Filipyen Lentrodiksyon
Lentrodiksyon
Filipi i premye lavil Lerop kot Pol in anons Bonn Nouvel. Sa lavil i dan ansyen provens Romen, Masedwann, dan Norwas Lagres. Pandan son dezyenm vwayaz misyonner, Pol ti etabli en legliz laba (Akt 16.12-40). Plizyer lannen plitar, pandan ki Pol ti dan prizon, i ti ekri bann Filipyen en let lo en ton byen fraternel. I ti oule remersye zot pour zot don ki zot ti'n anvoy pour li par Epafrodit, pandan ki i ti dan problenm. I ti osi oule ankouraz zot pour reste fidel avek Kris e pour pa les zot ganny enfliyanse par bann fo doktrin ki ti pe enfiltre dan bann kominote.
Pol i konmans par eksprim lazwa ek rekonesans ki i santi kan i mazin bann kretyen Filipyen. Apre, i donn en pe son nouvel personnel. Devan en lavenir enserten, sepandan, i montre en lasirans ferm ki son relasyon avek Zezi-Kri i donn li (1.12-16). I ankouraz bann Filipyen pour reste ferm dan lafwa; pour devlop larmoni ek bon konpreansyon ant zot, e montre limilite ek en lespri servis ki Zezi-Kri i donn zot (1.27–2.18). An atandan ki i revwar zot, Epafrodit, reprezantan bann Filipyen, ek Timote, koleg Pol, ava gard kontak ant Pol ek kominote Filipyen (2.19-30).
Answit, Pol i met son bann korespondan an gard kont bann ki pa fidel anver Bonn Nouvel. I envit bann Filipyen pour imit son legzanp, e mars avek determinasyon ver lobzektif kretyen: Imit Zezi-Kri (Sapit 3). Son let i termin par divers parol lankourazman, remersiman ek salitasyon (Sapit 4).
Sa let i ganny apele: Let lazwa, akoz sa tenm i travers sa let en bout a lot. Sa lazwa i atase avek fidelite anver Kris.
Currently Selected:
Filipyen Lentrodiksyon: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.