Lik 13

Bezwen En Sanzman Lavi

1Dan sa letan, de trwa dimoun ti vin raport avek Zezi sa ki ti arive avek bann Galileen, ki Pilat ti fer touye, pandan ki zot ti pe ofer sakrifis. 2Zezi ti reponn zot, “Eski zot krwar ki sa bann Galileen ki ti mor dan sa fason ti'n fer plis pese ki lezot Galileen? 3Non, mon dir zot. Me si zot pa repanti e sanz zot lavi, zot tou, zot pou mor parey.

4Oubyen sa 18 dimoun ki ti ganny kraze kan latour dan vilaz Siloe ti tonbe: Eski zot krwar ki sa bann dimoun ti pli koupab ki tou lezot zabitan Zerizalenm? 5Non, mon dir zot. Me si zot tou, zot pa sanz zot lavi, zot pou disparet parey.”

Parabol Pye Fig Steril

6Answit, Zezi ti dir zot sa parabol, “En zonm ti'n plant en pye fig dan son plantasyon rezen. I ti vin rod fri lo la, me i pa ti trouv nanryen.

7Alor i ti dir avek son zardinyen: I fer 3 an depi ki mon pe vin rod fri lo sa pye fig e mon pa trouv okenn. Koup li. Akfer nou pe les li okip later pour nanryen?”

8Me sa zardinyen ti reponn li, “Met! Les li ankor sa lannen. Mon ava fouy toultour li e met fimyen. 9Petet i ava donn fri lannen prosenn. Sinon, ou ava kapab fer koup li.”

Zezi I Geri En Fanm Zour Saba

10En zour saba, Zezi ti pe ansennyen dan en sinagog. 11La, ti annan en fanm ki en move lespri ti'n gard li kourbe depi 18 an e i pa ti kapab debout drwat. 12Kan Zezi ti war li, i ti apel li, “Fanm, ou'n ganny delivre avek ou maladi.”

13Zezi ti poz lanmen lo li e deswit sa fanm ti dres debout e konmans loue Bondye.

14Me sef sinagog ti ankoler akoz Zezi ti'n geri en malad zour saba. I ti dir avek lafoul, “I annan sis zour pour travay#13.14 War Egz 20.9-10; Det 5.13-14.. Vin rod gerizon pandan sa bann zour, me pa zour saba.”

15Zezi ti reponn li, “Bann ipokrit! Zot tou, pa zot delarg zot bef oubyen zot bourik zour saba pour anmenn li bwar?

16Sa fanm, en fiy Abrahanm ki Satan ti'n anmare pandan 18 an, pa ti devre ganny delarge zour saba?”

17Sa repons Zezi ti fer tou son bann lennmi kanmi. Me lafoul ti dan lazwa, pour tou sa bann mervey ki Zezi ti'n fer.

Parabol Lagrenn Moutard

(Mat 13.31-32; Mrk 4.30-32)

18Alor, Zezi ti dir, “Avek kwa Rwayonm Bondye i resanble? Avek kwa mon ava konpar li?

19I parey en lagrenn moutard ki en zonm ti pran e zet dan son zarden. Sa lagrenn ti pouse; i ti vin en pye dibwa e bann zwazo dan lezer ti fer zot nik dan son bann brans.”

Parabol Lelven

(Mat 13.33)

20Zezi ti dir ankor, “Avek kwa mon pou konpar Rwayonm Bondye? 21I parey lelven ki en fanm ti pran e met dan trwa mezir lafarin pour fer leve lapat.”

Laport Etrwat

(Mat 7.13-14, 21-23)

22Pandan ki i ti pe mont ver Zerizalenm, Zezi ti travers bann lavil ek vilaz kot i ti ansennyen. 23En dimoun ti demann li, “Senyer! Eski zis en pti pe dimoun ki pou ganny sove?”

24Zezi ti reponn, “Fer tou pour antre par laport etrwat, akoz, mon pe dir zot, bokou pou oule antre, me zot pa pou kapab.

25Kan met lakaz ava leve e ferm son laport, zot pou debout deor e zot pou konmans tap laport an dizan: Senyer, ouver, les nou antre! I pou reponn zot: Mon pa konnen kote zot sorti!

26Alor, zot ava konmans dir: Nou'n manze e bwar avek ou e ou'n ansenny dan bann lari nou lavil.

27Me i pou reponn: Mon pa konnen kote zot sorti. Sorti kot mwan, zot tou ki komet lenzistis! 28La, zot pou plere e grens ledan. Annefe, zot pou war Abrahanm, Izaak ek Zakob, ek tou bann profet dan Rwayonm Bondye. Me zot, zot in ganny zet deor. 29Dimoun pour sorti dan Les, Was, Nor e Sid; zot pou pran plas dan festen Rwayonm Bondye.

30Mon pe dir zot, pou annan bann dernyen ki pou pas premye e bann premye ki pou pas dernyen.”

Zezi I Plere lo Zerizalenm

(Mat 23.37-39)

31Pandan sa menm moman, detrwa Farizyen ti vin dir Zezi, “Pa reste isi, al dan en lot landrwa, akoz Herod i oule touy ou.”

32Zezi ti reponn zot, “Al dir sa renar: Ozordi ek demen, mon pe sas bann move lespri e geri bann malad. Me trwazyenm zour mon pou fini mon travay. 33Ozordi, demen ek apredmen mon bezwen kontiny mon semen, akoz i pa normal pour en profet mor an deor Zerizalenm.

34Zerizalenm, Zerizalenm! Ou ki touy bann profet e donn koudros bann ki Bondye in anvoy kot ou! Konbyen fwa mon ti oule rasanble ou bann zanfan, parey en mer poul i rasanble son bann piti anba son lezel, me ou pa'n oule! 35Aprezan, ou lakaz in ganny abandonnen. Mon dir zot, zot pa pou war mwan ankor ziska ki zot ava dir: I ganny beni, sa enn ki pe vini lo non Senyer#13.35 Ps 118.26.!”

Currently Selected:

Lik 13: BSK

Highlight

Copy