Psonm 37
37
Sor bann Bon ek Move Dimoun
Psonm David.
1Pa bezwen pran lakoler kont bann malfeter;
pa bezwen zalou bann kriminel.
2Zot pa pou tarde pour sek parey zerb
e fletri parey fey ver.
3Met ou konfyans dan SENYER
e fer sa ki byen.
Alor, ou ava viv anpe e an sekirite dan sa pei.
4Pran pli gran plezir dan SENYER.
I ava donn ou,
tou sa ki ou leker i dezir.
5Konfye SENYER ou lavi.
Remet tou sa ki ou fer dan lanmen SENYER.
6I ava fer paret ou lazistis
parey lalimyer granmaten
e ou bann drwa parey soley midi.
7Gard silans devan SENYER,
esper li avek pasyans.
Pa pran lakoler
kont sa bann ki reisi dan lavi,
kont sa ki fer bann move kou.
8Pa pran lakoler,
reste trankil; gard ou kalm,
sankwa tou pou mal fini.
9Annefe, bann malfeter pou ganny eliminen;
me bann ki met zot konfyans dan SENYER,
pou posed pei.
10Dan ankor en pti pe letan,
bann malfeter pou disparet.
Ou pou rod zot kot zot ti ete,
me zot pou nepli la.
11Me bann pov ki pou posed pei.
Zot ava viv dan en lape total.
12Bann malfeter i fer konplo
kont sa enn ki zis;
zot grens son ledan kont li.
13Me sa i fer SENYER riye,
akoz i war zour zot zizman vini.
14Bann malfeter i tir zot lepe;
zot prepar zot dart
pour touy sa enn ki pov e ki malere,
pour touy sa enn ki mars lo bon semen.
15Me zot pou ganny touye avek zot prop lepe
e zot dart pou kase.
16Sa pti gin ki en zis i posede,
i preferab ki larises bokou malfeter.
17Annefe, pouvwar bann malfeter
pou ganny detri;
me SENYER i soutenir sa enn ki zis.
18SENYER i konn lavi bann dimoun
ki kondwir zot byen.
Zot later ava pour zot pour touzour.
19Zot pou gard latet byen o dan maler.
Dan letan lafanmin, zot pou annan dekwa manze.
20Me bann malfeter pou ganny detri.
Bann lennmi SENYER pou disparet
parey bann fler dan lakanpanny.
Zot pou ale, zot pou disparet parey lafimen.
21Malfeter i demann pret larzan
me zanmen i rann.
Sa enn ki obei SENYER i annan pitye
e i touzour partaze.
22Sa bann ki SENYER in beni pou posed pei.
Me sa bann ki i'n modi pou ganny eliminen.
23SENYER i gid lavi sa enn ki obei li.
I protez sa enn ki fer li plezir.
24Si i perdi lekilib i pa tonbe,
akoz SENYER i atrap son lanmen.
25Mon ti zenn, ozordi mon'n vye.
Zanmen mon'n war
en dimoun zis ganny abandonnen,
ni son bann zanfan pe mandyan manze.
26Tou le zour i montre zenerozite
e i prete;
son bann zanfan i en benediksyon.
27Aret fer sa ki mal, pratik sa ki byen
e ou ava reste dan sa pei pour touzour.
28Annefe, SENYER i kontan lazistis.
I pa pou abandonn dimoun ki fidel.
29Sa enn ki obei SENYER pou posed pei
kot i pou reste pour touzour.
30Dan labous bann zis,
i sorti parol lasazes e parol drwat.
31I gard lalwa son Bondye dan son leker;
i pa fer okenn fo pa.
32En malfeter i espyonn sa enn ki zis;
i rode ki mannyer pour touy li.
33Me SENYER pa pou abandonn li.
Dan en prose i pa pou les li ganny kondannen.
34Met ou konfyans dan SENYER
e swiv son semen.
I ava fer ou loner posed sa pei
e ou ava war malfeter ganny detri.
35Mon'n war move dimoun vin pwisan
e devlope parey en pye sed Liban.
36Me kan mon ti retournen, i ti nepli la.
Mon ti rod li, me i ti'n disparet.
37Obzerv byen en dimoun onnet;
get sa enn ki senp e drwat.
Sa enn ki kontan lape pour viv lontan.
38Me tou bann ki revolte
pou ganny detri;
zot bann desandan pou disparet.
39SENYER i sov sa bann ki obei li.
I protez zot dan letan maler.
40SENYER i ed zot e i sov zot.
I delivre zot kont bann malfeter
e i sov zot,
akoz zot pran li koman zot labri.
Currently Selected:
Psonm 37: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
