Psonm 30
30
Lapriyer Remersiman
Psonm David. En kantik pour dedikas tanp.
1SENYER! Mon proklanm ou grander.
Ou pa'n les mon bann lennmi
anmize lo mon depan.
2SENYER, mon Bondye!
Mon ti kriy ver ou
e ou'n geri mwan.
3SENYER! Ou'n tir mwan dan lemonn lanmor.
Ler mon ti pe tonm dan lafos,
ou'n redonn mwan lavi.
4Sant pour SENYER, zot son pep fidel!
Loue SENYER, akoz son non i sen!
5Son lakoler i dire zis pour en moman;
me son labonte i pour touzour.
Mon kapab plere tou lannwit;
me ler lizour i fer, mon dan lazwa.
6Mon ti krwar mon an sekirite.
Alor mon ti dir:
Zanmen mon pou ganny sekwe.
7Dan ou labonte, SENYER,
ou'n fer mwan solid parey en montanny;
ou ti kasyet ou e mon ti per.
8SENYER! Mon ti apel ou.
SENYER! Mon ti sipliy ou:
9Ki lentere ou annan dan mon lanmor,
ler mon desann dan lafos?
Eski dimoun mor i kapab loue ou?
Eski zot kapab rakont ou fidelite?
10SENYER! Ekout mwan.
Pran pitye pour mwan.
SENYER! Vin sekour mwan.
11Ou'n sanz mon lamantasyon an ladans.
Ou'n ranplas mon lenz dey
par en lenz lafet.
12Alor, mon pou sante
e mon pa pou gard silans.
SENYER, mon Bondye!
Mon pou touzour loue ou.
Currently Selected:
Psonm 30: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
