Psonm 39
39
Konfesyon En Dimoun dan Douler
Psonm David. Pour sef lakoral: Pour Yedoutoun.
1Mon ti dir: Mon pou vey mon konportman,
pour mwan pa fer pese avek mon lalang.
Mon pou met en bayon lo mon labous
tan ki i annan malfeter devan mwan.
2Mon ti gard silans;
mon silans pa ti abouti dan nanryen.
Mon soufrans ti ensiportab.
3Avek sak soupir, en dife ti brile dan mon leker.
Alor, mon ti les mon labous koze.
4SENYER! Fer mwan konn lafen mon lavi.
Konbyen letan mon pou viv,
pour mwan realize ki mon lavi i kourt.
5Letan ki ou'n donn mwan pour viv
i en pe plis ki larzer en lanmen.
Devan ou, sa i nanryen ditou:
Lavi en imen i zis en respirasyon.
6I ale vini, parey en lonbraz;
i fatig li en kantite; me sa i zis divan.
I akimil larises san konnen
lekel ki pou profite.
7Aprezan SENYER!
Ki i annan ankor pour espere?
Tou mon lespwar i dan ou.
8Delivre mwan dan tou mon bann pese.
Pa les bann fou riy mwan.
9Aprezan, mon gard silans.
Mon pa pou ouver mon labous,
akoz ou ki'n met mwan dan sa leta.
10Aret ou bann kou lo mwan;
mon afebli par ou bann kalot.
11Ou koriz en imen e ou pini li
pour son bann fot;
parey en lever, ou ronz sa ki i pli kontan.
Nou konnen ki tou et imen i zis divan.
12SENYER! Ekout mon lapriyer.
Mon kriy ou. Ekout mwan!
Pa reste endiferan devan mon larm.
Mon en pasan kot ou;
en etranze parey tou mon bann zanset.
13Donn mwan en letan repo.
Les mwan trankil en moman
pour mwan reganny mon sourir
avan mon disparet pour touzour.
Currently Selected:
Psonm 39: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
