Psonm 32
32
Konfesyon ek Pardon
Psonm David. En lenstriksyon.
1Byennere bann ki zot fot
i ganny pardonnen,
e bann ki zot pese
i ganny oubliye!
2Zot byennere bann ki SENYER i konsider inosan
e ki napa okenn lespri tronper!
3Tan ki mon pa ti konfes mon pese,
mon ti napa lafors
e mon ti plennyen tou lazournen.
4Lizour koman aswar,
ou lanmen ti pini mwan.
Mon lafors ti'n zis evapore
konmsi anba soley sezon lasaler.
5Me, mon'n avoue mon pese avek ou;
mon pa'n kasyet mon fot.
Mon ti dir:
Mon pou konfes mon pese avek SENYER.
Alor, ou ti pardonn mwan mon pese.
6Alor, sa enn ki fidel anver ou,
ava priy ou dan letan bezwen.
Menm si bann gran delo i deborde,
zot pa pou ariv kot li.
7Ou en labri pour mwan;
ou prezerv mwan kont maler.
Ou antour mwan avek bann sanson delivrans.
8Mon pou ansenny ou.
Mon pou montre ou ki semen ou pou swiv.
Mon pou konsey ou;
mon lizye pa pou kit ou.
9Pa fer parey en seval oubyen en bourik bet
ki bezwen en mor ek en labrid
pour kontrol zot lelan.
10Bann malfeter pou konn bokou soufrans.
Me fidelite SENYER
i antour sa enn ki met son konfyans dan li.
11Zot ki zis!
Rezouir dan SENYER.
Zot ki leker i drwat!
Sant zot lazwa.
Currently Selected:
Psonm 32: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
