1 Makabe 9
9
Lanmor Zida Makabe
1Kan Demetriis ti antann lanmor Nikanor e ki son larme in ganny bate dan lager, i ti deside anvoy Bakides ek Alkim dan teritwar Zide pour en dezyenm fwa, avek son bann meyer gerye. 2Zot ti pran semen Gilgal e mont zot kan devan Mesalot, pre avek Arbel. Zot ti pran sa lavil e masakre son bann zabitan.
3Dan premye mwan, lannen 152#9.3 Savedir Avril-Me lannen 160 avan Zezi-Kri., zot ti mont zot kan devan Zerizalenm. 4Apre, zot ti mont Bere avek 20,000 zonm apye ek 2,000 kavalye.
5Zida li, ti pe kanp Elasa avek 3,000 son bann meyer konbatan. 6Kan zot ti war sa gran larme lennmi, zot ti per e bokou ti sove dan kan, ziska ki ti reste zis 800 zonm.
7Kan Zida ti war ki son larme ti'n sove alor ki batay ti so, i ti santi li angwase, akoz i ti napa letan pour rasanble zot. 8I ti dekouraze, me i ti dir avek sa bann ki ti reste, “Annou debout e fer fas avek nou lennmi. Nou kapab annan lafors pour atak zot.”
9Me son bann zonm pa ti dakor. Zot ti dir, “La, nou pa pou kapab fer nanryen. Vomye nou sov nou prop lavi. Apre nou ava retournen avek nou bann frer e repran konba. Pour lemoman nou tro feb.”
10Me Zida ti dir:
“Zanmen mon pou taye devan zot. Si nou ler in arive, annou mor avek kouraz pour nou bann frer; nou pa pou sali nou loner.”
Dernyen Konba Zida
11Larme lennmi ti sorti dan kan e pran pozisyon konba devan bann Zwif. Bann kavalye ti separ an de divizyon: Bann gerye avek fles ek lans devan. Bann meyer gerye ti ganny plase devan larme. 12Bakides ti pe komann larme lo kote drwat. Bann zonm apye ti lo de kote. Zot ti avanse lo son bann tronpet. Bann solda Zida ti osi sonn zot tronpet. 13Later ti tranble avek tapaz tou le de larme. Konba feros ti'n konmanse e ti ale depi bomaten ziska aswar.
14Zida ti war ki Bakides ek son bann meyer konbatan ti lo kote drwat. Alor, bann zonm pli kouraze ti akonpanny Zida. 15Zot ti fons ver lennmi, lo kote drwat e pourswiv zot ziska dan montanny Azara. 16Kan bann troup lo kote gos ti remarke ki kote drwat ti'n fini ganny bate, zot ti atak Zida ek son larme par deryer.
17Konba ti feros, e bokou konbatan lo tou le de kote ti ganny touye. 18Zida osi ti ganny touye. Tou lezot ti sove.
19Zonatan ek Simon ti anmas zot frer Zida e anter li Modin, dan tonbo zot zanset. 20Tou bann Izraelit ti plere pour li. Zot ti fer gran seremoni dey pour li pandan plizyer zour. Zot ti dir, 21“Koman i fer ki sa gran ero Izrael ki ti sov Izrael in mor!”
22Leres bann aksyon Zida, son bann konba, son bann brav aksyon e son bann tit laglwar, pa'n ganny ekri. Annefe, ti annan tro bokou.
Zonatan I Ranplas Zida
23Apre lanmor Zida, bann ki ti'n rezet Lalwa Bondye, ti reaparet partou dan pei Izrael. Tou bann malfeter ti'n osi retournen.
24Dan sa lepok, ti annan en gran lafanmin. Alor, pei antye ti ralye lo zot kote. 25Bakides ti swazir sa bann malfeter pour met zot ansarz pei. 26Sa bann zonm ti rod bann zanmi Zida pour kestyonn zot e anmenn zot kot Bakides ki ti pini zot e imilye zot. 27Bann Izraelit pa ti'n konn en tel maler lo zot depi lafen lepok bann profet.
28Alor, bann zanmi Zida ti reini. Zot ti dir Zonatan, 29“Depi lanmor ou frer Zida, nou napa personn parey li pour lager kont nou bann lennmi, Bakides, ek tou bann ki pa kontan nou. 30Alor, ozordi, nou oule swazir ou koman nou sef, pour lager pour nou.”
31Zonatan ti aksepte pour vin zot sef dan plas Zida, son frer.
Zonatan I Vanz Lanmor Son Frer Zan
32Kan Bakides ti antann sa nouvel, i ti esey touy Zonatan. 33Zonatan, son frer Simon ek tou bann zonm ki ti avek li, zot ti ganny enformen. Zot ti sov dan dezer Tekoa e enstal zot pre kot sitern Asfar. 34Bakides ti antann sa nouvel en zour saba. Alor, i ti travers larivyer Zourden avek son larme.
35Zonatan ti anvoy son frer, Zan, ki ti responsab fanmir bann gerye, pour al demann son bann zanmi Nabateen, permisyon pour depoz son gran kantite bagaz kot zot. 36Me dan semen, bann Zanbrit sorti Medeba, ti atak Zan e fer li prizonnyen. Zot ti osi sezi tou bann bagaz.
37En pe letan apre, Zonatan ek son frer Simon ti tande ki bann Zanbrit ti pe selebre en gran maryaz. En defile ti pou sorti Nabata. Nouvel marye ti fiy en sef enportan dan Kanaan 38Zonatan ek Simon ti deside vanz lanmor zot frer Zan. Zot ti monte e al kasyet dan montanny. 39Zot ti war en gran laprosesyon ki ti pe fer tapaz e pe anmenn en kantite bagaz. Sa ti defile nouvo marye avek son bann zanmi ek fanmir ki ti pe al zwenn group nouvel marye. Zot ti byen arme e zot ti pe zwe bann lenstriman lanmizik ek tanbour.
40Zonatan avek son bann zonm ti atak zot e touy en kantite zot. Ti annan bokou blese e leres ti sov dan montanny. Bann Zwif ti reganny tou zot bann bagaz. 41Konmsa ki selebrasyon maryaz ti tourn an lamantasyon, lanmizik maryaz ti vin lanmizik dey#9.41 Am 8.10..
42Apre ki zot ti'n byen vanz lanmor zot frer, zot ti retourn dan landrwa kasyet dan bann lanmar kot larivyer Zourden.
Konba Obor Larivyer Zourden
43Kan Bakides ti ganny sa lenformasyon, i ti desann lo bor larivyer Zourden avek son gran larme, en zour saba. 44Zonatan ti dir avek bann ki ti avek li, “Nou pou bezwen lager pour sov nou lavi; nou sityasyon i nepli parey avan. 45Lennmi i devan e deryer nou; lo en kote i annan larivyer, lo lot kote i annan lanmar ek brousay. Napa okenn sans sove. 46Alor, kriy ver lesyel pour delivre nou dan lanmen nou bann lennmi.”
47Lager ti konmanse. Zonatan ti lev lebra pour touy Bakides. Me Bakides ti kile; i ti fofil deryer son larme, e reisi sove. 48Zonatan ek son bann zonm ti sot dan larivyer Zourden, naz ziska lot kote. Lennmi pa ti pourswiv zot. 49Anviron 1,000 zonm dan larme Bakides ti mor sa zour.
Bakides I Konstri bann Fortifikasyon
50Bakides ti retourn Zerizalenm. I ti fortifye bann lavil dan Zide. I ti antour bann lavil avek bann gran miray, met bar avek bann laport. I ti fer sa avek Zeriko, Emais, Bet-Horonn, Betel, Timna, Faratonn ek Tefonn. 51I ti plas troup solda dan sa bann lavil pour toultan provok bann Zwif. 52I ti osi fortifye Bet-Sour, Gezer ek sitadel Zerizalenm. I ti plas bann troup ek rezerv manze. 53I ti pran otaz bann garson bann sef enportan dan pei e gard zot dan prizon sitadel Zerizalenm.
54Dezyenm mwan, dan lannen 153#9.54 Savedir Avril-Me lannen 153 avan Zezi-Kri., Alkim ti donn lord pour demoli bann miray dan lakour enteryer tanp. I ti detri travay bann profet. 55Me travay demolisyon ti'n fek konmanse, kan Alkim ti tonm malad. Travay ti arete. Alkim ti'n paralize e nepli kapab ouver labous, ni koze pour donn bann lord lo size son lakaz. 56Alkim ti mor dan douler atros.
57Kan Bakides ti antann lanmor Alkim, i ti retourn kot lerwa Demetriis. Alor, pei Zide ti reste anpe pour 2 an.
Lager I Fini
58Bann Zwif enfidel anver Lalwa Bondye ti fer konplo ansanm. Zot ti dir ant zot:
“Zonatan ek son bann zonm pe viv anpe dan trankilite. Annou fer Bakides retournen e aret zot tou dan en sel lannwit.”
59Zot ti al diskit sa avek li. 60Bakides ti vin avek en gran larme. An sekre, zot ti anvoy let kot zot bann alye dan Zide pour demann zot aret Zonatan ek son bann zonm. Me zot pa ti reisi, akoz zot plan ti ganny dekouver. 61Avek led son bann zanmi, Zonatan ti atrap 50 zonm dan pei ki ti dan konplo e i ti touy zot.
62Apre sa, Zonatan, son bann zonm ek Simon, ti al dan rezyon dezer Bet-Basi. Zot ti rekonstri sa landrwa ki ti'n ganny demoli e met bann fortifikasyon.
63Kan Bakides ti aprann sa, i ti rasanble son larme e alert son bann alye dan Zide. 64I ti al pran pozisyon anfas avek Bet-Basi e atak Zonatan pandan plizyer zour avek masin lager.
65Zonatan ti kit son frer Simon dan lavil, tandis ki li, avek en pti group zonm, i ti al dan lakanpanny. 66I ti bat Odomera ek son klan e detri kan bann tribi Fasironn ki ti'n aksepte zwenn avek Zonatan pour mont en latak kont Bakides.
67Anmenmtan, Simon ti sorti e met dife dan bann masin lager. 68Zot ti atak Bakides e kraz li. Akoz son plan lager pa ti marse, Bakides ti tonm dan depresyon.
69I ti pran en gran lakoler kont sa bann Zwif enfidel anver Lalwa Bondye ki ti'n konsey li vin dan sa rezyon. I ti touy en kantite zot. Apre, i ti deside retourn dan son pei.
70Me kan Zonatan ti antann sa, i ti anvoy mesaze kot Bakides pour demann fer lape e rann bann prizonnyen Zwif.
71Bakides ti aksepte propozisyon Zonatan. I ti fer en serman pour pa atak li ankor pandan tou leres son lavi. 72I ti rann tou bann prizonnyen ki i ti'n pran dan Zide. Apre, i ti retourn dan son pei. I pa ti zanmen retourn dan teritwar bann Zwif.
73Konmsa, lager ti arete dan Izrael. Zonatan ti enstal li Meknes. La, i ti vin sef son pep e i ti detri dan Izrael, bann ki ti mepriz Lalwa Bondye.
Currently Selected:
1 Makabe 9: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.