1 Tesalonisyen 4
4
Lavi ki Fer Plezir Bondye
1Anfen, mon bann frer ek ser! Zot in aprann avek nou, koman zot devre konport zot pour fer plezir Bondye. Zot pe fer li deza; me esey fer pli byen ankor.
2Zot konn byen bann lansennyman ki nou'n donn zot sorti kot Senyer Zezi. 3Annefe, lavolonte Bondye, se ki zot vin sen; ki zot prezerv zot kont limoralite. 4Mon demande ki sakenn parmi zot i konn swazir en fanm pour li menm e ki zot viv dan sentete e loner. 5Pa les zot ganny dominen par bann move dezir parey bann ki pa konn Bondye. 6Personn pa devre fer ditor son prosen, ni tronp son frer dan sa zafer, akoz Senyer i pini bann aksyon parey. Nou'n deza averti zot lo sa size. 7Bondye pa'n apel nou pour viv dan limoralite, me dan lasentete. 8Pour sa rezon, sa enn ki rezet en tel lansennyman pa rezet en zonm, me Bondye ki donn li son Lespri Sen.
9Konsernan lanmour parmi frer, i pa neseser ki personn i ekri zot lo sa size. Annefe, zot in deza ganny ansennyen par Bondye li menm, pour kontan kanmarad. 10Dayer, zot deza pe kontan tou bann frer dan Masedwann antye#4.10 War 2 Ko 1.16.. Me nou demann zot, frer ek ser, pour fer plis ankor. 11Fer tou pour viv anpe e okip zot prop zafer. Travay avek zot prop lanmen, parey nou'n deza demann zot. 12Konmsa, bann ki pa krwayan ava annan respe pour zot, e zot pa ava bezwen depann lo personn.
Retour Nou Senyer
13Mon bann frer ek ser! Nou pa oule ki zot reste dan linyorans konsernan bann ki'n mor, pour ki zot pa sagren parey bann ki napa lesperans. 14Annefe, nou krwar ki Zezi in mor e in resisite. Nou osi krwar ki Bondye pou anmenn avek Zezi, tou bann ki'n mor an krwayan dan li.
15Annefe, dapre lansennyman Senyer, la sa ki nou deklare: Nou ki pou ankor vivan kan Senyer pou retournen, nou pa pou pas avan sa bann ki'n mor. 16Annefe, kan sinyal pou ganny donnen avek lavwa en larkanz, e son tronpet Bondye, Senyer li menm pou desann sorti dan lesyel, e bann ki'n mor dan Kris pou resisite an premye. 17Apre, nou ki ankor vivan, nou pou ganny anleve e rasanble ansanm avek zot dan nyaz, pour rankontre Senyer dan lezer. Konmsa, nou pou touzour avek Senyer. 18Alor, konsol kanmarad avek sa bann parol.
Currently Selected:
1 Tesalonisyen 4: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
