2 Makabe 3
3
Diskisyon ant Onyas ek Simon
1Dan lepok Gran-Pret Onyas, garson Simon#3.1 War Sir 50., bann zabitan Zerizalenm, lavil sen, ti zouir en lape konplet. Zot ti obeir tou bann lalwa, akoz Onyas ti annan respe pour Bondye e ay lemal. 2Bann lerwa osi ti annan respe pour tanp e zot ti montre zot zenere par bann zoli kado ki zot ti ofer. 3Konmsa ki Selekous, lerwa Lazi, ti pey li menm, tou fre okazyonnen par bann sakrifis ki ti ganny ofer.
4En zonm sorti dan tribi Benzamen, nonmen Simon, ki ti ansarz ladministrasyon tanp, pa ti tonm dakor avek Gran-Pret Onyas lo size lenspeksyon bazar lavil. 5Konman i pa ti arive ganny rezon kont Onyas, i ti al war Apoloniis, garson Traseas, ki, dan sa lepok, ti gouverner Gran Siri ek Fenisi. 6La sa ki i ti rakont Apoloniis:
“Kof tanp Zerizalenm i ranpli avek en larises ekstraordiner ki pa ni menm kapab ganny konte. I depas bokou sa ki bezwen servi pour sakrifis. I ti ava posib ki sa larises i ganny konfiske pour pas anba kontrol lerwa.”
Heliodor I Ganny Anvoye Zerizalenm
7Alor, kan Apoloniis ti al kot lerwa, i ti koz avek li lo size sa larzan. Lerwa ti swazir Heliodor, ki ti ansarz bann zafer lerwa, pour anvoy li Zerizalenm e fer demars pour konfiske sa bann larises.
8Deswit Heliodor ti antreprann sa vwayaz. I ti fer sanblan ki i pe antreprann lenspeksyon bann lavil Gran Siri ek Fenisi. Me an realite, i ti pe al egzekit plan lerwa.
9Kan i ti ariv Zerizalenm, i ti ganny byen resevwar par Gran-Pret ek bann zabitan lavil. I ti fer zot par bann revelasyon konsernan larises ki ti annan dan kof tanp. I ti osi eksplik zot akoz in vini. I ti demande si sa bann enformasyon ti vre.
10Gran-Pret ti eksplike ki ti annan serten larzan pour bann vev ek bann orfelen#3.10 War Det 14.29; 27.19.. 11Ti osi annan en serten sonm larzan pour Hirkan, garson Tobi, en zonm enportan dan lavil. I ti fer remarke ki an tou, ti annan 11,000 kilo larzan ek 5,500 kilo lor, e ki rapor sa bandi Simon pa ti koresponn avek laverite. 12I ti osi dir ki i enposib fer okenn ditor sa bann dimoun ki'n met zot konfyans dan sa landrwa sen. I pa posib vyol sentete ek konfyans dan sa tanp ki ganny onore atraver lemonn antye.
Heliodor I Fer Plan pour Antre dan Tanp
13Me Heliodor ti ensiste ki sa larzan i devre ganny konfiske an faver trezor lerwa. 14Alor i ti desid en zour pour fer lenvanter sa larises.
Zabitan lavil antye ti enkyet. 15Bann pret ti met zot rob sakre e prostern devan lotel. Zot ti enplor Bondye dan lesyel ki'n fer sa bann lalwa ki protez bann byen ki'n ganny depoze. 16Leker dimoun ki ti war Gran-Pret, ti desire: Kouler son figir ti'n sanze. Sa ti revel son langwas enteryer. 17Lafreyer ek tranbleman son lekor ti montre klerman nenport ki dimoun, soufrans ki ti sezi son leker. 18An vites, dimoun ti sorti kot zot par group pour priye, pour ekart dezoner ki ti menase tonm lo tanp. 19Bann fanm dan lenz dey avek pwatrin dekouver ti desann e ranpli lari. Bann zenn fiy ki ti reste dan lakour e zanmen sorti, ti tay devan laport, lo miray e devan lafnet. 20Zot ti lev lanmen anler ver lesyel#3.20 War Ps 28.2. avek zot siplikasyon. 21Ti fer lapenn war sa gran lafoul antye, lafas ater ek Gran-Pret enkyet e angwase.
22Zot tou, zot ti pe enplor Senyer Toupwisan pour protez bann byen ki'n ganny depoze dan tanp e gard zot pour sa bann dimoun ki'n depoz zot la. 23Me Heliodor ti kontinyen avek sa ki ti'n ganny deside.
Pinisyon Heliodor
24Heliodor ti'n ariv pre kot trezor tanp avek son bann gard, kan Senyer bann lespri ki dan lesyel ek tou bann pouvwar, ti fer aparet keksoz ekstraordiner. Alor, tou sa bann ki ti'n oze ariv ziska la, ti terifye par pwisans Bondye: Zot ti'n perdi tou lafors; zot ti dan en leta sok. 25Annefe, zot ti war en seval ornen avek en lekipman manifik; son kavalye ti annan ler terib. Son zarm ek son lekipman konba ti annor. Avek firer, sa seval ti lans li lo Heliodor avek son de sabo avan.
26Anmenmtan, de zennzan ti aparet devan Heliodor. Zot ti paret tre for e byen zoli, abiye dan lenz manifik, debout lo sak kote Heliodor. Zot pa ti pe arete ansonm li. 27Heliodor ti tonm ater e perdi konnesans. Son bann zonm ti anmas li e anmenn li lo en lanmak. 28Sa zonm ki ti'n fek antre dan lasal trezor avek son bann zonm ek son bann gard sekirite, pa ti kapab fer nanryen pour ed son lekor. Zot ti oblize rekonnet klerman lotorite Bondye.
29Anba laksyon Bondye, Heliodor ti reste la, tale ater, san kapab koze e san okenn lespwar sorti la vivan.
30Antretan, lepep ti loue Bondye ki ti'n azir dan en fason merveye pour son prop defans. Tanp ki ti'n ranpli avek gran lafreyer ek troub, ti pe deborde avek lazwa ek rezouisans, akoz Senyer ti'n montre son gran pwisans.
Onyas I Entersed an Faver Heliodor
31Serten zanmi ki ti pe akonpanny Heliodor ti deswit sipliy Onyas priy Bondye Treo pour sov lavi sa zonm ki ti pre pour mor. 32Gran-Pret Onyas ti per ki lerwa i soupsonn en konplo prepare par bann Zwif. Alor i ti aksepte ofer en sakrifis pour sov lavi Heliodor.
33Pandan ki Gran-Pret ti pe ofer sakrifis pour pardon pese, sa bann menm zennzan ti aparet ankor akote Heliodor, dan menm lenz. Zot ti dir li, “Remersye Gran-Pret Onyas; gras a li, Senyer in rann ou, ou lavi. 34Aprezan, ou ki lesyel in pini, fer sir ki ou anons avek tou dimoun, koman pwisans Bondye i gran.”
Apre, sa bann zennzan ti disparet.
Heliodor I Loue Bondye
35Heliodor ti ofer en sakrifis Senyer e adres en long lapriyer devan Bondye ki'n sov son lavi. I ti dir orevwar Onyas e retourn kot lerwa avek son larme. 36I ti temwannyen devan tou dimoun, koman bann mervey Bondye i gran, e ki li menm in war sa avek son prop lizye.
37Lerwa ti demann li, “Dapre ou, lekel ki ou krwar meyer dimoun pour anvoy ankor Zerizalenm?”
Heliodor ti reponn, 38“Si ou annan en lennmi oubyen en dimoun ki kont ou gouvernman, anvoy li laba. Si i sape, i ava retournen kouver avek kou. I serten ki pwisans Bondye i protez sa landrwa. 39Annefe, Bondye ki dan lesyel i vey lo son tanp e i protez li. I pini anmor sa enn ki esey antre la avek move lentansyon.”
40Sanmenm sa ki ti ariv avek Heliodor e ki mannyer trezor tanp ti ganny proteze kont piyaz.
Currently Selected:
2 Makabe 3: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.