Psonm 38
38
Lapriyer En Dimoun ki pe Soufer
En psonm David pour en lofrann remersiman.
1SENYER! Dan ou lakoler
pa kondann mwan.
Koriz mwan me pa avek lakoler.
2Ou'n transpers mwan avek ou bann dart,
ou lanmen in kraz mwan.
3Akoz ou lakoler, mon lekor pa byen.
Akoz mon bann pese,
mon lekor antye i malad.
4Mon bann fot in kouver mwan;
zot in vin en fardo tro lour pour mwan.
5Akoz mon bann betiz,
mon bann boubou i pi e enfekte.
6Mon kourbe avek douler;
mon plere tou lazournen dan lapenn.
7Mon lekor i brile avek lafyev,
tou mon lezo i fermal.
8Mon nepli annan lafors, mon'n kase;
mon ronfle avek douler dan mon leker.
9SENYER! Ou konn byen tou mon dezir;
ou antann mon bann soupir.
10Mon ganny palpitasyon,
mon lafors pe kit mwan,
mon lizye pe vin sonm.
11Mon bann zanmi ek mon bann vwazen
i reste lwen avek mwan akoz mon maladi.
Mon fanmir nepli frekant mwan.
12Sa bann ki swet mon lanmor
zot met zot latrap.
Sa bann ki anvi mon maler
pe fer mannyer pour detri mwan.
Tou lazournen zot dir dimal lo mwan.
13Me mon fer sourdorey; mon pa antann.
Parey en kozpa, mon pa dir nanryen.
14Mon parey en dimoun ki pa antann
e okenn repons pa sorti dan son labous.
15SENYER! Mon kont lo ou.
SENYER, mon Bondye!
Ou ki pou reponn mwan.
16Mon demann ou:
Pa les zot riy mwan!
Pa les zot rezoui kan mon fer en fo pa.
17Annefe, mon pre pour mwan tonbe;
mon douler pa kit mwan.
18Mon rekonnet mon fot,
mon regret mon pese.
19Mon bann lennmi,
zot byen portan e for;
en kantite parmi zot pe ay mwan san rezon.
20Sa bann ki rann dimal pour dibyen,
zot akiz mwan akoz mon esey fer sa ki byen.
21SENYER! Pa abandonn mwan.
Mon Bondye! Pa reste lwen avek mwan.
22SENYER! Mon Sover.
Pa tarde pou sekour mwan.
Currently Selected:
Psonm 38: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
