Lik 4
4
Tantasyon Zezi
(Mat 4.1-11; Mrk 1.12, 13)
1Zezi, ranpli avek Lespri Sen, ti kit larivyer Zourden e Lespri ti anmenn li dan dezer. 2Laba, dyab ti tant li pandan 40 zour. Zezi pa ti manz nanryen pandan tou sa letan. Alor, i ti lafen.
3Alor, dyab ti dir li, “Si ou Garson Bondye, donn lord ki sa ros i vin dipen.”
4Zezi ti reponn li, “Lekritir i deklare: Zonm pa pou viv zis lo dipen#4.4 Det 8.3.”
5Alor, dyab ti anmenn Zezi dan en landrwa pli o, kot i ti montre li tou bann rwayonm later. 6I ti dir li, “Mon pou donn ou tou pouvwar ek mazeste sa bann rwayonm. Annefe, tousala in ganny livre avek mwan, e mwan, mon kapab donn nenport ki, ki mon oule. 7Par konsekan, si ou ador mwan, tousala ava vin pour ou.”
8Zezi ti reponn li, “I'n ekri: Ou devre ador Senyer ou Bondye, e servi zis li tousel#4.8 Det 6.13..”
9Apre sa, dyab ti anmenn Zezi Zerizalenm. I ti met li debout lo lapwent twa Tanp. Dyab ti dir li, “Si ou Garson Bondye, zet ou anba. 10I'n ekri: Bondye ava donn lord son bann lanz pour protez ou. 11E ankor: Zot pou anmenn ou lo zot lanmen, pangar ou konny ou lipye avek en ros#4.11 Ps 91.11-12..”
12Zezi ti reponn li, “I'n ekri: Ou pa devre tant Senyer ou Bondye#4.12 Det 6.16..”
13Kan dyab ti'n fini tant Zezi dan tou diferan fason, i ti kit li ziska ki i ganny en pli bon lokazyon.
Zezi I Konmans Son Travay dan Galile
(Mat 4.12-17; Mrk 1.14, 15)
14Ranpli avek pwisans Lespri, Zezi ti retourn Galile. Dan tou sa rezyon antye, son renonmen ti fannen.
15I ti konmans ansennyen dan zot bann sinagog, e tou dimoun ti dir bokou dibyen lo li.
Zabitan Nazaret pa Aksepte Zezi
(Mat 13.53-58; Mrk 6.1-6)
16Zezi ti ariv Nazaret kot i ti'n grandi. Zour saba, i ti antre dan sinagog, parey son labitid. I ti debout pour lir Lekritir. 17Zot ti donn li liv profet Ezai. I ti ouver dan landrwa kot i'n ekri:
18Lespri Senyer i lo mwan,
akoz in konsakre mwan
pour anons Bonn Nouvel
avek bann pov.
I'n anvoy mwan proklanm
delivrans bann prizonnyen,
e fer bann aveg war kler,
donn laliberte bann ki ganny oprimen,
19proklanm en lannen
kot zot ava war labonte Senyer#4.19 Eza 61.1-2..
20Alor, Zezi ti ferm roulo liv; i ti rann avek sa serviter, e i ti asize. Tou dimoun dan sinagog ti fikse zot lizye lo li. 21Alor, i ti dir zot, “Ozordi, sa parol Lekritir ki zot in tande, in akonpli.”
22Tou dimoun ti koz dibyen lo Zezi. Zot ti dan ladmirasyon devan bann parol ekstraordiner ki ti sorti dan son labous. Zot ti dir, “Sa, pa li menm garson Zozef?”
23Zezi ti dir zot, “Sirman, zot pou sit mwan sa proverb: Dokter geri ou, ou menm. Nou'n tande tou sa ki ou'n fer dan Kapernaoum, fer li isi osi, dan ou prop lavil.”
24I ti azoute, “Mon dir zot, sa i laverite: Okenn profet pa ganny byen aksepte dan son prop lavil. 25Me les mwan dir zot: Ti annan en kantite vev dan pei Izrael dan lepok profet Eli, kan lesyel ti fermen pandan 3 an 6 mwan, e ti annan en gran lafanmin partou dan pei#4.25 War 1 Rwa 17.1.. 26Pourtan, Eli pa ti ganny anvoye kot okenn zot. Me i ti ganny anvoye kot en vev dan lavil Sarepta, dan rezyon Sidon#4.26 War 1 Rwa 17.8-16..
27Ti osi annan en kantite lepre dan pei Izrael dan lepok profet Elize. Sepandan, personn pa ti ganny pirifye, sof Naaman, en Siriyen#4.27 War 2 Rwa 5.1-14..”
28Tou dimoun dan sinagog ti ranpli avek lakoler kan zot ti antann sa. 29Zot ti leve, trenn Zezi an deor lavil, lo bor presipis sa kolin kot zot lavil ti'n ganny konstri, pour zet li anba. 30Me Zezi ti pas dan milye zot e i ti ale.
Zezi I Geri En Zonm Posede par En Move Lespri
(Mrk 1.21-28)
31Zezi ti desann Kapernaoum, en lavil dan Galile. I ti ansenny zot zour saba. 32Dimoun ti etonnen par mannyer ki i ti ansennyen, akoz i ti koz avek lotorite.
33Dan sinagog, ti annan en zonm ki ti ganny tourmante par en move lespri. I ti kriye avek en lavwa for, 34“Ki ou pe rode avek nou, Zezi ki sorti Nazaret? Eski ou'n vin isi pour detri nou? Mon konnen ki ou ete: Ou menm sa Zonm Sen ki sorti kot Bondye.”
35Me Zezi ti reprimann sa lespri, “Reste trankil! Sorti dan sa zonm.”
Sa move lespri ti zet sa zonm ater devan tou dimoun e sorti san fer li okenn dimal.
36Tou dimoun ti etonnen e zot ti dir ant zot, “Ki kalite parol sa? I komann bann move lespri avek lotorite ek pwisans e zot sorti.”
37Alor, repitasyon Zezi ti fannen partou dan rezyon.
Zezi I Geri En Kantite Malad
(Mat 8.14-17; Mrk 1.29-34)
38Zezi ti kit sinagog e i ti al kot Simon. Belmer Simon ti malad avek en lafyev. Alor, zot ti demann Zezi pour geri li.
39Zezi ti bes lo belmer Simon. I ti ordonn lafyev pour kit li. Deswit, lafyev ti kit li; i ti leve e servi zot.
40Apre soley kouse, tou dimoun ki ti annan fanmir malad avek toudsort maladi, ti anmenn zot kot Zezi. Zezi ti poz son lanmen lo zot, e geri zot. 41Bann demon ti sorti dan bokou dimoun, an kriyan, “Ou menm Garson Bondye!”
Alor, Zezi ti reprimann zot. I ti anpes zot koze, akoz zot ti konnen ki li menm Mesi.
Zezi dan Zide
(Mrk 1.35-39)
42De ki lizour ti fer, Zezi ti kit lavil e al dan en landrwa izole. En lafoul dimoun ti rod li. Kan zot ti war li, zot ti oule i reste avek zot. Zot pa ti anvi i kit zot.
43Me Zezi ti dir zot, “Mon bezwen anons Bonn Nouvel Rwayonm Bondye dan lezot lavil osi. Pour sa rezon, ki Bondye in anvoy mwan.”
44Alor, Zezi ti kontinyen proklanm son mesaz dan bann sinagog dan Zide.
Currently Selected:
Lik 4: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
