Lik 3

Zanbatis I Prese dan Dezer

(Mat 3.1-12; Mrk 1.1-8; Zn 1.19-28)

1Dan kenzyenm lannen renny lanperer Tiber#3.1 Tiber ti siksed Ogis lo tronn koman lanperer Ronm (war 2.1). I ti lanperer depi lannen 14-37 apre Zezi-Kri., Pons Pilat ti gouverner Zide, Herod ti gouverner Galile, son frer Filip ti gouverner dan teritwar Itoure ek Trakonit, e Lisanyas ti gouvern Abilenn.

2Dan sa letan, Hann ek Kaif#3.2 Gran-Pret Hann ti ganny depoze dan lannen 15. Me i ti ankor annan en lenfliyans anba son zann, Kaif ki ti son sikseser. War Zn 18.13; Akt 4.6. ti Gran-Pret. Bondye ti koz avek Zan, garson Zakari, dan dezer. 3Zan ti al partou dan rezyon larivyer Zourden. I ti proklanmen ki dimoun i devre konverti e ganny batize, pour pardon zot pese. 4Parey i'n ekri dan liv profet Ezai:

En lavwa pe kriye dan dezer:

Prepar semen Senyer,

fer drwat son bann santye.

5Tou bann vale pou ganny konble;

tou bann montanny ek tou kolin

pou ganny aplati.

Bann semen kontour,

pou vin drwat;

bann semen abos, pou vin plat.

6Tou dimoun pou war delivrans Bondye#3.6 Eza 40.3-5..

7Zan ti dir avek sa lafoul ki ti vin kot li pour ganny batize, “Ras viper ki zot ete! Lekel ki'n montre zot koman sov lakoler ki pou vini? 8Alor, prodwi bann bon fri ki montre ki zot in konverti. Pa zis dir dan zot menm: Abrahanm i nou papa.

Les mwan dir zot ki Bondye i kapab servi sa bann ros ki la, pour fer zot vin desandans Abrahanm. 9Konmela menm, lars in pare la obor rasin bann pye dibwa. Tou pye dibwa ki pa raport bon fri, pou ganny koupe e zet dan dife.”

10Lafoul ti demann Zan, “Alor, ki nou devre fer?”

11Zan ti reponn, “Sa enn ki annan de semiz, donn enn son kanmarad ki napa; sa ki annan dekwa manze, li osi i devre partaze.”

12Bann kolekter taks ki ti'n vini pour ganny batize ti demann avek Zan, “Nou, ki nou devre fer?”

13I ti reponn zot, “Pa bezwen fer dimoun pey plis taks ki fodre.”

14Bann solda ti osi demann li, “E nou, ki nou devre fer?”

Zan ti dir zot, “Pa servi vyolans, oubyen fo lakizasyon; kontant zot avek zot lapey.”

15Lespwar lafoul ti gran. Zot ti demann dan zot menm: Zan, pa li menm li Kris!

16Alor, Zan ti reponn zot tou, “Mwan, mon batiz zot avek delo, me sa enn ki pe vini, i pli for ki mwan, e mon pa diny pour delarg lase son sandal. Li, i pou batiz zot avek Lespri Sen ek dife. 17Son fours i dan son lanmen pour li separ lagrenn ek lapay. I pou anmas lagrenn dan son langar rezerv, me i pou bril lapay dan dife ki pa zanmen tennyen.”

18Ensi, avek bokou parol lankourazman, Zan ti anons Bonn Nouvel avek lepep. 19Me i ti'n reprimann lerwa Herod konsernan Herodyad, fanm son frer; osi akoz lezot move keksoz ki i ti'n fer. 20Alor, pour fer keksoz vin pli grav ankor, Herod ti fer met Zan dan prizon.

Batenm Zezi

(Mat 3.13-17; Mrk 1.9-11)

21Apre ki tou dimoun ti'n ganny batize, Zezi osi ti ganny batize. Pandan ki i ti pe priye, lesyel ti ouver. 22Lespri Sen ti desann lo li dan laform en pizon. En lavwa sorti dan lesyel, ti dir, “Ou menm mon Garson byenneme, ou donn mwan bokou lazwa.”

Bann Zanset Zezi

(Mat 1.1-17)

23Kan Zezi ti konmans son misyon, i ti annan apepre 30an. Parey dimoun ti krwar, Zezi ti garson Zozef. Zozef ti garson Heli, 24garson Matat, garson Levi, garson Melki, garson Yannai, garson Zozef, 25garson Matatyas, garson Amos, garson Nahoum, garson Hesli, garson Nagay, 26garson Maat, garson Matatyas, garson Semein, garson Yosek, garson Yoda, 27garson Yoanann, garson Reza, garson Zorobabel, garson Salatyel, garson Neri, 28garson Melki, garson Adi, garson Kosanm, garson Elmadanm, garson Er, 29garson Zozye, garson Eliezer, garson Yorim, garson Matat, garson Levi, 30garson Simeon, garson Zida, garson Zozef, garson Yonanm, garson Eliakim, 31garson Melea, garson Menna, garson Matata, garson Natan, garson David, 32garson Zese, garson Obed, garson Boaz, garson Sala, garson Naasonn, 33garson Aminadab, garson Admin, garson Arni, garson Hesronn, garson Fares, garson Zida, 34garson Zakob, garson Izaak, garson Abrahanm, garson Tara, garson Nakor, 35garson Serik, garson Rago, garson Falek, garson Heber, garson Sala, 36garson Kenann, garson Arpaksad, garson Senm, garson Noe, 37garson Lamek, garson Matousalenm, garson Henok, garson Yered, garson Maleleel, garson Kenann, 38garson Enos, garson Set, garson Adan, garson Bondye.

Currently Selected:

Lik 3: BSK

Highlight

Copy