2 Makabe 4
4
Simon I Akiz Onyas
1Parey i'n ganny mansyonnen pli o#4.1 War 3.4-6., Simon ti trai son pep. Li menm ki ti koz avek Apoloniis o size trezor tanp. I ti osi fer fos akizasyon kont Onyas. I ti dir, “Gran-Pret Onyas ki ti atak Heliodor, i responsab pour maler ki'n arive.”
2I ti menm ganny lodas akiz Onyas pour fer konplo kont gouvernman, alor ki Onyas i en byenfeter lavil. I protez son pep. I fer tou pour respekte bann lalwa.
3Laenn Simon ti vin sitan gran ki avek son lakor, son bann zonm ti touy plizyer dimoun.
4Onyas ti realize ki sityasyon ti danzere. I ti war ki Apoloniis, garson Meneste, gouverner Gran Siri ek Fenisi ti pe toler bann mesanste Simon. 5Alor, i ti al war lerwa, pa pour li akiz personn, me pour defann lentere zeneral e sak endividi ek lepep antye. 6Annefe, i ti rekonnet ki san lentervansyon lerwa, i ti enposib retablir lape dan bann zafer leta, e ki Simon pa ti pou aret son bann aksyon fou.
Simon I Entrodwir Koutim Grek
7Kan Selekous ti mor, Antyokis Epifann ti siksed apre li lo tronn. Alor, Zason, frer Onyas, ti vin Gran-Pret par mwayen koronpi. 8Annefe, dan en antretyen avek lerwa, i ti ofer li 12,000 kilo larzan e ankor 2,700 kilo plitar. 9Anplis, i ti promet pour pey ankor 4,000 kilo larzan si i ganny lotorizasyon etabli en zimnaz pour lantrennman bann zennzan, e anrol bann zabitan Zerizalenm koman sitwayen lavil Antyos.
10Lerwa ti aksepte sa bann propozisyon. Koman Zason ti pran pouvwar, i ti fors son bann konpatriyot adopte koutim bann Grek.
11I ti aboli bann konsesyon ki bann zwif ti pe gannyen avek lerwa atraver bann demars ki Zan, papa Epolenm, ti fer. Li menm Epolenm ki plitar pou ganny anvoye koman anbasader Ronm pour etabli lakor lanmitye avek bann Romen.
Zason ti osi aboli bann lenstitisyon ki fonde lo Lalwa Bondye, pour ranplas zot avek bann ki kontrer avek sa Lalwa. 12I ti ganny gran plezir pour etabli en zimnaz zis anba kolin tanp. I ti ankouraz bann zennzan adopte koutim Grek dan bann levennman sportif.
13Ensi, bann koutim Grek ti vin alamod, ansanm avek lezot koutim etranze. Tousala, par lafot Zason ki ti en zonm tre move e en fo Gran-Pret. 14Konsekans ti grav:
Bann pret ti negliz servis lotel. Zot ti nepli annan respe pour tanp; zot ti negliz bann sakrifis. Kan zot ti antann sinyal, zot ti degaze pour pran par dan bann aktivite spor ki pourtan Lalwa i defann. 15Zot ti nepli pran ka avek bann pratik ki ti ganny respekte par zot bann zanset, me zot ti plito annan gran preferans pour bann valer Grek. 16Pour sa rezon, zot ti trouv zot dan problenm. Annefe, sa bann dimoun pour ki zot ti annan ladmirasyon e ki zot ti oule imite, ti vin zot lennmi e ti persekit zot. 17Dezobeisans anver Lalwa Bondye ti anmenn konsekans serye. Bann levennman ki swiv ava prouve.
Zerizalenm anba Lenfliyans Siriyen
18Tou le 4 an, bann konpetisyon sportif ti ganny organize dan lavil Tir, dan prezans lerwa. 19Zason, sa zonm visye, ti anvoy koman delege bann sitwayen Antyos sorti Zerizalenm avek 10,000 kilo larzan, pour pey sakrifis ki ganny ofer an loner bondye Herakles. Me sa bann ki ti pe anmenn sa larzan ti estimen ki pa ti en bon keksoz pou servi sa larzan pour sakrifis. Zot ti plito gard li pour pey en lot depans. 20Alor, ki Zason ti oule depans sa larzan pour ofer sakrifis an loner Herakles, bann dimoun ki ti pe anmenn sa larzan ti deside servi li pour konstriksyon bann bato lager.
Antyokis Epifann I Ganny Aklanmen Zerizalenm
21Kan Apoloniis, garson Meneste ti ganny anvoye Lezip pour kouronnman Filometor koman lerwa, Antyokis ti dekouver ki Filometor ti'n vir kont politik son gouvernman. Alor, i ti pran mezir pour asir sekirite son rwayonm. Ler i ti ariv Zafa i ti kontinyen ziska Zerizalenm. 22Zason ek lavil antye ti akey li avek gran lafanfar, gran laklamasyon ek lalimyer bann flanbo. Apre, Antyokis ti rantre dan Fenisi avek son larme.
Menelas I Vin Gran-Pret
23Apre 3 an, Zason ti anvoy Menelas, frer Simon ki'n ganny mansyonnen pli o#4.23 War 3.4-6., pour anmenn larzan kot lerwa e ganny son lopinyon lo serten zafer enportan. 24Ler Menelas ti ganny prezante devan lerwa, i ti enpresyonn lerwa par son bann mannyer gran dimoun enportan. I ti reisi ganny apwente dan fonksyon Gran-Pret. I ti'n ofer lerwa 8,000 kilo larzan plis ki Zason.
25Apre ki i ti'n ganny dokiman rwayal ki konfirm li dan sa post, i ti retourn Zerizalenm. Pourtan, i ti napa okenn kalifikasyon neseser pour vin en Gran-Pret. O kontrer, i ti en diktater kriyel avek karakter en zannimo sovaz. 26Alor, Zason ki ti'n kas anba son prop frer, ti ganny ranverse par en lot zonm ki ti obliz li kit son pei pour sov annegzil dan pei bann Amonit.
27Menelas ti gard son fonksyon, me i pa ti pey regilyerman larzan ki i ti'n promet lerwa. 28Pourtan, Sostrat, komandan sitadel dan Zerizalenm, ki ti responsab pour kolekte taks, ti reklanm li sa larzan. Tou le de ti ganny apele devan lerwa pour reponn kestyon lo sa size. 29Menelas ti nonm son prop frer, Lisimak, pour ranplas li koman Gran-Pret, tandis ki Sostrat ti ganny ranplase par Krates, komandan bann troup mersener Sipriyot.
Onyas I Ganny Touye
30Pandan sa menm letan, ti arive ki bann zabitan lavil Tars ek Malos ti revolte. Annefe, lerwa ti'n fer kado zot bann lavil avek menazer Antyokis. 31Lerwa ti degaze pour regle sa zafer. I ti les Andronik, en zonm enportan, pour ranplas li. 32Me Menelas ti profite pour vol plizyer istansil annor dan tanp pour donn Andronik. I ti vann enpe osi avek Tir ek lezot lavil dan zalantour. 33Kan Onyas ti konn byen sa ki ti'n arive, i ti al rod refiz dan en tanp Dafne, en lavil ki pros avek Antyos. Depi la, i ti lans bann lakizasyon kont Menelas. 34Alor, Menelas ti ganny en lantretyen sekre avek Andronik. I ti persiad li pou touy Onyas. Donk, Andronik ti al kot Onyas. I ti donn li son lanmen drwat e fer bann zoli promes. Konmsa ki i ti kapab fer Onyas sorti dan son kwen kot i ti pe kasyet, menm si i pa ti vreman annan konfyans dan li. Alor, san okenn respe pour lazistis, toudswit Andronik ti touy li. 35Pour sa rezon, sa gran krim enzis ti met ankoler pa zis bann Zwif, me osi bokou lezot nasyon.
Andronik I Ganny Pini
36Kan lerwa Antyokis ti retournen sorti Silisi, bann Zwif dan lavil ti fer en petisyon pour proteste kont lasasina Onyas. Annefe, sa lasasina pa ti zistifye e bann Grek ti osi eksprim zot mekontantman. 37Antyokis ti sagren profondeman; i ti plere ler i ti mazin lasazes ek bon kondwit sa defen. 38I ti telman ankoler ki i ti aras Andronik son rob rouz seremoni, fer tir tou son lenz lo li e fer li pronmnen atraver lavil, ziska sa menm landrwa kot i ti'n touy Onyas. I ti fer anvoy sa kriminel dan lot monn. Konmsa ki Senyer ti donn Andronik pinisyon ki i ti merite.
Lisimak I Ganny Touye
39Pandan sa letan, en gran kantite vol bann lobze sakre ti'n ganny komet par Lisimak, avek konplisite son frer Menelas. Bokou lobze annor ti'n ganny anmennen. Kan sa nouvel ti fannen dan lavil, bann zabitan ti rasanble kont Lisimak. 40Lafoul dimoun ti eksite e ranpli avek lakoler. Lisimak ti donn zarm en group 3,000 zonm pour kraz sa mouvman par lavyolans. Sa troup ti anba komann en serten Oranos, en zonm deza vye e byen bet. 41Kan bann Zwif ti realize ki Lisimak ti pe atak zot, serten ti anmas ros, morso dibwa, lasann ki ti la ater. Dan en konfizyon, zot ti anvoy tousala kont bann zonm Lisimak. 42Konmsa ki bokou solda ti ganny blese; serten ti menm ganny touye. Tou leres ti sove. Lisimak, sa voler bann lobze sakre ti ganny masakre pre avek lasal trezor.
Menelas I Ganny Inosante
43Akoz sa bann ensidan, en plent ti ganny anmennen devan lakour, kont Menelas.
44Kan lerwa ti vizit lavil Tir, konsey bann ansyen ti anvoy trwa delege pour prezant sa ka devan li. 45Menelas ki ti'n realize deza ki i ti pou perdi, ti ofer gous Ptoleme, garson Dorimenn, pour esey ganny faver lerwa. 46Alor, angiz pour pran ler, Ptoleme ti anmenn lerwa alekar dan galri e fer li sanz son desizyon.
47Konmsa ki tou bann akizasyon kont Menelas ki ti'n fer tou sa bann problenm, ti ganny rezete. Par kont, sa bann pov delege ti ganny kondannen anmor, alor ki si zot ti'n ganny zize par bann Sityen kriyel, zot ti ava'n ganny deklare inosan. 48Konmsa, bann zonm ki ti pran dan defans lavil, pep Zwif ek bann lobze sakre, ti ganny pini dan en fason enzis. 49Menm bann zabitan lavil Tyr ti soke par sa krim. Zot ti organiz en gran seremoni lanterman pour bann viktim.
50Lo son kote, Menelas ti gard son pozisyon, akoz bann sef ti kontan larzan. I ti vin deplizanpli mesan. I ti vin pli gran lennmi son bann prop konpatriyot.
Currently Selected:
2 Makabe 4: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.