Lik 12

Akizasyon kont Lipokrizi

(Mat 10.26-27)

1Pandan sa letan, plizyer milye dimoun ti'n rasanble e ti pe mars lo lipye kanmarad. Zezi ti dir dabor avek son bann disip, “Fer atansyon lelven bann Farizyen, savedir zot lipokrizi. 2Napa nanryen ki'n kouver ki pa pou ganny dekouver, e napa nanryen ki'n kasyet ki pa pou ganny devwale. 3Pour sa rezon, tou keksoz ki zot in dir dan fernwanr pou ganny proklanmen dan gran lizour, e sa ki zot in dir dousman dan zorey, dan bann lasanm an sekre, pou ganny proklanmen lo bann twa lakaz.”

Lekel Ou Devre Per

(Mat 10.28-31)

4“Mon dir zot, mon bann zanmi! Pa bezwen per sa bann ki touy lekor me ki apre, pa kapab fer nanryen plis. 5Mon ava montre zot lekel ki zot devre per: Zot devre per sa enn ki kapab touy lekor, e osi annan pouvwar pour zet zot dan lanfer. Mon dir zot: Sanmenm sa enn ki zot devre per.

6Eski senk sren pa i vann pour de sou? Me napa enn ki Bondye i oubliye. 7Byen plis ankor: Menm bren seve lo ou latet in ganny konte. Pa bezwen per; zot vo plis ki en kantite sren.”

Napa Pardon pour Pese Kont Lespri Sen

(Mat 10.19-20, 32-33; 12.32)

8“Mon dir zot, nenport ki, ki rekonnet mwan devan zonm, Fis-de-Lonm osi pour rekonnet li devan bann lanz Bondye. 9Me sa enn ki rezet mwan devan zonm, mwan osi mon pou rezet li devan bann lanz Bondye.

10Tou dimoun ki koz kont Fis-de-Lonm ava ganny pardonnen. Me sa enn ki blasfenm kont Lespri Sen pa pou ganny pardonnen.

11Kan zot ava ganny anmennen dan bann sinagog pour ganny zize, oubyen devan bann sef ek bann lotorite, pa bezwen trakase koman zot pou defann zot lekor, oubyen ki zot pou dir. 12Annefe, Lespri Sen ava montre zot sa ki zot pou dir dan sa moman menm.”

Parabol En Zonm Ris

13En dimoun dan lafoul ti dir Zezi, “Met! Dir mon frer partaz nou leritaz avek mwan.”

14Me Zezi ti dir li, “Lekel ki'n apwent mwan ziz pour partaz zot bann byen?”

15Alor i ti dir zot, “Fer atansyon lanmour pour larises, akoz lavi en zonm pa depann zis lo son larises.”

16Alor, Zezi ti rakont zot sa parabol, “Ti annan en zonm ki ti annan en propriyete ki ti'n raport li en bon rekolt. 17Alor, i ti mazin dan li menm: Ki mon pou fer? Mon napa okenn landrwa pour met mon rekolt. 18I ti dir: Mon konnen ki mon pou fer. Mon pou kas mon bann langar rezerv e fer lezot ki pli gran kot mon ava anmas tou mon lagrenn ek lezot prodwi. 19Apre, mon ava dir dan mwan menm: Rekolt ki ou'n anmase i ase pour plizyer lannen. Alor, repoz ou, manze, bwar e anmize!

20Me Bondye ti dir li: Enbesil! Tanto menm ou pou bezwen rann kont ou lavi. Lekel ki pou ganny tou sa ki ou'n anmase?”

21Zezi ti azoute, “Sanmenm sa ki arive avek sa enn ki anmas larises pour li menm, me ki pa ris devan Bondye.”

Annan Konfyans dan Bondye

(Mat 6.25-34)

22Zezi ti dir avek son bann disip, “Pour sa rezon, mon dir zot pa bezwen trakase lo size zot lavi, pour konnen ki zot pou manze; ni pour zot lekor, pour konnen ki zot pou mete. 23Annefe, lavi i pli enportan ki manze, e lekor i pli enportan ki lenz.

24Get bann korbo: Zot pa ni senmen, ni rekolte. Zot napa ni langar rezerv, ni grennyen, e pourtan, Bondye i nouri zot. Pa zot vo plis ki bann zwazo!

25Lekel parmi zot ki krwar i kapab viv pli lontan kan i pran traka? 26Alor, si ou pa kapab fer nanryen pour en senp keksoz parey, akoz ou enkyet pour lezot?

27Gete koman bann lis i pouse: Zot pa ni travay, ni trikote. Pourtan, mon dir zot, menm Salomon dan tou son mazeste#12.27 War 1 Rwa 10., pa ti osi byen abiye ki en sel sa bann lis. 28Si Bondye i abiy byen bann zerb dan laplenn, ki demen pou ganny brile dan dife, pa i pou donn zot lenz ek tou sa ki zot bezwen, zot ki napa bokou lafwa?

29Alor, pa trakase pour konnen ki zot pou manze, ni ki zot pou bwar. 30Bann nasyon dan lemonn ki kontinyen rod tousala. Me zot, zot Papa i konnen kwa ki zot bezwen. 31Rod plito Rwayonm Bondye, e zot ava ganny tou sa bann keksoz osi.”

Larises dan Lesyel

(Mat 6.19-21)

32“Pa bezwen per, pti troupo! Zot Papa in pran plezir donn zot son Rwayonm. 33Vann tou sa ki zot posede e donn sa larzan bann pov. Fer bann portmonnen ki pa ize, e anmas zot larises dan lesyel, kot voler pa kapab aprose, e kot karya pa kapab detri. 34Annefe, zot leker pou touzour la kot zot larises i ete.”

Bann Bon Serviter

35“Met zot pare, zot sang otour zot leren e gard zot lalanp alimen. 36Zot osi, fer parey bann zonm ki pe esper zot met retournen sorti lafet maryaz, pour ki koman i arive, e tap laport, zot ava kapab ouver pour li. 37Ere sa bann serviter ki zot met i war pe veye kan i arive! Mon dir zot, sa i laverite: I pou met son tabliye, fer zot osi asiz atab, e servi zot. 38Ere sa bann serviter ki zot met i trouv zot pare, menm si i ariv minwi oubyen plitar!

39Konpran sa byen: Si en met lakaz ti konnen ki ler voler pou vini, i ti ava veye e i pa ti pou les voler kas son lakaz. 40Zot osi, zot bezwen touzour pare, akoz Fis-de-Lonm pou vin en ler ki zot pa pe mazinen.”

Serviter Fidel ek Serviter Enfidel

(Mat 24.45-51)

41Alor, Pyer ti demande, “Senyer! Eski ou pe dir sa parabol zis pour nou, oubyen pour tou dimoun?”

42Zezi ti reponn li, “Lekel sa serviter fidel e onnet ki son met ava etabli li ansarz son lakour pour li donn lezot serviter zot rasyon dible kan fodre? 43Ere sa serviter si son met i war li pe fer son travay kan i arive! 44Mon dir zot, sa i laverite: Son met pou konfye li tou son byen.

45Me si sa serviter i dir dan li menm: Mon met i pran lontan pour li retournen; e si i konmans bat lezot serviter ek servant, manze e bwar ziska i sou, 46met sa serviter, pou retournen kan i pa pe atann e en ler ki i pa konnen. I pou pini li, e fer li partaz sor bann move serviter.

47Sa serviter ki ti konn lavolonte son met, me ki pa ti met li pare, ni fer sa ki son met ti oule, ava ganny en bon bate. 48Tandis ki sa enn ki pa ti konnen, e ki'n fer keksoz ki merit ganny pini, li, i pou ganny bate bokou mwens. Annefe, sa enn ki resevwar bokou, pou bezwen rann kont bokou. Sa enn ki'n ganny konfye bokou, pou bezwen rann kont ankor plis.”

Zezi Lakoz Divizyon

(Mat 10.34-36)

49“Mon'n vin anmenn en dife lo later, e mon ti ava kontan si i ti ava'n deza alimen! 50Mon pou resevwar en batenm e i en soufrans pour mwan ziska ki i arive. 51Eski zot krwar ki mon'n vin anmenn lape lo later? Non, mon dir zot, plito divizyon. 52Dezormen, dan en fanmir senk dimoun, pou annan divizyon trwa kont de, e de kont trwa. 53Pou annan divizyon: Papa kont garson; garson kont papa; manman kont fiy e fiy kont manman, belmer kont belfiy e belfiy kont belmer#12.53 War Mis 7.6..”

Konpran bann Siny Letan

(Mat 16.2-3)

54Zezi ti osi dir avek lafoul, “Kan ou war en nyaz monte dan Was, ou dir deswit: Lapli pe vini. Sanmenm sa ki arive.

55Kan vandsid i soufle, ou dir: I pou fer so. Sanmenm sa ki arive.

56Bann ipokrit! Zot konn enterpret bann siny lo later e dan lesyel. Alor, akoz zot pa konn enterpret siny nou lepok?”

Rod Laranzman avek ou Lennmi

(Mat 5.25-26)

57“Akoz zot pa zize zot menm kwa ki zis pou fer? 58Si dimoun ki'n akiz ou pe anmenn ou devan lakour, fer mannyer ganny en laranzman avek li pandan ki zot ankor lo semen. Sankwa i riske trenn ou devan ziz, e ziz ava larg ou dan lanmen lapolis, e lapolis ava zet ou dan prizon.

59Mon dir ou, ou pa pou sorti dan prizon, tan ki ou pa'n pey ziska dernyen sou.”

Currently Selected:

Lik 12: BSK

Highlight

Copy