Lik 10

Zezi I Anvoy Swasanndouz Disip

1Apre sa, Senyer ti swazir 72#10.1 Serten ansyen maniskri i dir 70. lezot disip e anvoy zot devan li, de par de, dan tou bann lavil ek landrwa kot li menm i ti pou ale. 2I ti dir zot, “Rekolt i annabondans, me napa ase travayer. Alor, sipliy Propriyeter rekolt pour li anvoy bann travayer pour fer son rekolt.

3Ale! Mon pe anvoy zot parey bann mouton parmi bann loulou. 4Pa anmenn ni portmonnen, ni sak, ni sandal; pa dir bonzour personn lo semen. 5Dan nenport lakaz kot zot antre, zot ava dir: Lape pour sa lakaz! 6Si i annan en dimoun la, ki oule lape, ou swe lape ava reste avek li; sinon, ou swe lape ava retourn avek ou.

7Reste dan sa lakaz; manze e bwar tou sa ki zot ofer ou, akoz en zouvriye i merit son lapey. Pa pas kazankaz. 8Sak fwa ki zot antre dan en lavil e ki zot ganny byen resevwar, manz sa ki zot ganny ofer. 9Geri bann malad dan sa lavil e dir zot: Rwayonm Bondye in ariv pros avek zot.

10Me kan zot antre dan en lavil kot zot pa ganny resevwar, sorti, al dan semen e dir avek tou dimoun: 11Nou sekwe kont zot, lapousyer zot lavil ki'n kole avek nou lipye. Me konnen kanmenm ki Rwayonm Bondye in ariv pros avek zot.

12Mon dir zot ki zour zizman, Bondye pou mwen sever anver Sodonm#10.12 War Zen 19.24-28., ki anver sa lavil.”

Bann Lavil ki Refize Kwar

(Mat 11.20-24)

13Maler lo ou Korazin! Maler lo ou Betsayda! Si bann mirak ki'n ganny fer kot zot ti'n ariv dan lavil Tir ek Sidon, depi lontan zot bann zabitan ti ava'n met lenz dey, e kouver zot avek lasann. 14Pour sa rezon, zour zizman, Bondye pou mwen sever anver Tir ek Sidon ki anver zot.

15Ou Kapernaoum! Eski ou krwar ou pou ganny leve ziska lesyel? Non! Ou pou ganny abese ziska dan lemonn lanmor!

16Sa enn ki ekout zot, i ekout mwan; sa enn ki rezet zot, i rezet mwan, e sa enn ki rezet mwan, i rezet sa Enn ki'n anvoy mwan.

Retour Swasanndouz Disip

17Sa 72 disip ti retournen dan lazwa. Zot ti dir, “Senyer! Lo ou non, menm bann demon in obei nou.”

18Zezi ti dir zot, “Mon ti war Satan tonbe sorti dan lesyel parey en zekler. 19Mon'n donn zot lotorite pour kraz serpan ek skorpyon e tou pouvwar lo lennmi. Nanryen pa pou kapab fer zot ditor. 20Malgre sa, pa rezoui akoz bann lespri in soumet avek zot; me rezoui plito akoz zot non in ganny ekri dan lesyel.”

Zezi I dan Lazwa

(Mat 11.25-27; 13.16-17)

21Dan sa menm moman, Lespri Sen ti ranpli Zezi avek lazwa. I ti dir, “Mon Papa, Senyer lesyel ek later! Mon remersye ou akoz ou'n kasyet sa bann keksoz avek bann saz ek bann entelizan, me ou'n revel zot avek bann pti zanfan. Wi, Papa, sanmenm sa ki fer ou plezir.

22Mon Papa in donn mwan tou pouvwar. Personn pa konnen ki son Garson i ete, eksepte son Papa, e personn pa konn mon Papa, eksepte son Garson ek bann ki son Garson in swazir pour revel li.”

23Apre, Zezi ti tourn ver son bann disip. I ti dir avek zot tousel, “Ere sa lizye ki pe war sa ki zot war! 24Annefe, mon dir zot, bokou profet ek lerwa ti ava anvi war sa ki zot war, me zot pa'n war; antann sa ki zot pe tande, me zot pa'n tande.”

Parabol Bon Samariten

25Alor, en profeser Lalwa ti leve pour esey met Zezi dan en pyez. I ti demann li, “Met! Ki fodre mon fer pour erit lavi eternel?”

26Zezi ti dir li, “Kwa ki'n ekri dan Lalwa? Ki ou lir?”

27Sa profeser Lalwa ti reponn li, “Kontan Senyer ou Bondye avek tou ou leker, avek ou et antye, avek tou ou lafors, avek tou ou lespri, e ou prosen parey ou menm#10.27 Det 6.5; Lev 19.18..”

28Zezi ti dir li, “Ou'n byen reponn. Fer tousala e ou ava viv.”

29Me pour zistifye son lekor, sa profeser Lalwa ti demann Zezi, “Lekel ki mon prosen?”

30Zezi ti reponn, “En zonm ti pe desann, sorti Zerizalenm pour al Zeriko. Bann bandi ti atak li, depouy li, bat li e kit li demi mor.

31Par azar, en pret ti pe desann par sa menm semen. Kan i ti war sa zonm blese, i ti pas lo lot kote semen.

32En levit osi ti ariv dan sa landrwa. Kan i ti war sa zonm, li osi i ti pas lot kote semen.

33Me en Samariten, ki ti an vwayaz, ti ariv pre kot sa zonm. Kan i ti war sa zonm blese, i ti pran pitye. 34I ti apros li, vers delwil ek diven lo son blesir#10.34 Dan sa lepok, delwil ti servi pour kalme douler e diven pour dezenfekte en boubou. e met en pansman. Apre, i ti met li lo son prop bourik e anmenn li dan en lotel kot i ti pran swen avek li.

35Lannmen, i ti pran de pyes larzan ki i ti donn propriyeter lotel. I ti dir li: Pran swen avek sa zonm. Sa ki ou depans anplis, mon ava pey ou kan mon ava retournen.

36Dapre ou, lekel parmi sa trwa dimoun, ki'n azir koman prosen sa zonm ki ti ganny atake par bann bandi?”

37I ti reponn, “Sa enn ki'n montre konpasyon anver li.”

Zezi ti dir li, “Ale! Ou osi fer parey.”

Zezi kot Mart ek Mari

38Pandan ki zot ti pe marse, Zezi ek son bann disip ti antre dan en vilaz. En fanm ki ti apel Mart ti resevwar li dan son lakaz.

39Mart ti annan en ser ki ti apel Mari, ki ti al asiz obor lipye Zezi e ekout li koze#10.39 War Zn 11.1; 12.1-3.. 40Mart, ti pe okipe avek bann diferan tripo domestik. I ti vin dir avek Zezi, “Senyer! Ou pa dir mon ser nanryen? I les mwan tousel pour servi. Dir li vin ed mwan.”

41Senyer ti reponn li, “Mart, Mart! Ou enkyet e ou trakas pour bokou keksoz. 42En sel keksoz i neseser. Mari in swazir sa meyer par ki personn pa pou ganny pran avek li.”

Currently Selected:

Lik 10: BSK

Highlight

Copy