Psonm 36
36
Mesanste Dimoun
Psonm David, serviter SENYER. Pour sef lakoral.
1Dan fon mon leker,
mon mazin mesanste zonm:
Dan fon son leker, i napa respe pour Bondye.
2I flat son lekor ki i pa rekonnet son pese.
I mazinen ki Bondye
pa pou war son pese e kondann li.
3Dan son labous i sorti zis mansonz ek frod;
i nepli fer sa ki byen, sa ki saz.
4I prepar son bann move kou depi dan son lili.
I antete swiv move semen;
i pa fer nanryen ki byen.
Bondye I Bon
5SENYER! Ou fidelite i tous lesyel.
Ou lanmour i ariv ziska dan nyaz.
6Ou lazistis i depas bann montanny;
ou bann zizman i desann
ziska dan profonder lanmer.
SENYER! Ou sov bann et imen ek bann zannimo.
7SENYER! Ou fidelite i tre presye.
Tou imen i vin abrit dan lonbraz ou lezel.
8Kot ou, manze i annabondans;
ou fer zot bwar dan larivyer ou labonte.
9Ou menm sours lavi;
dan ou lalimyer, nou war lalimyer.
10Kontinyen montre ou fidelite
anver sa bann ki konn ou lazistis,
anver sa bann ki annan leker drwat.
11Pa les sa bann arogan
kraz mwan anba zot lipye.
Pa les lanmen bann malfeter domin mwan.
12La bann malfeter in tonbe.
Zot in ganny ranverse e zot pa kapab leve.
Currently Selected:
Psonm 36: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
