Psonm 31
31
Lapriyer Konfyans dan Bondye
Psonm David. Pour sef lakoral.
1SENYER!
Mon'n ganny labri kot ou.
Pa zanmen les mwan ganny imilye.
Dan ou lazistis, delivre mwan!
2Ekout mwan! Delivre mwan.
Ou menm mon Ros protekter,
mon fortres ki protez mwan.
3Vreman!
Ou menm mon Ros protekter e mon fortres.
Akoz ou non i gran,
kondwir mwan e gid mwan.
4Ou pou delivre mwan dan latrap
ki'n ganny mete pour mwan,
akoz ou menm mon fortres.
5Mon plas mon lavi dan ou lanmen.
Ou'n delivre mwan, SENYER, Bondye fidel.
6Mon deteste bann ki ador zidol initil;
me mon met mon konfyans dan SENYER.
7Mon rezoui e mon dan lazwa akoz ou fidelite,
akoz ou'n war mon lapenn,
ou'n konpran mon detres.
8Ou pa'n livre mwan dan lanmen mon lennmi.
Ou'n rann mwan lib.
9Pran pitye pour mwan, SENYER!
Mon dan langwas.
Mon lizye, mon lagorz ek mon vant
i brile avek sagren.
Mon lekor antye in karyate.
10Mon lavi pe fini dan langwas;
mon bann lannen i fini dan plere.
Akoz mon bann pese, mon perdi kouraz.
Menm mon bann lezo in large.
11Mon bann lennmi i ensilte mwan;
mon bann vwazen i mepriz mwan;
mon fer per bann ki konn mwan.
Ler zot war mwan dan semen, zot sove.
12Mon'n ganny oubliye parey en dimoun mor.
Mon'n vin en lobze initil.
13Mon antann zot fer kalonmni lo mwan;
lafreyer i partou otour mwan.
Zot tou, zot in groupe kont mwan;
zot pe fer konplo pour touy mwan.
14Me mwan, mon'n met mon konfyans dan ou, SENYER.
Mon dir: Ou menm mon Bondye.
15Mon bann zour i dan ou lanmen.
Delivre mwan dan lanmen mon bann lennmi
ki persekit mwan.
16Fer ou regar briye lo mwan, ou serviter;
dan ou fidelite, sov mwan.
17SENYER!
Pa les mwan ganny dezapwente,
akoz mon'n kriy ver ou;
me imilye mon bann lennmi.
Fer bann malfeter desann an silans
dan lemonn lanmor.
18Ferm labous sa bann manter
ki koz avek ensolans,
avek larogans ek mepri kont bann ki zis.
19SENYER!
Ou rezerv ou gran labonte
pour sa enn ki montre respe anver ou.
Ou protez bann dimoun
ki met zot konfyans dan ou.
20Ou kasyet zot dan sekirite ou prezans.
Ou kasyet zot kont konplo zot bann lennmi.
21Loue SENYER!
I'n montre mwan son gran fidelite,
mwan ki ti parey en lavil anserkle.
22Dan mon dezespwar mon ti pe dir:
Ou'n zet mwan lwen avek ou.
Me ou'n antann mon siplikasyon
kan mon ti kriy ver ou.
23Zot son bann fidel! Kontan SENYER.
SENYER i protez sa enn ki fidel anver li;
me i fer bann arogan pey doub.
24Zot tou, ki met zot konfyans dan SENYER
pran kouraz, reste for!
Currently Selected:
Psonm 31: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
