Filipyen 1

1Sa let i sorti kot Pol ek Timote, bann serviter Zezi-Kri. Nou pe ekri tou bann zabitan Filipi ki fer parti pep Bondye, ini avek Zezi-Kri. Nou mesaz i adres osi pour bann dirizan Legliz ek bann dyak.

2Nou demande ki Bondye nou Papa e Senyer Zezi-Kri i akord zot lagras ek lape.

Pol I Priy pour bann Kretyen dan Filipi

3Mon remersye mon Bondye pour zot, sak fwa ki mon mazin zot. 4Mon touzour priy pour zot. Sak fwa ki mon priy pour zot, mon fer li dan lazwa. 5Annefe, depi premye zour ziska ozordi, zot in ed mwan pour repann Bonn Nouvel#1.5 War Akt 16.13-15.. 6Mon sir ki Bondye ki'n konmans sa bon travay parmi zot, ava kontinyen fer li ziska ki i ganny konplete, zour ki Zezi-Kri ava retournen.

7I normal ki mon annan en tel santiman anver zot tou. Annefe, zot tou, zot annan en plas spesyal dan mon leker. Zot tou, zot partisip dan sa don ki Bondye in akord mwan, ozordi ki mon dan prizon#1.7 War 1.13., parey yer, kan mon ti pe defann Bonn Nouvel e anons li avek kouraz. 8Bondye i mon temwen ki mon kontan zot avek sa profon lafeksyon Zezi-Kri.

9La sa ki mon demann Bondye dan mon lapriyer: Ki zot lanmour i ogmante e vin pli gran ankor, avek en vre konnesans ek en konpreansyon parfe, 10pour zot kapab disern sa ki byen. Konmsa, zot ava pir e san repros zour retour Kris. 11Alor, zot lavi ava ranpli avek bann fri lazistis ki Zezi-Kri i prodwir, pour mazeste ek louanz Bondye.

Kris I Lavi

12Mon bann frer ek ser! Mon oule ki zot konnen: Sa ki'n arive avek mwan, in kontribye pour fer progrese Bonn Nouvel. 13Annefe, tou bann gard dan pale e dan lezot landrwa in konnen ki mon dan prizon akoz mon pe servi Kris. 14Alor, pandan mon letan dan prizon, konfyans laplipar bann frer in ogmante. Deplizanpli, zot in vin pli brav pour anons mesaz Bondye san okenn lafreyer.

15Serten pe anons Kris par zalouzi e avek en lespri kontrovers kont mwan. Me i annan ki pres avek en bon lentansyon. 16Sa bann dimoun, zot fer li avek lanmour, akoz zot konnen ki mon'n ganny met dan prizon pour defann Bonn Nouvel. 17Sa premye group pa pres Kris avek senserite, me avek en lespri rivalite. Zot mazinen fer mwan soufer plis ankor pandan ki mon la dan prizon.

18Ki zot lentansyon i bon oubyen move pa fer mwan nanryen; pourvi ki Kris i ganny anonse. Mon rezoui pour sa e mon pou kontinyen rezoui, 19akoz mon konnen ki mon pou ganny libere par zot lapriyer e avek led Lespri Zezi-Kri. 20Mon pli gran dezir e mon lespwar, se ki mon pa zanmen onte. O kontrer, ranpli avek kouraz, vivan oubyen mor, mon pou fer loner Kris, dan mon lekor. 21Annefe, pour mwan, lavi se Kris e lanmor i en gen. 22Si mon kontinyen viv, mon kapab fer keksoz itil, sepandan, mon pa konnen ki mon pou swazir. 23Mon ganny trennen dan de kote: Mon ti ava kontan kit sa lavi pour al avek Kris. Sa ti ava preferab. 24Me akoz zot, i pli enportan pour mwan kontinyen viv. 25Mon asire, e mon konnen alor, ki mon pou reste e viv parmi zot. Mon pou reste avek zot tou pour ed zot progrese dan lafwa e reste dan lazwa. 26Alor, kan mon pou retourn parmi zot, gras a mwan, zot ava annan ankor plis rezon pour zot fyer dan lakominyon avek Zezi-Kri.

27Me i enportan ki zot konport zot dan en fason diny anver Bonn Nouvel Kris. Alor, ki mon vin war zot, oubyen ki mon pa vini, mon swete tande ki zot pe reste ini solidman dan en menm lespri; ki ansanm, avek en menm leker, zot pe konbat pour lafwa ki baze lo Bonn Nouvel. 28Pa les zot ganny entimide par zot bann ladverser. Sa i ava pour zot en siny ki zot lo en semen ki anmenn ver zot destriksyon. Me pour zot, i ava en siny delivrans ki sorti kot Bondye 29ki'n akord zot sa privilez pour servi Kris. Pa zis pour krwar dan li, me osi pou soufer pour li. 30Aprezan, zot pe pran par dan sa menm konba ki otrefwa zot ti war mwan ladan#1.30 War Akt 16.19-40.. Parey zot konnen, i menm konba ki mon pe kontinyen.

Currently Selected:

Filipyen 1: BSK

Highlight

Copy