Lik 5

Zezi I Swazir Son bann Premye Disip

(Mat 4.18-22; Mrk 1.16-20)

1En zour, Zezi ti pe debout obor Lak Zenezaret#5.1 Lak Zenezaret i osi ganny apele lak Galile.. Lafoul ti'n antour li e ti pe pouse pour zot antann Parol Bondye. 2Zezi ti war de kannot obor lak; bann peser ti'n sorti. Zot ti pe lav zot lasenn. 3Zezi ti anbark dan en kannot ki ti pour Simon. I ti demann li pour pous son kannot en pti pe alekar avek later. La, Zezi ti asiz dan sa kannot e i ti ansenny lafoul.

4Kan i ti'n fini koze, Zezi ti dir avek Simon, “Avans kannot dan kre e zet ou lasenn pour atrap pwason.”

5Simon ti reponn, “Met! Nou'n travay tou lannwit e nou pa'n atrap nanryen! Me akoz ou'n dir mwan zet mon lasenn, mon pou fer li.”

6Alor, zot ti zet zot lasenn, e deswit, zot ti atrap en kantite pwason; zot lasenn ti pe konmans desire. 7Zot ti fer siny zot bann dalon dan lot kannot pour vin ede. Zot ti vini e zot ti ranpli tou le de kannot avek pwason, ziska ki kannot ti pre pour koule.

8Kan Simon ti war sa, i ti tonm azenou devan Zezi. I ti dir, “Senyer, elwanny ou avek mwan, akoz mon en zonm ki fer pese!”

9Annefe, Simon ek tou son bann kanmarad ki ti avek li, ti sezi akoz sa gran kantite pwason ki zot ti'n atrape. 10Zak ek Zan, de garson Zebede, ki ti zanmi lapes Simon, zot osi, zot ti'n sezi. Me Zezi ti dir avek Simon, “Pa per! Dezormen ou pou lapes zonm!”

11Apre ki zot ti'n anmenn zot kannot ater, zot ti kit tou e zot ti swiv Zezi.

Zezi I Geri En Lepre

(Mat 8.1-4; Mrk 1.40-45)

12Kan ki Zezi ti dan enn sa bann lavil, ti annan en zonm ki ti annan en maladi parey lalep. Kan i ti war Zezi, i ti tonm lafas ater. I ti sipliy li, “Senyer, si oule, ou kapab fer mwan vin pir.” 13Zezi ti lev son lanmen e tous li. I ti dir, “Mon oule! Vin pir.”

Deswit sa maladi ki ti parey lalep ti kit li. 14Zezi ti ordonn li pour pa rakont sa personn, “Me al fer pret war ou, e ofer sakrifis parey Moiz in ordonnen. Sa i ava laprev ki ou'n geri#5.14 War Lev 14.2-32..”

15Sepandan, nouvel lo Zezi ti fann plis ankor. Bann gran lafoul ti rasanble pour ekout li, e pour li geri zot maladi. 16Me Zezi ti al dan bann landrwa dezer pour priye.

Zezi I Geri En Zonm Paralize

(Mat 9.1-8; Mrk 2.1-12)

17En zour, Zezi ti pe ansennyen. En group Farizyen ek profeser Lalwa ti pe asize pre lanmenm. Zot ti'n vini, sorti dan tou bann vilaz dan Galile, Zide e dan Zerizalenm. Pwisans Senyer ti prezan avek Zezi, pour li realiz bann gerizon.

18En group dimoun ti arive avek en zonm paralize lo en lanmak. Zot ti esey antre dan lakaz pour depoz li devan Zezi. 19Me akoz lafoul, zot pa ti reisi ariv kot Zezi. Alor, zot ti mont lo twa; zot ti fer en trou, e fer li desann lo son lanmak, dan milye lafoul ziska devan Zezi. 20Kan Zezi ti war zot lafwa, i ti dir, “Mon garson! Ou bann pese in ganny pardonnen.”

21Bann profeser Lalwa ek bann Farizyen ti pe dir dan zot menm: Lekel sa zonm ki pe blasfenmen? Lekel ki kapab pardonn pese? Pa zis Bondye tousel#5.21 War Ps 103.3; Eza 43.25.?

22Me Zezi ti konn tou sa ki ti pe pase dan zot lespri. I ti demann zot, “Akoz, zot pe mazin tousala dan zot leker? 23Lekel ki pli fasil dir: Ou pese in ganny pardonnen, oubyen: Leve, marse? 24Me mon pou fer zot konnen ki Fis-de-Lonm i annan lotorite lo later pour pardonn pese.”

Alor, Zezi ti dir avek sa zonm paralize, “Mon dir ou, leve! Pran ou lanmak e al kot ou.”

25Deswit, sa zonm ti leve devan tou dimoun. I ti ranmas son lanmak. I ti loue Bondye lo semen pour al kot li. 26Dimoun ki ti la, ti byen etonnen. Zot osi, zot ti loue Bondye! Ranpli avek lafreyer zot ti dir, “Nou'n war keksoz ekstraordiner ozordi!”

Zezi I Apel Levi

(Mat 9.9-13; Mrk 2.13-17)

27Apre sa, Zezi ti sorti. I ti war Levi, en kolekter taks ki ti pe asiz dan son biro. Zezi ti dir li, “Swiv mwan.”

28Levi ti leve, kit tou e swiv Zezi. 29Apre, i ti fer en gran festen kot li, an loner Zezi. En kantite kolekter taks ek lezot dimoun ti pe manze avek zot. 30Bann Farizyen ek bann profeser Lalwa ti mirmire kont bann disip Zezi. Zot ti dir, “Akoz zot manze e bwar avek bann kolekter taks ek bann peser?”

31Zezi ti reponn zot, “Dimoun ki an bonn sante pa bezwen dokter, me zis bann ki malad. 32Mon pa'n vini pour apel bann zis, me bann peser, pour ki zot sanz zot lavi.”

Kan Fodre Fer Zenn

(Mat 9.14-17; Mrk 2.18-22)

33Bann Farizyen ti dir Zezi, “Bann disip Zanbatis ek disip bann Farizyen, zot souvan zennen e fer lapriyer; me ou bann disip zot kontinyen manze e bwar.”

34Zezi ti dir zot, “Eski ou kapab fer bann envite dan maryaz, zennen kan nouvo marye i avek zot? Non! 35Me sa zour pour arive, kan nouvo marye pou ganny pran avek zot. Alor, la zot ava zennen.”

36Zezi ti osi dir zot en parabol, “Personn pa desir en morso latwal nef pour pyeste en vye lenz. Si i fer sa, i ava desir sa lenz nef, e sa morso latwal nef pa pou ale avek sa enn vye.

37Personn pa met diven nouvo dan bann vye sak diven. Si i fer sa, diven pou desir sa bann vye sak diven e koule; bann sak diven pou perdi. 38Me, fodre met diven nef dan bann sak diven nef. 39Sa enn ki'n bwar en vye diven, apre, i pa pou oule diven nouvo. I pou dir: Sa ki vye i pli bon.”

Currently Selected:

Lik 5: BSK

Highlight

Copy