1 Tesalonisyen 5
5
Prepare pour Retour Senyer
1Mon bann frer ek ser! Konsernan bann letan ek bann moman ki tousala pou arive, i pa neseser ki mon ekri zot. 2Zot konnen zot menm, ki zour Senyer pou ariv koman en voler dan lannwit. 3Kan dimoun ava pe dir: Tou i anpe e an sekirite, alor en sel kou, destriksyon pou tonm lo zot, parey douler lakousman ki sezi en fanm ansent, e personn pa pou sape.
4Me zot mon bann frer ek ser! Zot pa dan fernwanr, e sa zour pa pou sirprann zot parey en voler. 5Annefe, zot tou, zot bann zanfan lalimyer, bann zanfan lizour. Nou pa fer parti lannwit ni fernwanr. 6Alor, fodre pa ki nou dormi parey lezot, me annou reste vizilan e avek en lespri kler. 7Bann ki dormi, zot dormi pandan lannwit; bann ki soular, zot bwar pandan lannwit. 8Me nou, akoz nou fer parti lizour, annou reste vizilan: Pran pour boukliye, lafwa ek lanmour e pour kas proteksyon, lesperans pour ganny sove. 9Annefe, Bondye pa'n swazir nou pour sibir son lakoler, me pour nou ganny sove par nou Senyer, Zezi-Kri. 10Kris i'n mor pour nou. Kan i pou retournen, nou pou viv avek li, ki nou vivan oubyen mor. 11Alor, ankouraz e fortifye kanmarad, parey zot pe fer.
Dernyen Rekomandasyon
12Mon bann frer ek ser! Mon demann zot pour annan respe pour bann ki travay parmi zot; bann ki lo lord Senyer, zot responsab pour diriz zot e ansenny zot. 13Annan bokou respe ek lafeksyon pour zot, akoz travay ki zot pe fer. Viv byen anpe ant zot.
14Nou ankouraz zot, frer ek ser! Averti bann ki pares, ankouraz bann ki timid, ed bann ki feb; pran pasyans avek zot tou. 15Fer atansyon ki personn pa rann mal pour mal, me dan tou lokazyon, esey touzour fer dibyen kanmarad, ensi ki tou lezot dimoun.
16Reste touzour dan lazwa! 17Priy toultan! 18Dan tou sirkonstans, remersye Bondye. Sa i lavolonte Bondye pour zot avek Zezi-Kri.
19Pa les Lespri Sen azir. 20Pa bezwen mepriz mesaz bann profet, 21me egzamin tou keksoz. Gard sa ki bon, 22e prezerv zot kont tou sa ki mal.
23Bondye ki donn lape, ava konsakre zot konpletman. I ava gard zot lespri, zot lekor ek zot et antye san repros pour retour nou Senyer Zezi-Kri. 24Sa enn ki'n apel zot, i fidel: I pou fer li.
25Mon bann frer ek ser! Priy osi pour nou. 26Anbras kanmarad koman frer ek ser. 27Mon sipliy zot lo non Senyer: Lir sa let avek tou bann krwayan. 28Mon demande ki lagras nou Senyer Zezi-Kri ava avek zot.
Currently Selected:
1 Tesalonisyen 5: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
