Lik 11

Lansennyman lo Lapriyer

(Mat 6.9-13; 7.7-11)

1En zour, Zezi ti pe priye dan en serten landrwa. Kan i ti'n fini, enn son bann disip ti dir li, “Senyer! Montre nou koman priye, parey Zan#11.1 Zezi pe koz lo Zanbatis. ti montre son bann disip.”

2Zezi ti dir zot,

“Kan zot priye, zot ava dir:

Papa!

Nou demande ki ou non sen

i ganny glorifye,

e ki ou Renny i ganny etabli.

3Donn nou sak zour,

dipen ki nou bezwen.

4Pardonn nou, nou pese,

parey nou menm, nou pardonn

bann ki ofans nou.

Pa les nou tonm dan tantasyon.”

5Zezi ti dir zot ankor, “Si enn parmi zot i al kot son zanmi dan milye lannwit e dir li: Mon zanmi! Pret mwan trwa dipen. 6Enn mon zanmi in ariv kot mwan apre en vwayaz, e mon napa nanryen pour ofer li.

7Anndan, son zanmi i reponn li: Pa bezwen deranz mwan. Mon laport i deza fermen; mwan ek mon bann zanfan nou pe dormi; mon pa kapab leve pour donn ou dipen.

8Mon dir zot, i pa pou leve pour donn li dipen, menm si i son zanmi. Me akoz son zanmi in ensiste san vergonny, i ava leve e donn li tou sa ki i bezwen.

9Mwan, mon dir zot: Demande, zot ava gannyen. Rode, zot ava trouve. Tape, laport ava ouver. 10Annefe, sa enn ki demande i resevwar, sa enn ki rode i trouve, e laport i ouver pour sa enn ki frape.

11Lekel sa papa parmi zot, ki, si son garson i demann li en pwason, i donn li en serpan olye en pwason#11.11 War Mat 7.9.? 12Oubyen si i demann li en dizef, i donn li en skorpyon?

13Si zot, move koman zot ete, zot konn donn bon keksoz zot zanfan, zot Papa ki dan lesyel, i annan plis rezon pour donn son Lespri Sen tou dimoun ki demann li!”

Zezi I Geri En Kozpa

(Mat 12.22-30; Mrk 3.22-27)

14Zezi ti pe sas en move lespri ki ti anpes en zonm koze. Kan sa move lespri ti'n kit li, sa kozpa ti koze e lafoul ti etonnen. 15Me de trwa parmi lafoul ti pe dir, “I sas bann move lespri par pouvwar Belzebil#11.15 War 10.25. War sa mo osi dan Vokabiler., sef demon.”

16Lezot, pour teste li, ti demann li en siny sorti dan lesyel. 17Me Zezi, ki ti konnen sa ki zot ti pe mazinen, ti dir zot, “Tou rwayonm ki divize kont li menm pou fini par ganny detri, e son bann lakaz i tonbe. 18Si Satan i divize kont li menm, ki mannyer son rwayonm pou kapab tenir? Annefe, zot dir ki mon sas bann demon par pouvwar Belzebil. 19Me si mwan, mon sas bann demon par pouvwar Belzebil, par ki pouvwar zot bann zanfan i fer li? Pour sa rezon, zot bann zanfan menm ki pou vin zot prop ziz. 20Me si se par ledwa Bondye#11.20 War Egz 8.15. ki mon sas bann demon, alor, Rwayonm Bondye in ariv parmi zot.

21Kan en zonm for e byen arme i vey son propriyete, tou son byen i an sekirite. 22Me en zonm pli for ki li i kapab atak li, bat li, e aras li tou son mwayen defans lo lekel i pe konte, e distribye sa ki i'n pran.

23Sa enn ki pa avek mwan i kont mwan. Sa enn ki pa rasanble avek mwan, i disperse.”

Move Lespri I Retournen

(Mat 12.43-45)

24“Kan en move lespri i sorti dan en dimoun, i ale vini dan bann landrwa dezer pour rod en plas pour li repoze. Me i pa trouv okenn landrwa. Alor i dir dan li menm: Mon pou retourn dan mon lakaz kot mon ti sorti.

25I retournen e i war ki son lakaz in ganny balye e byen annord. 26Alor, i al rod set lezot lespri pli move ki li menm. Ansanm, zot antre e reste la. Finalman, dernyen leta sa dimoun i pli pir ki avan.”

27Pandan ki Zezi ti pe koze, en fanm dan lafoul ti kriye, “Erez sa fanm ki'n donn ou nesans e ki'n donn ou tete.”

28Me Zezi ti dir, “Ere plito sa enn ki ekout Parol Bondye e met li an pratik.”

Zezi I Refiz Lafoul En Mirak

(Mat 12.38-42)

29Akoz lafoul ti pe ogmante otour li, Zezi ti dir, “Sa zenerasyon i en move zenerasyon. I pe rod en siny, me i pa pou gannyen, eksepte siny Zonas#11.29 War Zon 3.3-5.. 30Annefe, parey ki Zonas ti en siny pour bann zabitan Niniv, Fis-de-Lonm pou vin en siny pour sa zenerasyon. 31Zour zizman, larenn sorti dan Sid pou leve avek dimoun sa zenerasyon e i pou kondann zot, akoz i ti sorti dan bout later pour vin ekout lasazes Salomon#11.31 War 1 Rwa 10.1-10.. Me isi, i annan en dimoun ki pli gran ki Salomon. 32Zour zizman, bann zabitan Niniv pou leve kont sa zenerasyon ki zot ava kondannen. Annefe, bann zabitan Niniv ti repanti kan zot ti antann mesaz Zonas#11.32 War Zon 3.5,8,10.. Me isi, i annan enn ki pli gran ki Zonas.”

Lalimyer Lekor

(Mat 5.15; 6.22-23)

33“Personn pa alim en lalanp pour kasyet li, oubyen met li anba en bol#11.33 Dan serten ansyen maniskri napa: Oubyen met li anba en bol. War Mat 5.15; Mrk 4.21.. I met li lo en portlanp pour ekler dimoun kan zot antre.

34Lizye i lalanp ou lekor. Kan ou lizye i an bonn sante, alor ou lekor antye i dan lalimyer. Me kan lizye pa an bonn sante, lekor antye i dan fernwanr. 35Alor, fer sir ki lalimyer ki dan ou, pa vin teneb.

36Si ou lekor antye i ranpli avek lalimyer, e ki okenn parti pa dan fernwanr, i pou ekler partou, parey kan en lalanp i ekler ou avek tou son laklerte.”

Zezi I Akiz bann Farizyen ek bann Profeser Lalwa

(Mat 23.1-36; Mrk 12.38-40)

37Pandan ki Zezi ti pe koze, en Farizyen ti envit li pour manze. Zezi ti antre e i ti pran plas pour manze. 38Sa Farizyen ti byen etonnen kan i ti remarke ki Zezi pa ti lav son lanmen avan manze.

39Me Senyer ti dir li, “Zot bann Farizyen, zot netway lakoup ek pla an deor, me anndan zot ranpli avek lavaris ek mesanste. 40Bann fou! Sa enn ki'n fer deor, pa li menm ki'n osi fer anndan? 41Alor, donn bann pov sa ki dan ou lasyet, e tou ava vin prop pour zot.

42Me maler lo zot, bann Farizyen! Zot ki donn en dizyenm parti lo lanmant, lo tou zepis ek legim#11.42 War Lev 27.30; Det 14.22., me zot negliz lazistis ek lanmour Bondye. I neseser ki zot fer tousala, me san negliz lezot.

43Maler lo zot bann Farizyen! Zot kontan bann premye plas dan bann sinagog e ganny salye dan bann landrwa piblik.

44Maler lo zot ki parey bann latonm san mark: Dimoun i mars lo la san konnen.”

45Enn bann profeser Lalwa ti pran laparol, “Met! Kan ou koz konmsa, ou pe ensilte nou osi.”

46Zezi ti dir li, “Maler lo zot osi bann profeser Lalwa! Zot met lo ledo dimoun, bann gro fardo lour, ki difisil pou anmennen. Me zot menm zot pa bouz en ledwa pour ed sa bann dimoun.

47Maler lo zot ki'n konstri latonm bann profet, ki zot zanset ti touye! 48Sa i montre ki zot aprouv keksoz ki zot zanset ti fer. Annefe, zot bann zanset ti touy bann profet, e zot, zot konstri latonm. 49Pour sa rezon ki Lasazes Bondye ti dir: Mon pou anvoy zot bann profet ek bann zapot. Zot pou touy en bann e persekit lezot. 50Alor, disan tou bann profet ki'n koule depi fondasyon lemonn, pou tonm lo sa zenerasyon konmela, 51depi disan Abel ziska disan Zakari, ki ti ganny touye ant lotel ek sanktyer#11.51 War Zen 4.8; 2 Kro 24.20-22.. Wi! Mon dir zot, sa zenerasyon pou bezwen rann kont pour tou sa bann krim.

52Maler lo zot, bann profeser Lalwa! Zot in pran lakle ki ouver laport konnesans. Zot menm zot pa antre, e zot anpes antre bann ki ti anvi antre.”

53Kan Zezi ti'n kit sa landrwa, bann profeser Lalwa ek bann Farizyen ti konmans atak li e kestyonn li lo toudsort size. 54Zot ti pe rod en fason pour akiz li par son prop parol.

Currently Selected:

Lik 11: BSK

Highlight

Copy