Psonm 35
35
Lapriyer pour Demann Sekour
Psonm David.
1SENYER! Akiz sa bann ki akiz mwan.
Atak sa bann ki atak mwan.
2Pran ou bann boukliye!
Leve! Vin sekour mwan.
3Pran ou lans ek ou sagay
kont sa bann ki pe persekit mwan.
Dir mwan: Mwan menm ou sover.
4Kouver sa bann ki oule touy mwan
avek laont ek dezoner.
Fer sa bann ki pe fer konplo kont mwan
rekile e kanmi.
5Lanz SENYER ava sas zot.
Zot ava vin koman lapay ki anvole dan divan.
6Lanz SENYER ava pourswiv zot.
Zot semen pou dan fernwanr
e zot ava glise.
7San okenn rezon, zot in met en latrap kont mwan.
San okenn rezon,
zot in fouy en trou pour mwan.
8Fer en gran maler tonm lo zot par sirpriz.
Fer zot tonm dan zot prop latrap
e zot ava ganny detri.
9Alor, mwan, mon pou dan lazwa akoz SENYER.
Mon pou rezoui akoz in delivre mwan.
10Dan pli profon mon leker, mon pou dir:
SENYER! Napa personn parey ou!
Ou protez sa enn ki feb, kont sa enn ki for.
Ou protez sa enn ki pov e ki ganny imilye,
kont sa bann ki eksplwat li.
11Bann fo temwen i leve.
Zot kestyonn mwan lo sa ki mon pa konnen.
12Zot rann mwan dimal pour dibyen;
mon'n ganny abandonnen.
13Kan zot ti malad,
mon ti met lenz dey.
Par senpati, mon ti fer en zenn
e mon ti priye.
14Mon ti fer sa konmsi ti pour
en zanmi oubyen en frer.
Mon ti sagren, kraze par lafatig,
konmsi mon ti'n perdi mon prop manman.
15Me ler mwan mon ti dan maler,
zot ti antour mwan e zot ti riy mwan.
Bann bandi ki mon pa ti rekonnet
pa ti arete maltret mwan.
16Zot ti kontinyen monk mwan
e zot ti grens zot ledan kont mwan.
17Ankor konbyen letan, SENYER,
ou pou zis gete?
Delivre mwan kont sa bann malfeter!
Aras mwan dan grif sa bann lyon!
18Alor, mon ava dir ou mersi
devan gran lasanble.
Mon ava loue ou dan milye sa gran lafoul.
19Pa les mon bann lennmi riy mwan.
Pa les sa bann ki ay mwan san rezon
get mwan avek mepri.
20Zanmen zot koz pour fer lape.
O kontrer, zot envant en bann kalonmni
kont bann zabitan trankil sa pei.
21Zot ouver gran zot labous kont mwan.
Zot dir: Nou'n war li avek nou prop lizye!
22SENYER! Ou menm, ou'n war.
Pa gard silans.
SENYER! Pa reste lwen avek mwan.
23Leve SENYER!
Vin defann mon drwa.
Debout mon SENYER, mon Bondye!
Vin defann mwan.
24SENYER mon Bondye!
Ziz mwan dapre ou lazistis.
Pa les mon bann lennmi riy mwan.
25Pa les zot dir ant zot:
Nou'n ganny sa ki nou ti pe rode.
Pa les zot dir:
Nou'n debaras nou avek li!
26Fer sa bann ki kontan mon maler
kanmi e onte.
Ki sa bann ki montre larogans
i ganny kouver avek laont ek dezoner.
27Me bann ki swete war lazistis dan mon faver,
ava kriye dan lazwa e zot pa pou aret dir:
SENYER i gran! I kontan boner son serviter.
28Alor, mon pou fer konnen koman ou fidel.
Mon labous ava proklanm ou lazistis tou le zour.
Currently Selected:
Psonm 35: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
