I ti dir, “Pran, sa i mon lekor.”

23Apre, i ti pran en lakoup diven. I ti remersye Bondye. I ti donn zot e zot tou, zot ti bwar. 24I ti dir zot, “Sa i mon disan, disan lalyans ki'n ganny verse pour bokou. 25Mon dir zot, sa i laverite: Mon pa pou bwar ankor sa prodwi rezen, ziska zour mon pou bwar diven nouvo dan Rwayonm Bondye.”

26Apre ki zot ti'n sant bann kantik lafet#14.26 War Mat 26.30., zot ti al lo montanny Zolivye.

Pyer I Renye Zezi

(Mat 26.31-35; Lk 22.31-34; Zn 13.36-38)

27Zezi ti dir zot, “Zot tou zot pou abandonn mwan. Annefe, Lekritir i dir: Mon pou touy berze e bann mouton pou ganny disperse#14.27 Za 13.7.. 28Me kan mon pou resisite, mon pou al esper zot Galile.”

29Pyer ti dir li, “Menm si tou lezot i abandonn ou, mwan, mon pa pou abandonn ou.”

30Zezi ti reponn li, “Mon dir ou, sa i laverite: Ozordi, avan ki kok i sant de fwa, ou pou'n renye mwan trwa fwa.”

31Me Pyer ti ensiste, “Menm si fodre mon mor avek ou, mon pa pou zanmen dir ki mon pa konn ou.” Tou lezot disip ti dir parey.

Zezi I Priye dan Zarden Zetsemane

(Mat 26.36-46; Lk 22.39-46)

32Zot ti al dan en landrwa ki ti apel Zetsemane#14.32 War Mat 26.36. e Zezi ti dir avek son bann disip, “Asiz isi, pandan ki mon al priye.” 33I ti anmenn avek li Pyer, Zak ek Zan. I ti konmans santi lafreyer ek langwas. 34I ti dir zot, “Mon leker i ranpli avek latristes lanmor. Reste isi e veye.”

35I ti al en pe pli lwen. I ti tonm ater e i ti priye pour ki si i posib, ki i pa pas dan sa moman soufrans. 36I ti priye, “Aba, Papa! Tou keksoz i posib pour ou. Retir sa lakoup devan mwan. Sepandan, pa dapre mon lavolonte, me dapre ou lavolonte.”

37I ti retournen e i ti trouv sa trwa disip pe dormi. I ti dir avek Pyer, “Simon ou dormi? Ou pa'n ganny lafors pour vey enn erdtan? 38Veye e priye pour zot pa tonm dan tantasyon. Lespri i for, me lekor i feb.”

39I ti al ankor priye, e dir menm parol. 40Kan i ti retournen, i ti war zot pe dormi, akoz zot lizye ti lour avek sonmey. Zot pa ti konnen ki pou dir li.

41Kan i ti retournen trwazyenm fwa, i ti dir zot, “Zot ankor pe dormi e pe repoze? Ase aprezan. Ler in arive, Fis-de-Lonm pe al ganny livre dan lanmen bann peser. 42Leve, annou ale! Gete! Sa enn ki pe trai mwan, in arive.”

Zezi I Ganny Arete

(Mat 26.47-56; Lk 22.47-53; Zn 18.3-12)

43Zezi ti ankor pe koze, kan Zida, enn parmi son 12 disip ti arive avek en lafoul arme avek lepe ek baton. Zot ti'n ganny anvoye par bann gran-pret, bann profeser Lalwa, ek bann ansyen. 44Zida ki ti pe trai li, ti'n donn zot en siny: Sa enn ki mon pou anbrase, li menm li. Atrap li e anmenn li.

45Deswit koman Zida ti arive, i ti al kot Zezi. I ti dir li, “Met!” I ti anbras li.

46Lezot ti met lanmen lo Zezi e aret li. 47Me enn parmi sa bann ki ti pe debout la, ti tir son lepe e donn en kou serviter Gran-Pret e sot son zorey.

48Zezi ti dir zot, “Eski zot ti bezwen vin avek lepe ek baton pour aret mwan, konmsi mon en bandi? 49Tou le zour, mon ti avek zot dan Tanp pe ansennyen, e zot pa ti aret mwan. Me tousala i bezwen arive pour ki Lekritir i ganny akonpli.”

50Alor, zot tou zot ti abandonn li e zot ti sove.

51En zennonm, ki ti'n anvlop li zis dan en dra, ti pe swiv Zezi; zot ti esey atrap li. 52Me i ti les tonbe sa dra e i ti taye, touni.

Zezi devan Gran Konsey

(Mat 26.57-68; Lk 22.54-55, 63-71; Zn 18.13-14, 19-24)

53Zot ti anmenn Zezi kot Gran-Pret. La, tou lezot gran-pret, bann ansyen, ek bann profeser Lalwa ti'n rasanble la. 54Pyer ti'n swiv Zezi lwen deryer, ziska dan lakour Gran-Pret. I ti pe asiz parmi bann gard, e pe sof li obor dife. 55Bann gran-pret ek Gran Konsey antye ti pe rod en levidans kont Zezi pour zot kondann li anmor. Me zot pa ti trouv nanryen. 56En kantite temwen ti'n donn fo levidans kont Zezi; me zot levidans pa ti korobore.

57Serten ti leve e donn sa fo levidans kont Zezi, 58“Nou ti antann li dir: Mon pou detri sa Tanp ki'n konstri par zonm e dan trwa zour mon pou rekonstri en lot, ki pa'n konstri par zonm#14.58 War Zn 2.19..”

59Me menm lo la, zot ti kontredir kanmarad.

60Alor, Gran-Pret ti debout devan lasanble e i ti kestyonn Zezi, “Ou napa nanryen pour dir lo sa bann lakizasyon ki zot fer kont ou?”

61Me Zezi ti gard silans e i pa ti reponn nanryen. Gran-Pret ti demann li ankor, “Eski ou menm Mesi, Garson Bondye beni?”

62Zezi ti reponn, “Wi! Mwan menm; e zot pou war Fis-de-Lonm pe asiz lo kote drwat Bondye Toupwisan, e pe vini parmi bann nyaz dan lesyel#14.62 Ps 110.1; Dan 7.13..”

63Gran-Pret ti desir son lenz. I ti dir, “Akfer nou bezwen ankor temwen? 64Zot in antann li blasfenmen, ki zot desizyon?”

Zot tou, zot ti kondann Zezi. Zot ti dir, “I merit lanmor#14.64 War Lev 24.16..”

65En bann parmi zot ti konmans kras lo li, bann son lizye, e tap li. Zot ti dir, “Profetize! Devinen lekel ki'n tap ou.” Bann gard osi, ti atrap li e bat li.

Pyer I Renye Zezi

(Mat 26.69-75; Lk 22.56-62; Zn 18.15-18, 25-27)

66Pyer ti ankor anba dan lakour kan enn bann servant Gran-Pret ti arive. 67Kan i ti war Pyer pe sof li obor dife, i ti get li. I ti dir, “Ou osi, ou ti avek Zezi ki sorti Nazaret.”

68Me i ti nye. I ti reponn, “Mon pa ni konnen, ni konpran sa ki ou pe dir.”

Pyer ti sorti deor. Alor en kok ti sante#14.68 Dan serten ansyen maniskri napa sa fraz: Alor en kok ti sante..

69Sa servant ti war li e i ti dir ankor avek bann ki ti la, “Sa zonm i enn parmi zot.”

70Me Pyer ti nye ankor. En pti moman plitar, bann ki ti la pe debout, ti osi dir avek Pyer, “Ou pa kapab nye ki ou pa enn sa bann disip. Annefe, ou osi, ou en Galileen.”

71Me Pyer ti fer serman e demann malediksyon lo li, “Mon pa konn sa zonm lo ki zot pe koze.”

72Zis dan sa moman, en kok ti sant en dezyenm fwa, e Pyer ti rapel sa ki Zezi ti'n dir li, “Avan kok i sant de fwa, ou pou'n renye mwan trwa fwa#14.72 War 14.30..” Alor, Pyer ti plere.

Currently Selected:

Mark 14: BSK

Highlight

Copy