Zenez 34
34
Dina I Ganny Vyole
1Dina, fiy Lea ek Zakob ti al vizit bann fanm dan sa pei. 2Kan Sikenm, garson Hamor, en sef Hivit dan sa rezyon, ti war li, i ti atrap li e dormi avek li. 3I ti kontan Dina, fiy Zakob e i ti esey ganny son leker. 4Sikenm ti koz avek son papa, Hamor. I ti dir li, “Fer mwan ganny sa fiy pour mwan fer li mon fanm.”
5Zakob ti'n antann ki Sikenm ti'n vyol Dina. Me son bann garson ti avek bann troupo dan laplenn. Alor, i ti reste trankil ziska zot reste trankil ziska ki zot ti retournen.
6Hamor, papa Sikenm ti al kot Zakob pour koz avek li. 7Bann garson Zakob ti arive e zot ti tre ankoler, akoz Sikenm ti'n komet en aksyon degoutan dan Izrael, ler i ti dormi avek fiy Zakob. En tel keksoz pa devre zanmen ganny komet.
8Hamor ti koz avek zot. I ti dir, “Mon garson Sikenm i kontan ou fiy. Mon enplor ou, donn li ou fiy an maryaz. 9Fer en maryaz avek nou. Donn nou ou fiy e nou ava donn ou sa ki pour nou. 10Ou kapab reste avek nou, pei i ouver osi pour ou. Reste e fer komers avek nou e ou ava kapab aste propriyete.”
11Sikenm ti osi dir avek papa ek bann frer Dina, “Si zot aksepte mwan, mon ava donn ou tou sa ki zot demande. 12Demann mwan nenport kado maryaz e mon ava donnen. Zis les mwan marye avek Dina.”
13Bann garson Zakob, ti manti avek Sikenm ek son papa, Hamor, akoz i ti'n vyol zot ser, Dina. 14Zot ti dir, “Nou pa kapab donn nou ser en dimoun ki pa'n sirkonsi, akoz sa i ava en laont lo nou. 15Nou kapab aksepte lo en sel kondisyon: Si ou dakor pour vin parey nou e sirkonsi tou bann mal parmi zot. 16Apre, nou ava donn ou nou bann fiy e nou ava pran ou bann fiy e nou ava reste avek ou e nou ava vin en sel pep. 17Me si ou pa ekout nou e aksepte fer sirkonsizyon, alor nou ava pran nou fiy e nou ava ale.”
18Zot parol ti satisfer Hamor ek son garson Sikenm. 19I ti aksepte pour fer sirkonsizyon toudswit, akoz i ti kontan Dina. Son fanmir ti pli kontan li.
20Hamor ek son garson Sikenm ti vin kot laport lavil e koz avek bann zonm dan lavil. Zot ti dir, 21“Sa bann dimoun i nou zanmi; les zot reste dan nou pei, e fer komers. Nou later i ase gran pour zot. Les zot marye avek nou bann fiy. 22Zot annan zis en kondisyon pour zot dakor pour reste avek nou e vin en sel pep: Fodre ki tou zonm parmi nou i ganny sirkonsi, parey zot. 23Eski tou zot bef, zot propriyete ek zot zannimo pa pou vin pour nou? Annou alor dakor avek zot e zot ava reste avek nou.”
24Zot tou, zot ti dakor avek Hamor ek son garson Sikenm. Tou bann zonm dan lavil ti ganny sirkonsi.
25Trwazyenm zour, kan zot ti ankor dan douler, de bann garson Zakob, Simeon ek Levi, frer Dina ti pran zot lepe e al dan lavil e touy bann zonm san eksepsyon. 26Zot ti touy Hamor ek son garson Sikenm avek zot lepe e pran Dina, dan lakaz Sikenm. 27Bann garson Zakob ti touy sa bann dimoun e detri zot lavil, akoz zot ser ki ti'n ganny vyole. 28Zot ti pran zot troupo ek zot bourik e tou sa ki ti dan lavil e dan bann plantasyon. 29Zot ti pran tou zot larises, zot zanfan, zot fanm, e tou sa ki ti annan dan lakaz.
30Zakob ti dir Simeon ek Levi, “Zot in anmenn problenm lo mwan par sa aksyon avek bann Kananeen, ek bann Perizit. Napa bokou nou, e si zot rasanble kont mwan e atak mwan, mon pou ganny detri avek tou mon fanmir.”
31Zot ti dir, “Eski i ti devre tret nou ser koman en prostitye?”
Currently Selected:
Zenez 34: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
