Zenez 35

Bondye I Beni Zakob Betel

1Bondye ti dir Zakob, “Leve! Al Betel e reste laba. Fer en lotel pour Bondye ki ti aparet avek ou kan ou ti pe sov ou frer, Ezai.”

2Alor, Zakob ti dir avek tou son fanmir e tou sa ki ti avek li, “Rezet tou bann bondye etranze, pirifye zot lekor e sanz zot lenz. 3Apre, annou leve e al Betel, pour mwan kapab fer en lotel pour Bondye ki ti ekout mwan kan mon ti dan detres e ki'n avek mwan partou kot mon'n ale.”

4Alor, zot ti donn Zakob tou zot bann bondye etranze ki zot ti annan, e tou bann zanno ki ti dan zot zorey. Zakob ti anter zot anba pye dibwa sakre pre Sikenm. 5Pandan ki zot ti pe ale, lafreyer Bondye ti tonm lo bann lavil otour zot, e personn pa ti pourswiv bann garson Zakob.

6Zakob ti ariv Louz, setadir Betel, dan pei Kanaan, ansanm avek tou bann dimoun ki ti avek li. 7La, i ti konstri en lotel, e i ti apel sa landrwa El-Betel, akoz ti la ki Bondye ti'n revel li avek Zakob, kan i ti pe sov son frer. 8Debora, nouris Rebeka, ti mor, e i ti ganny antere anba en pye dibwa sakre, Betel. Zot ti apel sa landrwa Alon-Bakout, savedir pye dibwa larm.

9Bondye ti aparet avek Zakob ankor, kan i ti sorti Padann-Aranm, e beni li. 10Bondye ti dir li, “Ou non i Zakob. Ou pou nepli apel Zakob, me Izrael.” Alor i ti apel li Izrael. 11Bondye ti dir li:

Mwan menm Bondye Toupwisan.

Ou pou ganny bokou zanfan;

ou desandans pou ogmante.

Ou pou vin papa en nasyon e en group nasyon.

Pou osi annan lerwa parmi ou desandans.

12Sa pei ki mon'n donn Abrahanm ek Izaak,

mon pou donn ou.

Mon pou osi donn li ou desandans.

13Apre, Bondye ti kit sa landrwa kot i ti koz avek li. 14Zakob ti etabli en ros pilye dan sa landrwa kot Bondye ti'n koz avek li. I ti vers en lofrann labwason lo la, e vers delwil osi. 15Zakob ti apel sa landrwa kot Bondye ti'n koz avek li, Betel.

Lanmor Rasel

16Zakob ek son fanmir ti kit Betel, e kan zot ti en distans avek Efrata, Rasel ti ganny son baba e son lakousman ti difisil. 17Letan ki i ti dan difikilte lakousman, son sazfanm ti dir li, “Pa trakase, ou pe ganny ankor en lot garson.” 18Rasel ti pe mor, me avan i mor, i ti apel li Ben-Oni, savedir, zanfan douler; me Zakob ti apel li Benzamen, savedir zanfan lanmen drwat.

19Rasel ti mor, e i ti ganny antere lo semen Efrata, Betlehenm. 20Zakob ti plas en ros pilye lo son latonm. Se sa ros pilye ki mark latonm Rasel, ziska ozordi. 21Izrael ti kontiny son vwayaz. I ti plant son latant lo lot kote Midal-Eder.

Bann Garson Zakob

22Pandan ki Izrael ti reste dan sa pei, Riben ti al dormi avek Bila, menazer son papa. Zakob ti antann sa.

Zakob ti annan 12 garson: 23Bann garson ki i ti ganny avek Lea: Riben, lene, Simeon, Levi, Zida, Isakar, ek Zabilon. 24Bann garson ki i ti ganny avek Rasel: Zozef ek Benzamen. 25Bann garson ki i ti ganny avek Bila, servant Rasel: Dann ek Neftali. 26Bann garson ki i ti ganny avek Zilpa, servant Lea: Gad ek Aser. Sa se bann garson Zakob ki ti ne Padann-Aranm.

Lanmor Izaak

27Zakob ti vin kot son papa, Izaak, Manmre, pre Kiryat-Arba, setadir Hebron, kot Abrahanm ek Izaak ti'n reste. 28Izaak ti viv ziska laz 128 an. 29Izaak ti mor, apre en bon vyeyes; i ti al rezwenn son bann zanset. Son garson Ezai ek Zakob ti anter li.

Currently Selected:

Zenez 35: BSK

Highlight

Copy