Psonm 34
34
Louanz lo Labonte Bondye
Psonm David.
1Mon pou touzour loue SENYER;
mon labous pou touzour sant son louanz.
2Mon met mon lafyerte dan SENYER.
Bann pov ava antann e zot ava dan lazwa!
3Vin proklanm avek mwan grander SENYER!
Ansanm, annou sant son non!
4Mon ti apel SENYER
e i ti reponn mwan.
In delivre mwan dan tou mon lafreyer.
5Sa enn ki lev son lizye ver li,
lazwa i reyonnen lo son figir.
Laont pa pou paret lo son figir.
6Kan en malere i kriye,
SENYER i antann li.
I delivre li dan tou son detres.
7Lanz SENYER i kanp otour sa bann
ki annan respe pour SENYER.
I delivre zot dan tou danze.
8Goute e gete koman SENYER i bon!
Sa enn ki pran li pour son labri i vreman ere.
9Zot son bann sen, annan respe pour SENYER!
Sa enn ki annan respe pour li, pa mank nanryen.
10Bann zenn lyon i konnen
kisisa bezwen ek lafen.
Me sa enn ki obei SENYER pa mank nanryen.
11Mon bann zanfan! Vini. Ekout mwan.
Mon ava ansenny zot respe pour SENYER.
12Eski ou anvi zouir lavi?
Eski ou anvi war bann zour ere?
13Alor gard ou lalang kont lemal
e vey ou labous kont mansonz.
14Aret fer sa ki mal, pratik sa ki byen;
rod lape e met li an pratik.
15Lizye SENYER i fikse lo bann zis.
Son zorey i ouver pour ekout zot ler zot kriye.
16SENYER i tourn kont bann malfeter
pour fer disparet zot non lo later.
17Kan son zanfan i apel li,
SENYER i antann li.
I delivre li dan tou son traka.
18SENYER i pros avek sa enn ki'n dekouraze.
I sov sa enn ki'n perdi tou lespwar.
19En zonm ki zis i tonm dan bokou maler.
Me SENYER i touzour delivre li.
20I vey lo tou son bann lezo;
napa enn ki pou ganny kase.
21Maler i anmenn lanmor bann malfeter.
Lennmi bann ki fidel anver SENYER
pou ganny pini.
22SENYER i sov lavi son bann serviter.
Sa enn ki met son konfyans dan li
pa pou ganny pini.
Currently Selected:
Psonm 34: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
