Efezyen 6

Relasyon ant Paran ek Zanfan

1Zanfan! Obei zot paran devan Senyer, akoz sa i zis. 2Annan respe pour zot papa ek zot manman: Sa i premye komannman ki ganny akonpannyen avek en promes: 3Pour ki ou ava viv ere e lontan lo later#6.3 War Egz 20.12; Det 5.16..

4Zot, bann papa! Pa eksit lakoler zot zanfan; me o kontrer, elve zot dan en ledikasyon ek disiplin enspire par Senyer.

Relasyon ant Serviter ek Met

5Bann serviter! Zot devre obei zot met lo later avek bokou respe, e travay dan son servis onnetman, parey ou ti ava fer si ou ti pe servi Kris. 6Pa fer konmsa zis kan zot met i war zot, zis pour fer li plezir. Me avek tou zot leker, fer lavolonte Bondye, koman bann serviter Kris. 7Koman bann serviter, fer zot travay avek bonn volonte, konmsi zot pe travay zis pour Senyer li menm, me pa pour zonm. 8Rapel zot ki Senyer pou rekonpans tou dimoun, serviter oubyen non, dapre dibyen ki zot ava'n fer.

9Zot, bann met! Fer parey. Tret byen zot bann serviter e aret fer bann menas. Mazinen ki zot menm, ansanm avek zot bann serviter, zot annan en menm Met ki dan lesyel, ki pa fer okenn preferans.

Zarm Bondye

10Anfen, pran ou lafors dan linyon avek Senyer e dan son gran pwisans. 11Abiy zot dan tou bann zarm batay ki Bondye i donnen, pour zot kapab reziste kont tou bann riz dyab. 12Annefe, nou pa pe lit kont dimoun, me kont pouvwar bann move lespri dan lemonn, bann lotorite, ek pouvwar dan lemonn teneb dan sa letan ki nou pe viv ladan. 13Pour sa rezon, zot devre met lo tou bann zarm ki Bondye in donn zot. Alor, kan bann move zour ava arive, zot ava kapab defann zot kont latak lennmi. Kan zot ava'n fini lite ziska zot dernyen zour, zot ava ankor kapab tenir ferm.

14Alor, met zot pare: Pran laverite koman en sang otour zot leren; pran ladrwatir koman en proteksyon lo zot pwatrin; 15met koman soulye, lelan pour anons Bonn Nouvel lape. 16Touzour pran lafwa pour proteksyon. Avek sa, zot ava kapab tenny dife tou bann dart anflanmen ki dyab i tir lo zot. 17Met osi kas delivrans lo zot latet, e pran Parol Bondye koman en lepe ki Lespri Sen i donnen.

18Gide par Lespri, priye toultan, avek toudsort lapriyer ek siplikasyon. Pour sa, reste vizilan, touzour fidel; priy avek ferver pour tou bann krwayan. 19Priy osi pour mwan, pour ki, kan mon ouver labous, mon ava ganny parol pour anons avek lasirans, sekre Bonn Nouvel. 20Menm si mon prizonnyen, mon en anbasader Bonn Nouvel. Priye pour ki mon ava kapab koz avek lasirans ki fodre.

Konpliman Final

21Tisik, nou frer byenneme, e serviter fidel dan travay Senyer, ava donn zot tou detay lo mwan pour zot konnen sa ki pe arive avek mwan. 22Mon pe anvoy li kot zot, spesyalman pour li donn zot nou nouvel isi, e pour ankouraz zot.

23Mon demande ki Bondye ek son Garson Zezi-Kri i donn tou bann frer dan Kris, lape, lanmour ek lafwa. 24Mon demande ki lagras Bondye ava avek tou bann ki kontan nou Senyer Zezi-Kri avek en lanmour ki pa zanmen sanze.

Currently Selected:

Efezyen 6: BSK

Highlight

Copy