Mark 15

Zezi devan Pilat

(Mat 27.1-2, 11-14; Lk 23.1-5; Zn 18.28-38)

1Byen granmaten, bann gran-pret, bann ansyen, bann profeser Lalwa ek Konsey Siprenm ti syeze. Zot ti fer atas Zezi e anmenn li kot Pilat. 2Pilat ti kestyonn li, “Ou menm ou lerwa bann Zwif?”

Zezi ti reponn li, “Ou menm ki pe dir.”

3Bann gran-pret ti fer bokou lakizasyon kont Zezi. 4Alor, Pilat ti kestyonn li ankor, “Ou pa reponn? Ou pa tann tou sa bann lakizasyon ki zot pe fer kont ou.”

5Me Zezi pa ti donn okenn repons. Sa ti sirprann Pilat.

Zezi I Ganny Kondannen Anmor

(Mat 27.15-26; Lk 23.13-25; Zn 18.39—19.16)

6Sak lafet Pak, Pilat ti annan labitid larg en prizonnyen ki lafoul ti demande. 7Ti annan en zonm ki ti apel Barabas, ki ti dan prizon ansanm avek lezot rebel. Zot ti'n komet en mert pandan en revolt. 8Lafoul ti rasanble kot Pilat pour demann sa faver parey labitid. 9Pilat ti reponn zot, “Eski zot oule ki mon larg lerwa bann Zwif?”

10Annefe, Pilat ti konnen ki bann gran-pret ti'n livre Zezi dan son lanmen par zalouzi.

11Me bann gran-pret ti eksit lafoul pour fer Pilat larg plito Barabas. 12Pilat ti redemann zot, “Ki zot oule mon fer avek sa enn ki zot apel lerwa bann Zwif?”

13Ankor, zot ti kriye, “Krisifye li.”

14Me Pilat ti demann zot, “Ki krim i'n komet?”

Me zot ti kriy pli for, “Krisifye li.”

15Pour satisfer lafoul, Pilat ti larg Barabas. I ti fer fwet Zezi e livre li dan zot lanmen, pour li ganny krisifye.

Bann Solda I Monk Zezi

(Mat 27.27-31; Zn 19.2-3)

16Bann solda ti anmenn Zezi dan pale gouverner. Zot ti rasanble tou lezot solda. 17Zot ti abiy li dan en lenz rouz; zot ti tres en kouronn pikan ki zot ti met lo son latet. 18Zot ti salye li: Viv Lerwa bann Zwif! 19Zot ti tap li lo latet avek en baton, kras lo li. Zot ti azenou e fer sanblan ador li.

20Kan zot ti'n fini gognard li, zot ti tir sa lenz rouz, e remet li son lenz. Apre, zot ti anmenn li pour li ganny krisifye.

Bann Solda I Krisifye Zezi

(Mat 27.32-44; Lk 23.26-43; Zn 19.17-27)

21Simon, en Sireneen, papa Aleksann ek Rifis, ti pe pase sorti dan lakanpanny. Bann solda ti fors li anmenn lakrwa Zezi. 22Zot ti anmenn Zezi dan en landrwa ki ti apel Golgota, savedir, plas koksis latet. 23Zot ti ofer Zezi diven melanze avek lamir; me i ti refize bwar. 24Zot ti krisifye li, e zot ti partaz son lenz par tiraz osor, pour desid par sakenn#15.24 War Ps 22.19..

25I ti 9 er bomaten kan zot ti krisifye li. 26Lo en plak, zot ti afis rezon son kondannasyon: Lerwa bann Zwif. 27Zot ti krisifye de bandi avek li, enn adrwat, lot agos. 28Alor sa ki ti'n ekri, ti ganny akonpli: I ti ganny konte parmi bann kriminel#15.28 Dan plizyer ansyen maniskri napa sa verse. War Lk 22.37 ek Eza 53.12..

29Dimoun ki ti pe pase, ti ensilte li. Zot ti sekwe latet. Zot ti dir, “Ou ki ti pou detri Tanp e rekonstri li dan trwa zour#15.29 War 14.58; Ps 22.8; Zn 2.19., 30sov ou lekor, desann lo sa lakrwa.”

31Bann gran-pret, bann profeser Lalwa osi ti gognard Zezi. Zot ti dir, “I ti sov lezot me i pa kapab sov son prop lekor! 32Kris! Lerwa Izrael! Desann, konmela menm, lo sa lakrwa. Konmsa, nou ava war e nou ava krwar.” Bann ki ti'n ganny krisifye avek li ti osi ensilte li.

Lanmor Zezi

(Mat 27.45-56; Lk 23.44-49; Zn 19.28-30)

33Depi midi ziska 3 er, fernwanr ti fer partou lo later.

34Ver 3 er, Zezi ti kriy avek en lavwa for: Eloi, Eloi, lama sabaktani#15.34 Ps 22.2 site dan lalang Arameen.? Savedir: Mon Bondye! Mon Bondye! Akoz ou'n abandonn mwan?

35Serten parmi bann ki ti pe debout la, ti antann li. Zot ti dir, “Ekoute! I pe apel Eli.”

36Enn parmi zot ti taye, tranp en leponz dan vineg, met lo bout en golet e donn li pour bwar. Me lezot ti dir, “Espere! Annou gete si Eli pou vin tir li la.”

37Me Zezi ti kriy byen for e i ti mor.

38Rido Tanp ti desir an de#15.38 War Egz 26.31-33., depi anler ziska anba. 39Kan sa zofisye Romen ki ti pe debout anfas avek Zezi, ti war koman i ti mor, i ti dir, “Vreman! Sa zonm ti Garson Bondye.”

40Pa tro lwen, ti annan osi bann fanm ki ti pe gete. Parmi zot ti annan Mari Madlenn, Mari manman Pti Zak, Zoze, ek Salome. 41Zot ti abitye swiv Zezi, letan i ti Galile e zot ti servi li. Ti annan osi bokou lezot fanm ki ti'n mont avek Zezi Zerizalenm.

Lekor Zezi I Ganny Met dan Tonbo

(Mat 27.57-61; Lk 23.50-56; Zn 19.38-42)

42Aswar ti'n fer, kan Zozef, en zonm ki sorti Arimate ti arive. I ti en manm respektab dan Konsey. Li osi, i ti pe esper Rwayonm Bondye. Koman ti zour Preparasyon, savedir lavey saba, 43Zozef ti ganny kouraz pour al kot Pilat, e demann li lekor Zezi. 44Pilat ti etonnen pour aprann ki Zezi ti'n deza mor. I ti apel sa zofisye larme e i ti demann li si Zezi ti'n deza mor. 45Kan i ti'n antann rapor sa zofisye, i ti donn Zozef permisyon pour pran lekor Zezi. 46Zozef ti aste en dra linenn. I ti fer desann lekor Zezi lo lakrwa, anvlop li dan sa dra e depoz li dan en tonbo ki ti'n fouye dan ros. Apre, i ti roul en gro ros devan lantre sa tonbo. 47Mari Madlenn ek Mari, manman Zoze ti pe gete kot zot ti depoz Zezi.

Currently Selected:

Mark 15: BSK

Highlight

Copy